Wase 57
Vakamatei Sitiveni o Ira na Tamata Ca
E lewelevu na iliuliu ni Jiu era nanuma ni sa na sega na cakamana ni sa mate o Jisu. Ia, eratou a cakamana talega na iApositolo. E lewelevu na tamata era a vakabauti Jisu Karisito ka lewena na Lotu.
Na ka oqo a vakavuna me ra cudru sara na iliuliu ni Jiu. Era sa qai biuti Pita kei Joni ki valeniveivesu. Sa qai vakamatei o Jemesa na iApositolo ena lewa nei Eroti Akaripa na Tui.
Eratou sa qai kaciva na iApositolo e vitu na tagane me veivuke ena kena liutaki na Lotu. E dua vei iratou na yacana o Sitiveni. Sa lako ka vakavulica na kosipeli vei ira e lewelevu na tamata. Eso na tamata ca era sa qai lasutaka ni o Sitiveni a vosa vakacacataka na lawa ni Jiu. Era sa qai vesuki koya me laki lewai vei ira na iliuliu ni Jiu.
A kaya kina o Sitiveni vei ira na iliuliu oqo ni ra sa tamata ca. Sa kaya ni ra sa vakamatei Jisu Karisito, na Luve ni Kalou.
A sa rai yani ki lomalagi o Sitiveni ka raica na Tamada Vakalomalagi kei Jisu Karisito. Ni sa tukuna vei ira na iliuliu na ka sa raica, era sa cudru sara vakalevu.
Era sa qai kauti Sitiveni ki na sauka ni koro me ra virilaka ka vakamatei koya kina. Era sa qai biuta na nodra kote ena ruku ni yavana e dua na cauravou na yacana o Saula. Ni sa vakarau mate o Sitiveni, sa kerea vua na Kalou me kauta na yalona ki lomalagi. Sa kerea talega vua na Kalou me vosoti ira era sa vakamatei koya. Sa qai mate o koya.