Qasenivuli ni Lalai kei na gone

Dua na iVakarau ni Veivakavulici

O na raica ena ivurevure oqo ni tokaruataki tu na ivakarau ni tolu na iwalewale oqo ena i dusidusi yadua: sureta na veiwasei, vakavulica na ivunau, kei na vakauqeta na vuli e vale. Ena vuqa na gauna, ni o veivakavulici, ena rairai veitaqavi na veitiki ni vakarau oqo se duatani tu na kena ituvatuva. Me ivakaraitaki, vakasamataka ni veiwasei sa dua na madigi ni kena vakatavulici na ivunau, kei na vakatavulici ni ivunau sa dodonu me okati kina na veisureti ni veiwasei. Vakakina, na vakauqeti ni vuli e vale e rawa ni vakayacori ena dua na veivosaki vakalasi. Raica me yaco vakataki koya ga na veisau eso ena ivakarau oqo, ni muri tu na veivakauqeti ni Yalotabu me sotavi na nodra gagadre na gone o vakavulica.

Sureta na Veiwasei

Vaka tiki ni kalasi kece sara, sureti ira na gone me ra wasea na nodra nanuma, raititobu, kei na veika era sotava ena ivakavuvuli eso o vakatavulica tiko. Na ka era tukuna sa rawa ni oka kina na veika era a sotava ni ra vuli tiko e vale. O rawa talega ni railesuva na ka era a vulica ena macawa sa oti ka taroga se sa vakayarayarataka vakacava na nodra bula.

Vakavulica na iVunau

Sa rawa ni vukei iko na Lako Mai, Mo Muri Au—Me Baleta na Tamata Yadua kei na Matavuvale mo kila vakavinaka cake nai vunau o na vakavulica vei ira na gone. Vakasamataka na tikina, vosacavuti, veika e sotavi, taro, kei na ivurevure cava tale ni ivolanikalou o rawa ni wasea me vukea na nodra kila matua na gone ka cakacakataka nai vakavuvuli ni kosipeli era sa vulica. Vukei ira me ra vakila na veivakauqeti ni Yalo Tabu ni vakadinadinataka tu o Koya na ka dina. Vakaraica na sala maqusa ka veivakauqeti eso me vukei ira ni taleitaka tu na ka era sa vulica tiko.

Ena vakasama eso ni kena vakayagataki na sereivakatagi me vakavulici kina nai vunau, raica na wase “Vakayagataki ni Sereivakatagi me Vakavulici na iVunau” kei na “Nodra Vukei na Gone ni Vulica ka Nanuma na Sere ni Lalai kei na Serenilotu” ena ikuri ni vakamacala ni volavakarau oqo.

Vakauqeta na Vuli e Vale

Baleta ni sa yavutaki e vale na vulici ni kosipeli, sa dua na nomu itavi bibi vaka qasenivuli ni Lalai o ya na vakauqeti ni vuli e vale. O na vukei ira vakacava na gone ni wasea ki na nodra matavuvale na ka era sa vulica ena kalasi? O na vakauqeti ira vakacava na gone kei na nodra itubutubu me ra tomana tikoga na vulici ni Veiyalayalati Vou e vale?