Me Da Rokovi Koya, mai vei Dana Mario Wood

9–15 ni Janueri

Maciu 2; Luke 2

Keitou Sa Lako Mai me Cuva Vua

O ira na gone o vakavulica era luvena tagane kei na yalewa talei na Tamada Vakalomalagi. Kerei Koya me vukei iko ni ko vakasaqara mo vakavulici ira mai na ivolanikalou. E rawa ni tuberi iko o Koya ki na ivakavuvuli e dodonu mo vakabibitaka ka rawa ni vakauqeti iko ena vakasama eso ni itaviqaravi ka na yacovi ira yani na Luvena.

Sureta na Veiwasei

Kerei ira na gone me ra tukuna vei iko na veika era kila baleta na sucu nei Karisito. Na tiki ni italanoa cava era dau taleitaka duadua?

Vakavulica na iVunau: Gone Sobu

Luke 2:1–14

A sucu ko Jisu.

A biuta ko Jisu na Nona itikotiko mai vei Tamada Vakalomalagi me mai sucu e vuravura me rawa kina ni noda iVakabula. O na vukei ira vakacava na gone me ra nanuma na italanoa ni sucu nei Karisito?

iTaviqaravi e Rawa ni Caka

• Ni o wilika na italanoa ni sucu i Karisito, sureti ira na gone me ra matanataka vakataki ira na italanoa, se vakayagataka na tabana ni itaviqaravi ni macawa oqo mo railesuva na italanoa. (Raica talega na “Wase e 5: Sa Sucu o Jisu Karisito,” e Na iTukuni ena Veiyalayalati Vou, 13–15, se na kena vidio ena ChurchofJesusChrist.org.)

• Ke tiko e dua na nomu, kauta mai na iVakatakarakara ni Sucu, ka sureti ira na gone me ra tuva vakadodonu na veitikina ni o tukuna tiko vei ira na italanoa ni sucu i Jisu Karisito. E rawa talega ni o vakaraitaka na iyaloyalo ni iVakatakarakara ni Sucu (raica, me ivakaraitaki na, ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale). Dusia na tamata duidui ena iVakatakarakara ni Sucu ka sureti ira na gone me ra wasea na veika era kila baleta na tamata yadua.

• Ni lagata vata na nodra sere taleitaki na gone baleta na sucu i Jisu. Ni o kitaka vakakina, vaqara na madigi mo cavuta kina na nomu ivakadinadina me baleta na iVakabula. Sureti ira na gone mera wasea na vuna era lomani Jisu kina.

Maciu 2 :1–12

Au rawa ni solia na iloloma vinaka vei Jisu.

Ratou a solia vei Jisu na Tamata Vuku na iloloma koula, na ka boi vinaka, kei na mura. O na vakayagataka vakacava na italanoa oqo mo vakavulica vei ira na gone ni rawa me ra solia talega vei Jisu na iloloma eso—me vaka na loloma, veiqaravi, kei na talairawarawa?

iTaviqaravi e Rawa ni Caka

• Vakaraitaka e dua na kedratou iyaloyalo na Tamata Vuku ni o railesuva na kedratou italanoa, e kunei ena Maciu 2:1–12, vata kei ira na gone. E rawa ni o vakaraitaka na iyaloyalo Wise Men Present Gifts (ChurchofJesusChrist.org).

• Ologa vakailoloma eso na iyaloyalo se iyaya ka matataka na iloloma eso e rawa ni da solia vei Jisu. Sureti ira na gone me ra vukei iko ni cereka na iloloma eso ka veivosakitaka na ivakarau eda solia kina vua na iVakabula.

• Vukea na gone yadua me droinitaka se vola na lisi ni ka ni loloma e rawa ni solia vei Jisu, me vaka “me dua na itokani vinaka” se “na masu.” Sureti ira na gone me ra wasea nodra lisi ena kalasi ka digitaka e dua na “ka ni loloma” era na solia vei Jisu nikua.

Luke 2:40–52

O Jisu a gone lailai talega me vakataki au.

Na vulici ni bula vagone ni iVakabula sa rawa ni vukei ira na gone o vakavulica me ra kilai Koya. Tarogi ira na gone na cava e rawa ni ra vulica mai na veitikina oqo ena ivakarau e rawa ni ra vakataki Jisu kina ena gauna oqo.

iTaviqaravi e Rawa ni Caka

• Sureta mai ki na kalasi e dua na itabagone ena tabanalevu me wasea na italanoa kei Jisu ni veivakavulici tiko ena valetabu ni se cauravou.

• Kerei ira rawa toka e vica na gone me ra kauta mai na kedra itaba vaka gonedramidrami me ra veiwaseitaka. Tarogi ira se sa vakaevei beka nodra tubu. Wasea eso na sala a tubu kina o Jisu (raica na Luke 2:40, 52). Lagata vata kei ira na gone na “Jisu ni a Gonelailai” (iVolanisere ni Gonelalai, 45) se dua tale na sere baleta na iVakabula.

• Wilika na Luke 2:52, ka vakamacalataka na ibalebale ni “vuku” kei na “yagona”. O na rairai kerei ira na gone me ra cakava eso na ivukivuki e vakaraitaka na ibalebale ni tubu cake ena vuku kei na vinakati vakalevu cake tikoga mai vua na Kalou kei na tamata tale eso. Me ivakaraitaki, e rawa ni ra matanataka ni ra wilika tiko e dua na ivola se vukea tiko e dua e vakaleqai tu.

Vakavulica na iVunau: Gone Qase Cake

Luke 2:1–21; Maciu 2:1–12

Era a tukuna rawa tu na parofita makawa na sucu ni iVakabula.

Era a sa namaka tu na parofita kei na tamata vakabauta ena vicavata na senijiuri na sucu ni iVakabula. Na kilai matata ni dina oqo sa rawa ni vukei ira na gone ni rawata na yalo ni vakavinavinaka titobu me baleta na bula kei na ilesilesi ni iVakabula.

iTaviqaravi e Rawa ni Caka

• Kerei ira na gone me ra tukuna eso na ka era dau namaka tu, me vaka e dua na siganisucu se vakacagicagi. Me ra wilika na gone na Ilamani 14:2–5 me ra kunea e dua na ka era a dau namaka tu na parofita.

• Ni wilika vata eso na parofisai ni nona sucu na iVakabula (raica na Aisea 7:14; 9:6; 1 Nifai 11:18; Ilamani 14:5). Vukei ira na gone me ra tuva na matailalai ni veiparofisai oqo ka raica na kedra vakataucokotaki ena Luke 2:1–21 kei na Maciu 2:1–12.

• Sureti ira na gone me ra droinitaka e dua na iyaloyalo ni dua na ka mai na Maciu 2:1–12 se Luke 2:1–21 ka wasea na vuna era vakavinavinakataka kina na sucu nei Jisu.

Sa Vakarokorokotaka o Simioni na Gone na Karisito, mai vei Greg K. Olsen

Luke 2:40, 52

A sa tubu cake ko Jisu “e na vuku kei na yagona talega, a sa vinakati koya vakalevu cake tikoga na Kalou kei ira talega na tamata.”

Me vakataki Jisu, e tiko e dua na itavi bibi me ra vakarautaki ira kina na gone o vakavulica. Na cava e rawa ni ra vulica mai na ivakaraitaki nei Jisu?

iTaviqaravi e Rawa ni Caka

• Ni o wilika na Luke 2:40, 52, tukuna vei ira na gone me ra vakarogoca na veika a cakava ko Jisu. Sureti ira na gone me ra wasea na sala eso era sa tubu kina me tekivu mai na nodra se lalai. Wasea na veika o sa sotava ena nomu vulica vakalalai na kosipeli. Wasea nomu ivakadinadina ni i Vakabula.

• Vakacavara na itaviqaravi e vakaraitaka na veimalanivosa ena Luke 2:40, 52. Me ivakaraitaki, e rawa ni o vakarautaka na kedra balavu na gone yadua (“sa tubu cake ko Jisu … ena yagona”) se me ra wasea nodra ivolanikalou taleitaki (“a sa yalomatua mai”). Vukei ira na gone me ra raica na veisala eso era sa tubu tiko kina ka wasea vata kei na nodra matavuvale.

• Ni sa railesuvi oti na Luke 2:40, 52, sureti ira na gone me ra wasea nodra nanuma se a vakaevei tu beka o Jisu ena gauna a yabaki vata kina kei ira o Koya. E a dau vakaevei beka Nona ivakarau vei Tinana? Ira na tacina kei na ganena?

Luke 2:41–52

Au rawa ni muria na ivakaraitaki nei Jisu.

Ni se cauravou sara mada ga, o Jisu a sa veivakavulici tiko ena loma ni valetabu. Me vakaoqori, sa levu tu na ka me ra vakavulica na gone ena nomu kalasi kivei ira ka wavoliti ira tu.

iTaviqaravi e Rawa ni Caka

• Sureta e dua na gone me vakarautaki koya mai me vakalekalekataka na italanoa ena Luke 2:41–52. Me vukea nodra kila na gone na italanoa, vakavulica na ibalebale ni “tiko ena vale nei Tamaqu” (tikina e 49). Me ivakaraitaki, e rawa ni o tukuna vei ira na gone na nomu cakacaka se nodrau nomu itubutubu. Na cava na cakacaka se “bisinisi” nei Josefa, na tamai Jisu vakavuravura? (raica na Maciu 13:55). Na cava na cakacaka nei Tamana Vakalomalagi? (raica na Luke 2:46–49; raica talega na Mosese 1:39).

• Wilika vata kei ira na gone na Luke 2:46–49, ka taroga, “A cakava tiko vakacava o Jisu na ‘bisinisi nei Tamana’?” Vukei ira na gone me ra tuva se droinitaka ena papa na ivakarau e rawa ni ra veivuke kina ni cakava talega na bisinisi nei Tamada Vakalomalagi.

• Me vukei ira na gone me ra yalodei tu me rawa ni, vakataka na gonetagane o Jisu, ni ra vakavulica na kosipeli, vukei ira me ra vakatovotovo ena nodra veivakavulici vakaiira ena dua na ivakavuvuli mai na Me iSakisaki ni iTabagone.

Vakauqeta na Vuli e Vale

Sureti ira na gone me ra vakavulica ena nodra matavuvale e dua na ka era sa vulica me baleta na sucu i Jisu Karisito.

Vakatorocaketaki Noda Veivakavulici

Era dau lomatarotaro na gone ka vuli ena vuqa na sala. Era dau marautaka na gone me ra vuli ena veika vovou ka duidui era sotava. Vakayagataka na itaviqaravi eso ena vukea me ra veitosoyaki, vakayagataka taucoko nodra wakilakila, vakadidike, ka tovolea na veika vovou. (Raica na Veivakavulici ena iVakarau ni iVakabula, 25–26.)