Wase 47
Goneyalewa e Lewe Tini
A tukuna o Jisu e dua na italanoa ni tini na goneyalewa ka ra lako ki na dua na soqo ni vakamau. Era sa laki waraka tiko na tagane me vakawati me lako mai me na vakacurumi iratou ki loma. Eratou sega ni kila na gauna ena yaco mai kina o koya.
E a tiko na nodratou cina vakawaiwai na goneyalewa e tini oqo. E lewe lima vei iratou na goneyalewa oqo eratou vuku. E tiko tale eso na ikuri ni nodratou waiwai.
Eratou sa sega ni vuku na vo ni lima tale na goneyalewa. Sa tiko walega na waiwai ena nodratou cina.
Sa balavu sara na gauna ka se bera tikoga mai na tagane me vakawati. Sa maca mai na waiwai e tiko ena loma ni cina. O iratou na goneyalewa vuku eratou sa vakatawana tale na nodratou cina ena waiwai. O iratou na goneyalewa sega ni vuku eratou sa qai laki voli waiwai mai.
Ni ratou sa gole, sa yaco mai na tagane me vakawati. Sa qai vakacurumi iratou na goneyalewa vuku lewe lima ki na soqo ni vakamau.
Ni ratou sa lesu mai na lewe lima na goneyalewa sega ni vuku, sa sogo tu na katuba. Eratou sa sega ni curu rawa ki na soqo ni vakamau.
O Jisu sa vakataka na tagane me vakawati ena italanoa oqo. O ira na lewe ni Lotu sa vakataki iratou na goneyalewa lewe tini. Ni sa lesu tale mai o Jisu, eso na lewenilotu era sa vakavakarau tu. Era sa na vakamuria tiko mai na vunau ni Kalou. Eso era na sega tu ni vakarau. Era na sega ni rawa me ra na tiko vata kei na iVakabula ni sa lesu tale mai.
Maciu 25:13; Vunau kei na Veiyalayalati 45:56–57; 88:86, 92; O Jisu na Karisito, 576–80