Veivakavulici tiko o Jisu ena ulunivanua

Vunau Tiko o Jisu ena Ulunivanua, mai vei Gustave Doré

13–19 ni Feperueri

Maciu 5; Luke 6

“Dou Sa Kalougata”

Sa ka talei na nomu madigi mo vakavulici ira na gone. Ni o vakarautaki iko vakayalo, ena tuberi iko na Turaga.

ivakatakilakila ni veiwasei

Sureta na Veiwasei

Kerei ira na gone me ra veivosakitaka e dua na ka era a cakava ena macawa oqo me ra wasea na rarama ni Turaga vua e dua—ena ivakaraitaki vinaka beka se vakaraitaki ni loloma kei na yalovinaka.

ivakatakilakila ni veivakavulici

Vakavulica na iVunau: Gone Sobu

Maciu 5:9

Au rawa ni dua na dautataro.

O ira na gone o vakavulica e rawa ni mana sara na nodra veivakayarayarataki mai vale ni ra lomani ira ka yalovinaka vei ira na tani.

iTaviqaravi e Rawa ni Caka

• Wilika na Maciu 5:9 vei ira na gone, ka vakamacalataka ni o ira na dautataro era dau cakava na vanua cava ga me vanua ni sautu, se e vei ga era tiko kina. Vola ena so na tikitiki ni pepa e vica na ituvaki dredre era na rawa ni sotava na gone (me vaka nodra veivalataka na tacidra na iyaya ni vakatatalo). Sureta yadua na gone me digitaka e dua na tikinipepa. Ni o wilika na ituvaki yadua, kerei ira na gone me ra wasea na sala era rawa ni dautataro kina ena ituvaki oya. Se wasea e vica na ituvaki buli ga, ka vukei ira na gone me ra vakatakila ke ra sa dautataro tiko na tamata era okati tu se sega.

• Sureta e vica na itubutubu ni gone me ra taleva nomu kalasi ka wasea na ivakaraitaki eso ni gauna era a dautataro kina mai vale na luvedra.

Maciu 5: 14–16

E vinakata o Jisu meu dua na rarama vei ira na tani.

O ira na gone sobu e rawa ni mana sara nodra veivakayarayarataki vinaka vei ira na tani. E rawa vakacava ni o vakauqeti ira me ra vakacilava yani nodra rarama?

iTaviqaravi e Rawa ni Caka

• Vakaraitaka vei ira na gone e vica na iyaya e solia na rarama, ka vakaraitaka e dua na kedra iyaloyalo na gone. Wilika na Maciu 5:14–16, ka tukuna vei ira na gone ni nodra ivakaraitaki vinaka e rawa ni vaka na rarama vei ira na tani me ra raica. E rawa vakacava ni da vakayagataka noda rarama me da kauti ira mai kina eso vua na Kalou?

• Cinava na lalaga ena dua na i cinalivaliva, ka sureti ira na gone me ra vakamuria na rarama ena matadra. Vakayagataka na rarama me vagolea na matadra ki na dua na iyaloyalo ni iVakabula. E vukei keda vakacava na rarama? E rawa vakacava me da dua na rarama ki vuravura? Ubia na cinalivaliva. Na cava ena yaco kevaka eda sega ni wasea na noda rarama se vunitaka?

• Vunitaka ena loma ni rumu e dua na cinalivaliva, ka bokoca na cina. Me ra tovolea na gone me ra kunea. Railesuva na Maciu 5:15, ka tukuna na vuna me da kakua ni vunitaka kina na noda rarama.

• Vukei ira na gone me ra kunea ka rokataka na kadrala vunitaki eso ena draunipepa ni itaviqaravi ena macawa oqo.

• Lagata vata kei ira na gone e dua na sere me baleta na rarama vei ira na tani, me vaka na “Meu Rarama i Jisu,” “Cila, Cila,” se “Kalokalo Serau” (iVolanisere ni Gonelalai, 38, 96, 84).

E vakavulici ira tiko na tisaipeli o Jisu

Eda rawa ni mamarau ni da bulataka na ivakarau a vakavulica o Jisu.

Maciu 5:44–45

E vinakata o Jisu meu lomana na tamata kecega.

Sa rawa vei ira na gone sobu me ra tekivu bulataka oqo na loloma, kevaka sara mada ga era vakasagai mai vei ira era itabavata se tacidra. Ni o wilika na Maciu 5:44–45, vakasamataka na ivakarau ena yaga kina vei ira na gone o vakavulica na ivakavuvuli ni iVakabula.

iTaviqaravi e Rawa ni Caka

• Cavuta tale na Maciu 5:44 ka vakayagataka na vosa kei na ituvaki eso era na kila na gone ka semati ira kina. Kerei ira na gone me ra wasea na gauna eso era a vakaraitaka kina na loloma vua e dua dina ga ni a dredre. Na cava era a vakila ena veika era a sotava oqori?

• Lagata vakalasi e dua na sere me baleta na lomani ira na tani, me vaka na “Dou Veilomani” (iVolanisere ni Gonelalai, 74). Na cava eda vulica mai na sere oqo me baleta na lomani ira na tani?

• Solia vei ira na gone na utopepa eso e volai tu kina “Au na vakaraitaka noqu loloma vei ira na tamata kecega.” Kerei ira me ra ukutaka na utopepa ka laki vakaliliga toka i nodra vale me ivakananumi ni lomani ira na tani.

ivakatakilakila ni veivakavulici

Vakavulica na iVunau: Gone Qase Cake

Maciu 5:3–12

Au rawa ni mamarau ni’u bulataka na ivakarau a vakavulica o Jisu.

Ni o wilika na Maciu 5:3–12, na vosa kei na malanivosa cava so e vakaibalebale vei iko? Ena vakalougatataki ira beka vakacava na gone o vakavulica na ivakavuvuli oqo?

iTaviqaravi e Rawa ni Caka

• Vola ena papa ni volavola e dua na ivolakabi me rua na kena iyatu, ka vola kina Sa Kalougata … kei na Veivakalougatataki. Sureti ira na gone me ra vaqaqara ena Maciu 5:3–12 ka vakaraica kina na nodra itovonibula o ira ka tukuna o Jisu ni na vakalougatataki kei na veivakalougatataki e yalataka tu vei ira o Koya. Qai vakalewena na ivolakabi ena veika era sa kunea. Veivosakitaka vata kei ira na gone na ibalebale ni itovonibula yadua kei na kena veivakalougatataki veisemati.

• Vola na itovonibula yadua mai na veitikina oqo ena dua na kadi kei na kena veivakalougatataki veisemati ena dua na kadi. Me kena ivakaraitaki, ena kaya e dua na kadi “yalomalua,” ka dua tale ena kaya “taukena na vanua” (tikina e 5). Me ra vakasotara vata na gone na itovonibula kei na veivakalougatataki eso. Kerei ira na gone me ra digitaka e dua na itovonibula mai na veitikina oqo era vinakata me ra taracake.

Maciu 5:9, 21–24, 38–47

Au rawa ni dua na dautataro.

E vakavulica o Jisu ni o ira na dautataro era na vakatokai na luve ni Kalou. O na vakauqeti ira vakacava na gone me ra dautataro?

iTaviqaravi e Rawa ni Caka

• Sureta e dua na gone me wilika vakadomoilevu na Maciu 5:9. Na cava e dua na dautataro? Na cava eso na sala e rawa ni da dautataro kina vei ira noda matavuvale kei ira na itokani? (Ena so na kena vakasama, raica na tikina e 21–24, 38–47.)

• Kerei ira yadua na gone me ra vakasamataka e dua na ituvaki ena gadrevi kina na nona veivuke e dua na dautataro. Na cava beka ena cakava na dautataro ena ituvaki oqori?

• Sureti ira na gone me ra wasea na gauna eso era a lomana kina e dua, kevaka sara mada ga e a duatani na tamata oqori se a dredre me lomani.

Maciu 5:14–16

Noqu ivakaraitaki e rawa ni vakararamataka na sala vei ira tale eso me ra muri Jisu.

E vuqa vei ira na gone o vakavulica e sa vakayacora oti na veiyalayalati ni papitaiso. Vakasamataka na sala e semati kina na vosa ni iVakabula ena Maciu 5:14–16 ki na nodra veiyalayalati. Na itukutuku cava beka ni Turaga ena malanivosa oqo e rairai baleti ira na gone ena nomu kalasi?

iTaviqaravi e Rawa ni Caka

• Vukei ira na gone me ra cavuqaqataka na Maciu 5:16. Vola na tikina oqo ena papa ni volavola. Ni wilika vata vakavica, ka bokoci e vica na vosa ena veigauna yadua. Sureti ira na gone me ra droinitaka na veika era rawa ni cakava me ra dua kina na rarama vei ira na tani. Veivosakitaka na sala e vukei keda ni vayacora kina na noda veiyalayalati ni papitaiso na vakacaudrevi tu ni rarama vei ira na tani (raica na Mosaia 18:8–10).

• Lagata e dua na sere me baleta na wasei ni rarama vei ira na tani, me vaka na “Cila, Cila” (iVolanisere ni Gonelalai,, 96). Me da wasea beka vakacava na rarama ni iVakabula?

• Kerei ira na gone me ra droinitaka na veika e dau solia vei keda na rarama. Wilika na Maciu 5:14–16. Taroga vei ira na vuna e vinakata kina o Jisu me da dua na rarama ki vuravura.

• Sureta e rua na gone me rau qara vata, qai kerea e dua me tovolea me vakadredrei koya kadua ni sega ni tarai koya. Veivosakitaka na kaukauwa e tu vei ira na gone me ra dau vakamarautaki ira tale eso.

ivakatakilakila ni vuli

Vakauqeta na Vuli e Vale

Bolei ira na gone me ra vakaraica toka mai e dua a dautataro ena macawa oqo. Ena itekivu ni kalasi ena macawa mai qo, sureti ira me ra tukuna se o cei kei na ka era a raica.

Vakatorocaketaki Noda Veivakavulici

Vukei ira na gone me ra yamekemeke. “Ni o vakavulici ira na gone, laivi ira mera tara, droinitaka, rokataka, vola, ka bulia. Na veika oqo sa levu cake mai na itaviqaravi lasa eso—era sa yaga sara ki na vuli” (Veivakavulici ena iVakarau ni iVakabula, 25).

tabana ni itaviqaravi: Sa vinakata o Jisu meu dua na rarama