Wase 3
Sucu o Joni na Dauveipapitaiso
A kaya o Keperieli na agilosi vei Meri ni na vakasucuma tale tikoga o Ilisapeci e dua na gonetagane. Erau veiwekani o Meri kei Ilisapeci.
A qai gole o Meri ka laki sikovi Ilisapeci. A kaya kina na Yalo Tabu vei Ilisapeci ni o Meri sa na tinai Jisu Karisito. Rau sa vakavinavinakataka kina na Kalou o Meri kei Ilisapeci ni sa vakalougatataki rau. A laki tiko o Meri vei Ilisapeci me tolu na vula. Sa qai lesu o Meri ki Nasareci na nona itikotiko.
Sa sucu na luvei Ilisapeci gonetagane. Era a marau vakalevu na nona itokani kei na nona matavuvale. Era a nanuma tiko me sa vakayacani ga na gone vei tamana, o Sakaraia. Ia a qai tukuna o Ilisapeci me vakatokai na yacana ko Joni. Era a kurabui kece kina.
Era a tarogi Sakaraia na tamata na yaca cava me vakatokai kina na gone, a se galu tu ga o Sakaraia, ka a qai vola, “A yacana ko Joni.”
Sa qai vosa rawa tale o Sakaraia. A vakasinaiti o koya ena Yalo Tabu. A kaya vei ira na tamata ni sa na vakarau sucu o Jisu Karisito ka na vakarautaki ira na tamata o Joni me baleti Koya.
A tubu cake sara o Joni me dua na parofita cecere. A vakavulici ira na tamata me baleti Jisu Karisito.