Wase 50
iVakavuvuli Tale Eso ena Kana Vata
Ni ratou sa kana oti, sa kaya o Jisu vei iratou na Nona iApositolo me ratou veilomani me vaka sa lomani iratou o Koya. Kevaka eratou na cakava oqo, era na kila na tamata ni ratou sa Nona tisaipeli.
A kaya o Koya ni kevaka eratou sa lomani Koya na iApositolo, me ratou talairawarawa ki na Nona ivunau. Sa yalataka vei iratou na isolisoli ni Yalo Tabu. Ena vakavulici iratou na Yalo Tabu ena veika kecega me ratou kila. Na Yalo Tabu ena vukei iratou na iApositolo me ratou nanuma tiko na veika a vakavulica vei iratou o Jisu.
Sa kaya o Jisu ni sa vaka e dua na vaini ko Koya. O iratou na Nona tisaipeli eratou sa vaka na taba ni vaini. Na tabana duadua ga sa sema vinaka ki na vaini ena vuavuai vinaka.
Sa yalataka o Jisu vei iratou na Nona iApositolo ni kevaka eratou na bulataka na kosipeli, ena vinaka na vuadratou (nodratou cakacaka). Kevaka eratou na sega ni muri Koya, eratou sa na vaka na tabana sa musu laivi mai na vuna ka sega ni vua.
A masu o Jisu Karisito me ratou na duavata na Nona iApositolo. A vinakata o Koya me ratou vakavulici ira na tamata me ra vakabauti Koya ka kila ni o Tamada Vakalomalagi e lomani ira.
Eratou sa qai lagata o Jisu kei iratou na iApositolo e dua na sere ni lotu ka gole yani.