ira na gone ena kalasi ni Lalai

Vakayagataki ni Lako Mai, Mo Muri Au—Me Baleti Ira na Lalai

Vakavakarau ni Veivakavulici ena Lalai

Na vuli ni tamata yadua kei na matavuvale e vale sa dodonu me usutu ni kena vulici ni kosipeli. E sa dina oqo kivei iko kei ira na gone o vakavulica. Ni ko vakarau mo veivakavulici, tekivu ena veika o sotava vakai iko ena ivolanikalou. Na vakavakarau bibi duadua vei iko ena yaco ni o bulataka na kosipeli, vakasaqara na ivolanikalou, ka segata na veivakauqeti ni Yalo Tabu.

Na Lako Mai, Mo Muri Au—Me Baleti Ira na Tamata Yadua kei na Matavuvale e sa dua na tiki bibi ni nomu vuli vakai iko kei na nomu vakavakarau mo veivakavulici. Ena vukea mo rawata e dua na kilamatata titobu cake ni ivakavuvuli vakaivunau e kunei ena ivolanikalou. Lako Mai, Mo Muri Au—Baleti Ira na Lalai ena vakarautaka na itaviqaravi me baleta e vuqa na ivolanikalou kei na italanoa eso era dau sureti na gone me ra vulica mai vale ena loma ni macawa.

Ena nomu gauna ni vakavakarau, ena basika mai vei iko na vakasama kei na veivakauqeti eso me baleti ira na gone o vakavulica. O na ciqoma na raitaudonu eso ni sala ena vakalougatataka kina na nodra bula na ivakavuvuli ni ivolanikalou eso. O na tuberi mo vakauqeti ira me ra raica na veivakavuvuli o ya ni ra vulica vakai ira kei na nodra matavuvale na ivolanikalou.

vulica tiko na ivolanikalou na marama

Vakasama Eso ni Veivakavulici

Ni o vakavakarau voli mo veivakavulici, o na rairai rawata na ikuri ni veivakauqeti ena nomu vadikeva na ituvatuva ni vuli ena ivurevure oqo. Kakua ni raica na veivakasama oqo me idusidusi muri vakamatailalai ia me ra sa vakatutu ga me vakacaudreva na nomu vakauqeti vaka iko. O sa kilai ira na gone oqo — ka na yaco mo kilai ira vinaka cake sara me vaka ni o na dau veitaratara vata kei ira ena kalasi. Sa kilai ira talega na Turaga, ka na vakauqeti iko o Koya ena sala uasivi eso mo vakavulici ka vakalougatataki ira kina.

E tiko e vuqa tale na ivurevure mo na vakayagataka ni ko vakavakarau, oka kina na vakasama eso ena Lako Mai, Mo Muri Au—Me Baleti Ira na Tamata Yadua kei na Matavuvale kei na mekasini ni Lotu. Me baleta na itukutuku tale eso ni veika oqo kei na ivurevure tale eso, raica na “iKuri ni iVurevure ni Vakavulici ira na Gone” ena ivurevure oqo.

Eso na Ka me Vakasamataki Tiko

• Ena veigauna kece o sotavi ira na gone, navuca na sala eso o rawa ni vukei ira kina me ra vakila na loloma ni Tamada Vakalomalagi kei Jisu Karisito ka kidava na veivakauqeti ni Yalo Tabu.

• Sa itavi levu duadua ni itubutubu me ra vakavulica na luvedra. Vaka qasenivuli, sa dua na nomu itavi bibi mo tokona, vakauqeta, ka tara cake na vulici kosipeli ena itikotiko. Dau qarauni ira vinaka na gone era sega ni dau vakavulica na nodra itubutubu na kosipeli ena nodra itikotiko. Dau okati ira taucoko na gone ena veivosakitaki ni kosipeli, veitalia na kedra ituvaki vakaitikotiko.

• Sa vinaka na veivakatokaruataki. E dau mana cake nodra vulica na dina eso vakosipeli na gone ni ra dau vakavulici vakaveitaravi na dina oqo ena veimataqali itaviqaravi eso. Kevaka o raica ni sa mana vei ira na gone e dua na itaviqaravi vakavuli, navuca mo tokaruataka, vakauasivi ke o vakavulici ira tiko na gone sobu. Sa rawa talega ni o railesuva e dua na itaviqaravi mai na dua na lesoni sa oti.

• Sa vinakati iko na Tamada Vakalomalagi mo rawaka vaka qasenivuli. Sa vakarautaka tu o Koya e vuqa na ivurevure me vukei iko, okati kina na soqoni ni matabose ni qasenivuli. Ena vei soqoni oqo ena rawa mo veitalanoataka kina kei ira eso tale na qasenivuli na vei bolebole o sotava tiko. Sa rawa talega mo veivosakitaka ka vakatovotovotaka na ivakavuvuli eso ni veivakavulici va-Karisito.

• Kevaka o vakavulici ira tiko na gone sobu ka gadreva na ikuri ni veivuke, raica na “Sotavi na Nodra Gagadre na Gone Sobu” ena ivurevure oqo.

Na ivurevure ni vuli oqo e oka kina na vakavulici ni ituvatuva ni veimacawa ena loma ni yabaki. Ena Sigatabu eso e sega ni dau vakayacori kina na Lalai ena vuku ni koniferedi raraba, koniferedi ni iteki, se dua tale na vuna, era sa vakauqeti na matavuvale me ra tomana tikoga na wiliki ni Veiyalayalati Vou e vale me vaka na idusidusi sa vakarautaki tu ena Lako Mai, Mo Muri Au—Me Baleti Ira na Tamata Yadua kei na Matavuvale. Kakua ni leqataka na lesoni eso o calata; vakavulica na ituvatuva vakamacawa sa lesi.