Wase 48
Na Taledi
A tukuna o Jisu vei iratou na Nona tisaipeli na italanoa ni dua na tamata a solia vei ira na nona tamata cakacaka eso na taledi. Na taledi o ya e dua na wase levu ni ilavo.
Sa solia na tamata oqo vua e dua na tamata cakacaka e lima na taledi. Sa solia vua na kena ikarua e rua na taledi. Sa solia vua na kena ikatolu e dua na taledi. Sa qai lako na tamata oqo ki na dua na ilakolako yawa.
Na tamata cakacaka e lima na nona taledi sa cakacaka sara vakaukauwa. Sa rawata mai kina e lima tale na taledi. Sa yaco kina me tini na nona taledi.
Sa cakacaka talega vakaukauwa na tamata cakacaka e rua na nona taledi. Sa rawata mai kina e rua tale na taledi. Sa yaco kina me va na nona taledi.
Na tamata cakacaka e dua na nona taledi sa laki buluta ena qele. Sa rere ni na rawa ni vakayalia. A sega ni cakacakataka me rawata kina eso tale na taledi.
Ni sa lesu mai na tamata o ya, sa tarogi iratou na tamata cakacaka na cava eratou sa cakava ki na nona taledi.
Na imatai ni tamata cakacaka a kauta mai vua e tini na taledi. Sa marau kina na tamata o ya. Sa lesia kina na tamata cakacaka o ya me turaga ni veika e vuqa ka me reki kina.
Na ikarua ni tamata cakacaka a kauta mai vua na tamata o ya e va na taledi. Sa marau talega kina na tamata o ya. Sa lesi koya talega vakakina me turaga ni veika e vuqa ka tukuna vua me rekitaka.
Na ikatolu ni tamata cakacaka sa solia tale ki na tamata o ya na taledi a laki buluta tu. Sa sega ni marautaka na tamata o ya. E kaya ni tamata vucesa na tamata cakacaka o ya. A dodonu me laki cakacakataka vakaukauwa me rawata eso tale na taledi.
Sa qai taura mai na tamata o ya na taledi mai vua na tamata cakacaka o ya ka solia vua na imatai ni tamata cakacaka. Sa qai vakatala laivi na tamata cakacaka vucesa o ya. Na tamata e tukuni tiko ena italanoa sa vakataki Jisu. Eda sa vakataki iratou na tamata cakacaka. Ena lewai keda o Jisu ena sala eda sa vakayagataka tiko kina na isolisoli sa solia vei keda.