Wase 55
Liutaka na Lotu o Iratou na iApositolo
Ni oti na nona tucaketale, a tiko vata kei iratou na Nona iApositolo o Jisu me 40 na siga. A vakavulica vei iratou e levu na ka me baleta na kosipeli kei na Nona Lotu.
Sa tukuna me ratou vakavulica na kosipeli vei ira na tamata kecega. Sa kaya talega ni sa na vakarau biuti iratou, ia ena lako mai na Yalo Tabu me vukei iratou.
Eratou sa raici Jisu na iApositolo ni sa kau cake ena o ki lomalagi. E rua na agilosi sa vakaisulu vulavula rau sa kaya vei iratou na iApositolo ni na lesu tale mai lomalagi o Jisu ena dua na siga.
Ena gauna o ya eratou sa qai liutaka tiko na iApositolo na Lotu i Jisu Karisito e vuravura. E kena peresitedi o Pita, ka rau nona daunivakasala o Jemesa kei Joni.
Maciu 16:18–19; Vunau kei na Veiyalayalati 81:1–2; O Jisu na Karisito, 219–20
Eratou sa vo ga e tinikadua na iApositolo— sa mate o Jutasa. Sa kaya o Tamada Vakalomalagi vei iratou na iApositolo me ratou digitaki Mataiasi me dua vei iratou na iApositolo Le Tinikarua. Eratou sa yadua na iApositolo na ilesilesi ena matabete.
O iratou na iApositolo kei na tisaipeli tale eso era sa vakabauta sara na Turaga. Era talairawarawa ki na Nona ivakaro. Era veilomani vakaiira.
E levu na ka eratou a cakava rawa na iApositolo ena matabete kei na kaukauwa ni Yalo Tabu. Eratou vakabulai ira na tauvimate ka ra daukaulotu talega. Eratou vakavulica na itukutuku kei Jisu Karisito kei na Nona kosipeli. E lewelevu era sa vakabauta na nodratou vosa na iApositolo ka ra sa lewena na Lotu. Era vakatokai na lewe ni Lotu me ra Yalododonu.