Wase 22

Na Tamata Yalo Velavela

E dua na tamata e dau tiko voli ena ibulubulu volekata na Wasawasa e Kalili sa dau curumi koya na yalo velavela ka kaukauwa na ivakarau ni nona bula. O ira na tamata era sa vesuki koya ena sinucodo me ra tarovi koya, ia a gutuva na sinucodo.

Marika 5: 1– 4

E dau tiko na tamata oqo ena veiulunivanua kei na qara ena siga kei na bogi taucoko. E dau qoqolou vakalevu ka tavatava na yagona ena vatu.

Marika 5:5

Ena dua na siga eratou sa takosova yani ena waqa o Jisu kei iratou na Nona tisaipeli na Wasawasa e Kalili. Ni sa sobu mai waqa na iVakabula, sa cici yani Vua na tamata oqo.

Marika 5: 1–2, 6

Sa vakarota o Jisu na yalo velavela me biuta na tamata oqo. Sa kila na yalo velavela ni o Jisu sa Luve ni Kalou. Sa kerei Jisu me kua ni vakararawataki koya.

Marika 5: 7–8

Sa taroga na iVakabula ki na yalo velavela se o cei na yacana, a sauma mai, “A yacaqu o iVavakoso,” a kena ibalebale na lewe vuqa. Sa lewe levu na yalo velavela e curuma tu na tamata oqo. Era a kerei Jisu me ra laki curu ga ki na yagodra na vuaka era tu voleka e kea.

Marika 5: 9–12

A vakadonuya o Jisu. Era sa qai biuta na tamata o ya na yalo velavela ka curumi ira na vuaka e volekata ni 2,000. Era sa qai cici sobu yani na vuaka ena baba ki na wasawasa ka ra luvu kina.

Marika 5:13

Ko ira sa vakani ira na vuaka era sa cici yani ki na korolevu ka laki tukuna na veika sa yaco. Era sa lako mai na tamata ka raici Jisu kei koya na tamata voravora o ya. Ia sa sega tale ni kaukauwa na ivakarau ni tamata o ya.

Marika 5: 14–15

Na ka oqo era sa rerevaki Jisu kina na tamata. Era sa kerei Koya me lako tani. Sa lesu o Koya ki na waqa.

Marika 5: 15–18

Sa qai via lako vata kei Koya na tamata sa vakabulai o ya. Sa tukuna vua na iVakabula me gole ga ki nodratou vale ka tukuna vei ira na nona itokani na veika sa yaco vua.

Marika 5:18–19

Sa laki tukuna vei ira na nona itokani, ka ra kurabui sara ena kaukauwa cecere i Jisu.

Marika 5:20