Wase 42
Na Cauravou Vutuniyau
E dua na siga a lako yani e dua na cauravou me laki taroga vei Jisu na cava me cakava me lako rawa kina ki lomalagi.
Sa qai kaya vua na iVakabula me vakarokorokotaki tamana kei tinana ka me kakua ni vakamatea e dua se lasu se butako. A kaya mai na cauravou vutuniyau ni sa dau vakayacora tikoga na vunau oqo.
Sa qai kaya o Jisu vua na cauravou oqo ni sa vo tiko e dua na ka me cakava. O ya me na volitaka na nona iyau kecega ka solia na kena ilavo vei ira na dravudravua. Sa oti o ya me na qai muri Koya na cauravou.
A sega ni vinakata na cauravou vutuniyau oqo me solia na nona iyau kecega. Sa domona vakalevu cake o koya na nona iyau ka vakalailai na Kalou. A sa lako na cauravou ni sa rarawa na yalona.
Sa kaya na iVakabula vei ira na Nona tisaipeli ni sa dredre vei ira na tamata era domona na iyau me ra lako i lomalagi. Era sa sega ni kila na ka oqo na tisaipeli. Era a taroga o cei ena rawa ni laki tiko vata kei na Kalou. A kaya o Jisu ni o ira sa nuitaka na Kalou ka lomani Koya vakalevu cake mai na veika kecega, sa rawa me ra na laki tiko vata kei Koya e lomalagi.
Marika 10: 23–30 (raica na ivakamacala e botona 27 a)