Ni Oti na Veiyalayalati Vou

Era sa cakacaka vakaukauwa na iliuliu ni Lotu me ra vakavulica vei ira na tamata na veika baleti Jisu Karisito. Era sikovi ira na Yalododonu ka volavola vei ira. Era sa lewena na Lotu na tamata mai na vuqa na vanua. Era sa sega ni vinakata na tamata ca me ra vakabauti Jisu Karisito o ira na tamata.

Cakacaka 6:2–4, 7; 11:19–21

Era sa vinakata na tamata ca me ra veisautaka na ivunau. Era sa vakarorogo vei ira eso na Yalododonu. E lewelevu era sa sega tale ni vakabauti Jisu ka ra sa sega ni muria na Nona ivunau.

Kalatia 1:6–8; Taito 1:10–11; 1 Joni 2:18–19

Era sa vakamatei e lewelevu na iApositolo kei ira na Yalododonu. Sa sega tale ni dua e vo me na liutaka na Lotu. Sa kau tani mai vuravura na idola ni matabete. Era sa sega na parofita me dusimaki ira na tamata. Sa sega tale ni tiko e vuravura na Lotu i Jisu Karisito. Sa parofisaitaka oti tu mai o Pita kei Paula na iApositolo ni na yaco na ka oqo.

Maciu 23:34; 24:8–10; Roma 8:36; 1 Korinica 4:9–13; 1 Pita 4:12; Jisu na Karisito, 745–46

Sa sivi yani e drau vakadrau na yabaki. Ka sa vuqa sara na veimataqali lotu. E sega ni dua vei ira e tiko na nodra iApositolo se matabete ni Kalou. E sega ni dua vei ira e Lotu i Jisu Karisito. Ia era a kaya na parofita ni oti e vuqa na yabaki ena lesu tale mai na Lotu i Jisu Karisito ki vuravura.

Cakacaka 3:19–26; 2 Cesalonaika 2:1–4; 2 Timoci 4:3–4

Ena 1820 e dua na cauravou na yacana o Josefa Simici a via kila na lotu cava e Lotu i Jisu Karisito. A gole yani ki na veikau volekata na nona vale ka laki masu. Sa kerea vua na Kalou me tukuna vua na lotu cava e dina.

Josefa Simici—Ai Tukutuku 1:3, 5, 10, 14–15

Rau sa qai rairai mai na Tamada Vakalomalagi kei Jisu Karisito vei Josefa Simici. Sa kaya na iVakabula vei Josefa me kakua ni lewena e dua vei ira na lotu o ya baleta ni sega ni dua vei ira e Nona Lotu.

Josefa Simici—Ai Tukutuku 1:17–19

Sa lewa kina na Kalou me kauta lesu mai na Lotu i Jisu Karisito ki vuravura vei Josefa Simici. Sa tala mai kina na Kalou eso na agilosi me ra mai vakatikora vei Josefa Simici na matabete. Sa vukei Josefa o koya me vakadewataka rawa na iVola i Momani. Ena ika 6 ni Epereli, 1830, sa tauyavutaki tale na Lotu i Jisu Karisito e vuravura.

Josefa Simici—Ai Tukutuku 1:33, 66–75

Me vaka ga ni a digitaka o Jisu e Le Tinikarua na iApositolo ena gauna a tiko kina e vuravura, sa vukei Josefa Simici kina na Kalou me digitaka e Le Tinikarua na iApositolo me vukei koya ena kena liutaki na Lotu. O ira na turaga oqo sa soli tu vei ira na kaukauwa me ra vakavulica na kosipeli ka cakamana vakakina.

Vunau kei na Veiyalayalati 102:3; 107:22–23, 35

E vinakata o Jisu me ra kila na tamata kecega na veika e baleta na Nona Lotu. A kaya vei Josefa Simici me talai ira yani na daukaulotu me ra laki vakavulica vei ira na tamata kecega na Lotu i Jisu Karisito ni Yalododonu Edaidai.

Vunau kei na Veiyalayalati 1:18, 30

Na Lotu i Jisu Karisito ni Yalododonu Edaidai sai koya ga na lotu a tauyavutaka o Jisu ni a se tiko e vuravura.

Vunau kei na Veiyalayalati 115:4