Sotavi na Nodra Gagadre na Gone era Vakaleqai Tu

Sa nodra itavi na iliuliu ni Lalai me ra vakavulica na kosipeli i Jisu Karisito kivei ira kece na gone, oka kina o ira ka vakaleqai tu. Ena Lalai, sa dodonu ki na gone taucoko me ra kidavaki, lomani, susugi, ka okati. Ena draki ni bula oqori e sa rawarawa sara ki na gone taucoko me ra kila deivaki na loloma ni Tamada Vakalomalagi kei Jisu Karisito ka vakila ka kidava tu na veivakauqeti ni Yalo Tabu. Sa rawa ni vukei iko na vakasama eso oqo mo sotava na nodra gagadre na gone ka vakaleqai tu.

• Vulica na gagadre vakatabakidua eso ni gone. Na sala vinaka duadua me caka kina oqo o ya mo veivosaki kei rau na itubutubu se dauniveisusu ni gone. Vakaraica na sala e vuli vinaka duadua kina na gone kei na ituvatuva cava so e dau veivuke vakalevu sara. Sa rawa talega ni o veivosaki kei ira na iliuliu ni Lalai kei na qasenivuli tale eso e tu vei ira na kila kei na raititobu me ra wasea.

• Vakarautaka e dua na ituvaki maucokona e rawa ni vakila vakayadua kina na gone na nodra taqomaki ka lomani. Vulica na yaca ni gone taucoko ena nomu kalasi, ka vukea me ra vakila ni ra sa ciqomi, lomani, ka okati. Era sa dau vakalewai tu na gone vakaleqai, ia vakaraica na madigi eso mera vakacaucautaki kina ena nodra itovo vinaka.

• Cakava na veisau eso me rawa ni ra dau vakaitavi kece. Sa rawa ni caka na veisau lalai ki na itaviqaravi eso me vakadeitaka ni ra rawa ni vuli kece na gone, oka kina o ira e vakaleqai tu na ituvaki ni yagodra se sotava voli na dredre vakavuli. Me vakataka, ke sa vakaturi ena dua na itaviqaravi me vakaraitaki na iyaloyalo, sa rawa ni sosomitaki ena lagati ni dua na sere veisemati me ra okati kina na gone e vakaleqai tu na nodra rai.

• Tauyavutaka na ivakarau matau ni rumu ni vuli kei na ituvaki. Dua na sala me caka kina oqo o ya me vakarautaki e dua na ivolakabi e tiko kina na ituvatuva ni kalasi e vakamacalataka tu na itosotoso ni kalasi. Sa rawa ni oka ena nomu ituvatuva na masu, gauna ni veivakavulici, kei na gauna ni itaviqaravi. Oqo e rawa ni vukea na vakalailaitaki ni yalo veilecayaki, ka rawa ni vakalevutaka na nuiqawaqawa ki na so na gone.

• Vakayagataka na veika rairai. Sa rawa ni yaga vei ira na gone vakaleqai tu vakavuli se bolei tu vakaitovo na veika rairai, vaka na iyaloyalo eso e vakaraitaka tu na itovo matau me vaka na laveti ni ligana e dua ni bera ni sauma e dua na taro.

• Kila deivaki na vuna e yaco kina na itovo veibolei eso. Vulica na veika baleta na vakaleqai se ituvaki eso e rawa ni vakayarayarataka na gone me vakaveitaliataki koya. Yadrava vagumatua na ka e sa yaco tiko ni dau basika na itovo veibolei eso. Navuca ena masumasu na sala me vakavinakataka na ituvaki e rawa ni tokoni vinaka cake kina na gone.