“30 ni Janueri–5 ni Feperueri. Maciu 4; Luke 4 - 5: ‘Sa Tu vei Au na Yalo i Jiova’” Lako Mai, Mo Muri Au—Me Baleta na Tamata Yadua kei na Matavuvale: Veiyalayalati Vou 2023 (2022)

“30 ni Janueri–5 ni Feperueri. Maciu 4; Luke 4 - 5,” Lako Mai, Mo Muri Au—Me Baleta na Tamata Yadua kei na Matavuvale: 2023

iVakatakilakila

Sa tucake tu o Jisu ena lekutu

Ki na Lekutu, mai vei Eva Koleva Timothy

30 ni Janueri–5 ni Feperueri

Maciu 4; Luke 4–5

“Sa Tu Vei Au na Yalo i Jiova”

A vakayagataka na ivolanikalou na iVakabula me vorata kina na veitemaki nei Setani ka vakadinadinataka na Nona ilesilesi vakalou (raica na Luke 4:1–21). Vakasamataka vakatitobu na sala e rawa ni tara cake kina na nomu vakabauta kei na nomu igu na ivolanikalou mo vorata kina na veitemaki.

Vola na Nomu Nanuma

Ni se cauravou o Koya, sa vaka me vakila tu o Jisu ni sa tiko na Nona ilesilesi e cecere, ka tabu. Ia ni sa vakavakarau me tekivuna na Nona cakacaka e vuravura, e a saga na meca me tea na vakatitiqa ki na vakasama ni iVakabula. Kevaka ko sa Luve ni Kalou,” e kaya ko Setani (Luke 4:3, vakamatatataki). Ia na iVakabula e a veitalanoa tiko kei na Tamana mai Lomalagi. E kila na ivolanikalou, ka kilai Koya tiko. Vei Koya, na isolisoli i Setani—“A lewa ni ka kece oqori ka’u na solia vei iko” (Luke 4:6)—e sega na betena, ni Nona vakavakarau na iVakabula ena Nona bula taucoko e vakatara Vua me ciqoma na “kaukauwa ni Yalotabu” (Luke 4:14) Dina ga ni yaco na veitemaki, na veivakatovolei, kei na Nona sega ni ciqomi, e a sega ni yavalati o Jisu Karisito ena Nona ilesilesi: “Sa dodonu me’u lako me’u tukuna na itukutuku-vinaka ni matanitu ni Kalou … ni sa ka oqo ka’u sa talai mai kina” (Luke 4:43).

iVakatakilakila

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Maciu 4:1–2

Na veitalanoa kei na Kalou e vakarautaki au me’u qaravi Koya.

Me vakavakarau ki na Nona ilesilesi, a gole o Jisu ki na lekutu “me tiko vata kei na Kalou” (iVakadewa nei Josefa Simici, Maciu 4:1 [ena Maciu 4:1, ivakamacala e ra b]). Vakasamataka na cava o dau vakayacora mo voleka kina vua na Kalou. E vakarautaki iko vakacava na ka oqo ki na cakacaka e vinakata o Koya mo cakava?

Maciu 4:1-11; Luke 4:1-13

E a vakarautaka o Jisu Karisito na ivakaraitaki vei au me‘u vorata rawa kina na veitemaki.

Ena so na gauna era dau vakadinadinataka na tamata ni ra dau temaki me ra ivalavala ca. Ia na iVakabula mada ga, ka bula ka “sega na nona cala” (Iperiu 4:15), e a temaki. E kila tu o Jisu Karisito na veitemaki eda sotava kei na sala me vukei keda kina me da vorati ira kina (raica na Iperiu 2:18; Alama 7:11–12).

Ni ko wilika na Maciu 4:1–11 kei na Luke 4:1–13, na cava o vulica ka na rawa ni vukei iko ni o sotava na veitemaki? Ena rawa ni o tuva na nomu vakasama ena dua na ituvatuva vakaoqo:

Jisu Karisito	O au
Jisu Karisito Na cava a temaki Karisito kina o Setani me cakava?	O au Na cava a temaki au kina o Setani me’u cakava?
Jisu Karisito A vakavakarau vakacava na Karisito me vorata rawa kina na veitemaki?	O au Au na vakavakarau vakacava me‘u vorata rawa kina na veitemaki?
Jisu Karisito	O au

Na ikuri ni raititobu cava o rawata mai na iVakadewa nei Josefa Simici ena Maciu 4? (raica na ivakamacala e ra ena wase taucoko ni Maciu 4).

Raica talega na 1 Korinica 10:13; Alama 13:28; Mosese 1:10–22; Ulutaga vakosipeli, “Veitemaki,” topics.ChurchofJesusChrist.org.

Luke 4:16–32

Sa i Jisu Karisito na Mesaia ka a parofisaitaki.

Kevaka mo a kerei mo vakamacalataka na cava a talai mai kina ki vuravura o Jisu Karisito me mai cakava, na cava o na tukuna? Ena nona cavuta e dua na parofisai nei Aisea me baleta na Mesaia, a vakamacalataka kina na iVakabula na vei ka me baleta na Nona ilesilesi (raica na Luke 4:18–19; Aisea 61:1–2). Na cava o sa vulica me baleta na Nona ilesilesi ni o wilika na vei tikina oqo?

Na cava eso na sala e sureti iko kina na iVakabula mo vakaitavi kina ena Nona cakacaka?

iVakatakilakila

E tucake tiko o Jisu ena vanua ni sokalou

E dina ga ni ra sa waraka tu mai na Jiu me vica vata na senitiuri me vakavotukanataki na parofisai i Aisea, e levu e a sega ni ciqoma ni sa i Jisu na Mesaia ka a kaya kina o Koya, “Ena siga oqo sa vakayacori e daligamudou na iVola Tabu oqo” (Luke 4:21). Ni ko wilika na Luke 4:20–30 (raica talega na Marika 6:1–6), tovolea mo biuti iko mo vakataki ira na kai Nasareci. A dua beka na ka e rawa ni na vakataotaka na nomu ciqomi Karisito vaka-taucoko me nomu iVakabula?

Raica talega na Mosaia 3:5–12; “Jesus Declares He is the Messiah” (vidio), ChurchofJesusChrist.org.

Maciu 4:18–22; Luke 5:1–11

Ni’u sa vakararavi vua na Turaga, ena rawa ni vukei au o Koya me’u rawata na noqu iyacoyaco vakalou.

E vakatavulica o Peresitedi Ezra Taft Benson, “O ira na tagane kei na yalewa era sa vagolea na nodra bula vua na Kalou era na raica ni levu cake sara na ka ena cakava o Koya ki na nodra bula mai na kena era na rawata ga vakai ira” (Nodra iVakavuvuli na Peresitedi ni Lotu: Ezra Taft Benson [2014], 42). Raica na kena yaco oqo vei Saimoni Pita kei ira na nona ilawalawa dauqoli. A raica o Jisu vei ira e dua na ka cecere cake mai na veika era sa raica vakai ira ga. A vinakata o koya me ra “gonedau ni tamata” (Maciu 4:19; raica talega Luke 5:10).

Ni o wilika na Maciu 4:18–22 kei na Luke 5:1–11, vakasamataka vakatitobu na veika sa vukei iko tiko kina o Jisu Karisito mo na vakataka. O sa vakilai Koya vakacava ni sa sureti iko tiko mo muri Koya? E rawa ni ko vakaraitaka vakacava ni ko sa yalorawarawa mo biuta laivi na ka kecega ka muri Koya? (raica na Luke 5:11).

iVakatakilakila

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 4:1–2; Luke 4:1–2.Na raititobu cava eda na rawa ni rawata mai na itukutuku oqo me baleta na kaukauwa ni lolo. Me vukea na nomu vuvale me vulica na veika e baleta na lolo, sa rawa mo vakayagataka na “Fasting and Fast Offerings” ena Ulutaga ni Kosipeli (topics.ChurchofJesusChrist.org). E rawa ni ratou wasea na lewe ni matavuvale na veika e ratou sa sotava ni ratou lolo. E rawa beka mo na tuvanaka ena masumasu mo dou lolo vata ena vuku ni dua na inaki bibi.

Maciu 4:3–4; Luke 4:3–4.Ni sa temaki Karisito o Setani me vukica na vatu me madrai, e sa bolea kina na itutu vakalou i Karisito ena nona kaya, “Kevaka ko sa Luve ni Kalou” (Maciu 4:3, vakuri ena vosakala). E dau tovolea vakacava o Setani me da vakatitiqataka na noda itutu vakalou—vakakina ki vua na iVakabula? E tovolea vakacava me vakayacora oqo? (Raica talega na Mosese 1:10–23.)

iVakadewa nei Josefa Simici, Maciu 4:11.Ni sa vakatovolei oti vakayago ka vakayalo ko Jisu, sa vakagolea na Nona vakasama ki na gagadre nei Joni na Dauveipapitaisotaki, ka a tiko mai valeniveivesu: “Ia oqo ni sa kila ko Jisu ni sa biu ki valeniveivesu ko Joni, ka sa talai ira yani na agilosi, ia, raica, era sa lako yani ka qaravi koya [Joni]” (iVakadewa nei Josefa Simici, Maciu 4:11 [ena Maciu 4:11, ivakamacala e ra a). Eda sa vakalougatataki vakacava ena noda muria na ivakaraitaki i Karisito me da dau nanumi ira tale eso?

Luke 4:16–21.Eda kila tiko beka e dua e sa kavoro na utona se gadreva beka me sa “vagalalataki ira sa mavoa”? (Luke 4:18). Eda na vukei ira rawa vakacava na tamata me ra ciqoma na veivakabulai kei na veisereki ni iVakabulai? Ena rawa ni ko veitalanoataka talega na kena rawa ni vukea na “sereki vei ira na bobula” na vakayacori ni cakacakatabu ni valetabu (Luke 4:18).

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Muri Au Mai,” Serenilotu, naba 63.

Vakatoroicaketaki ni Noda Veivakavulici

Bulataka na kosipeli i Jisu Karisito. “E rairai ni ka bibi duadua o rawa ni cakava [vakaitubutubu se qasenivuli] o ya … mo bulataka na kosipeli ena yalomu taucoko. … Oqo na usutu ni sala mo rawata kina na veitokani ni Yalo Tabu. E sega ni gadrevi mo uasivi vakataucoko, ia mo saga tikoga vakagumatua—ka vakasaqara na veivosoti mai na Veisorovaki ni iVakabula ena gauna ga o lutu kina” (Veivakavulici ena iVakarau ni iVakabula, 13).