Wase 29
Lako e Dela ni Wai o Jisu
Ni oti na Nona vakani ira na 5,000, sa gole o Jisu ki na ulunivanua me laki masu. Era a vodo ena dua na waqa na Nona tisaipeli me ra kosova na Wasawasa e Kalili. Ni sa bogi mai, sa tekivu liwa kaukauwa na cagi, ka sa tubu na biau.
Ni sa bogi levu, sa lako mai o Jisu vei iratou na Nona tisaipeli. Sa taubale o Jisu e dela ni wai me lako ki na waqa.
Era sa raici Koya na tisaipeli ni sa lako e dela ni wai. Eratou sa rere kina. Eratou nanuma ni sa dua na yalo o Koya. Sa kaci yani o Jisu vei iratou, “Koi au ga; dou kakua ni rere.”
Sa vinakata o Pita me lako talega e dela ni wai. Sa kacivi Pita o Jisu me lako Vua. Sa sobu mai na waqa o Pita. Sa tekivu taubale yani e dela ni wai o Pita vua na iVakabula.
Me baleta ga ni sa liwa kaukauwa sara tiko na cagi, sa rere o Pita. Sa tekivu me dromu e wai o koya ka sa kaci yani vei Jisu me vakabulai koya.
Sa taura na iVakabula na ligai Pita. Sa tarogi Pita na cava e lailai kina na nona vakabauta.
Ni rau sa gole yani o Jisu kei Pita ki na waqa, sa ruru sara na cagi. Era sa qai vakacaucautaka na iVakabula na tisaipeli. Era sa kila kina ni sa Luve ni Kalou o Koya.