witi sa vakarau tamusuki

20–26 ni Maji

Maciu 13; Luke 8; 13

“O Koya sa Vakadaligana me Rogoca, me Mani Rogoca Sara”

Era sa italanoa rawarawa na vosa vakatautauvata ka rawa ni ra vakaitavi kina na gone. Na ituvatuva oqo kei na Lako Mai, Mo Muri Au—Me Baleti Ira na Tamata Yadua kei na Matavuvale e rawa ni vukei iko ni vakayagataka na vosa vakatautauvata ni iVakabula mo vakavulica kina vei ira na gone na veidina bibi eso.

ivakatakilakila ni veiwasei

Sureta na Veiwasei

Kauta mai e vica na iyaya ena vukei ira na gone me ra nanuma kina eso na vosa vakatautauvata ena Maciu 13, me vaka e dua na sorenitei, dua na mataniciva, se dua na kato ni yautalei. Sureti ira na gone me ra wasea na veika era nanuma me baleta na vosa vakatautauvata.

ivakatakilakila ni veivakavulici

Vakavulica na iVunau: Gone Sobu

Maciu 13:1–23

Sa gadrevi meu vakavakarau ni vulica na ivakavuvuli i Jisu.

Era na sega beka ni rawa ni kila kece na gone sobu na ivakatakarakara ena vosa vakatautauvata ni dau kakaburaki, ia e rawa ni ra vulica na dina vakosipeli rawarawa e vakavuvulitaka. O na vukei ira vakacava me ra kila vakavinaka cake na ibalebale ni vosa vakatautauvata oqo kivei ira?

iTaviqaravi e Rawa ni Caka

• Vakaraitaka na veimataqali qele duidui (se iyaloyalo ni qele) ni o vakalekalekataka na Maciu 13:3–8. Solia vei ira yadua na gone e dua na sorenikau, ka taroga na cava e rawa ni ra cakava me vukea na tubu ni sorenikau. Vakamacalataka ni noda ivakadinadina sa vaka na sorenikau. Eda na vukea vakacava na noda “sorenikau” ni ivakadinadina me tubu?

• Vakayagataka na tabana ni itaviqaravi ni macawa oqo me vukea nodra kila na gone na veika e vakavuvulitaka na veimataqali qele e vakamacalataki ena Maciu 13 me baleta na yaloda. Tarogi ira na gone se na mataqali yalo vakacava e vinakata o Jisu me tiko vei ira me rawa ni ra vulica kina na Nona ivakavuvuli.

• Wilika na Maciu 13:9, 15, ka sureti ira na gone me ra dusia na veitiki ni yagodra duidui ni ra rogoca ni cavuti tu. E rawa vakacava ni da vakayagataka na veitiki ni yago oqo me da vulica kina na ivakavuvuli i Jisu?

Maciu 13:24–30, 36–43, 47–48

E vinakati au na Tamada Vakalomalagi meu digitaka na dodonu.

Eso na vosa vakatautauvata i Jisu e vakatavulica ni ena iotioti ni gauna, na Kalou ena tawasei ira tani na tamata ca mai vei ira na yalododonu. O rawa ni vakayagataka vakacava na vosa vakatautauvata qo mo vakauqeti ira kina na gone me ra digitaka na dodonu?

iTaviqaravi e Rawa ni Caka

• Me ra dramataka na gone na vosa vakatautauvata ni sila vinaka kei na sila ca (raica na Maciu 13:24–30). Vakamacalataka ni sila vinaka e matataki ira na tamata ka digitaka na ka dodonu, kei na sila ca (co ca) e matataki ira era sega. Ena dua na siga, ena sokumuni ira na tamata yalododonu na Tamada Vakalomalagi me ra bula vata kei Koya.

• Solia vei ira na gone eso na ivakaraitaki ni digidigi dodonu kei na digidigi cala. Kerei ira na gone me ra cavuta na “digidigi ni sila vinaka” ni ko vakamacalataka e dua na digidigi dodonu kei na “digidigi ni sila ca” ni ko vakamacalataka e dua na digidigi cala.

• Kauta mai nai yaloyalo ni vunisila vinaka, me ra qai droinitaka na gone ena i yaloyalo eso na sala e rawa ni ra buladodonu kina.

Maciu 13:44–46

E sa iyautalei na noqu lewena na Lotu i Jisu Karisito ni Yalododonu Edaidai.

O rawa vakacava ni vakayagataka na ivakatakarakara ni yau kei na mataniciva talei eso mo vukei ira kina na gone ni kila na yaga vakalevu ni nodra lewena na Lotu i Karisito?

iTaviqaravi e Rawa ni Caka

• Vunitaka na iyaloyalo ni dua na kato ni iyautalei kei na mataniciva ena rumu, ka me ra qai vakaraica na gone. Vakayagataka nai yaloyalo eso me vukea nomu vakavulica na vosa vakatautauvata ena Maciu 13:44–46. Veivosakitaka na vuna e rawa ni solia yani kina e dua na veika kece e tu vua me baleta ga e dua na mataniciva totoka se dua na iyautalei ena dua na were. Vakamacalataka ni so na gauna eda solia yani eso na ka vinaka me baleta e dua na ka vinaka cake. Tukuna vei ira na gone na vuna e sa rui yaga kina vei iko na kosipeli.

• Biuta ena dua na kateni se kato e vica na iyaya se iyaloyalo ka matataka na “iyautalei” ena Lotu i Jisu Karisito ni Yalododonu Edaidai, me vaka na iVakabula, valetabu, se na iVola i Momani. Kerei ira yadua na gone me ra digitaka e dua nai yaya se iyaloyalo ka veivosakitaka na vuna e iyautalei kina.

• Lagata vata na “Au Lewe ni Lotu i Jisu Karisito” (iVolanisere ni Gonelalai, 48), ka kerei ira na gone me ra veivosakitaka na vuna era vakavinavinakataka kina na Lotu ni iVakabula. Vakadinadinataka na veivakalougatataki o sa sotakaya baleta nomu lewena na Lotu.

ivakatakilakila ni veivakavulici

Vakavulica na iVunau: Gone Qase Cake

Maciu 13:1–23

Sa gadrevi meu vakarautaka na yaloqu me ciqoma na ivakavuvuli i Jisu.

O na vukei ira vakacava na gone me ra vakila na bibi ni kena tiko na loma rawarawa kei na loma malumalumu me rawa ni vakavulici ira kina o Jisu?

iTaviqaravi e Rawa ni Caka

• Lesi ira yadua na gone me ra wilika e dua vei ira na va na mataqali qele ena Maciu 13:4–8. Sureti ira me ra vaqara ka wasea na ka e yaco ki na sorenitei ena mataqali qele era sa wilika. Ena rawa ni tautauvata vakacava kei na veimataqali qele duidui na yaloda? (raica na Maciu 13:19–23).

• Vakaraitaka vei ira na gone e dua nai yaloyalo ni i teitei. Na qele vakacava e gadrevi me rawa ni tubu kina na itei? Vakaraitaka e dua nai yaloyalo ni qele vatuvatu se votovotoa. Cava na vuna ena dredre ni tubu kina na kau ena mataqali qele vakaoqo? E rawa vakacava ni da vakadeitaka ni sa vaka na qele vinaka na yaloda me rawa ni da ciqoma kina na ivakavuvuli ni iVakabula?

• Sureti ira na gone me ra wilika na Maciu 13:15–17. Droinitaka e dua na mata, daliga, kei na uto ena papa ni volavola. Eda vakayagataka vakacava na veitiki ni yago oqo me da vulica kina na ivakavuvuli i Jisu?

Maciu 13:24–30, 36–43

Au rawa ni digitaka na dodonu kevaka mada ga era sega ni cakava vakakina na tu wavoliti au.

Ni o wilika na veitikina oqo ni o vakasamataki ira tiko na gone, na vakanananu cava soti e votu mai vei iko?

iTaviqaravi e Rawa ni Caka

• Sureti ira na gone me ra droinitaka na ituvaki duidui eso ni vosa vakatautauvata ni sila vinaka kei na sila ca, e kune ena Maciu 13:24–30, ka wasea na nodra droini ki na kalasi. Kerei ira me ra vakayacana nodra droini ni ra vakayagataka tiko na ivakadewa ni vosa vakatautauvata ena Maciu 13:36–43. O na gadreva beka mo vakamacalataka ni sa co ca na sila ca.

• Kevaka e rawa, vakaraitaka e dua na yaloyalo ni sila vinaka kei na sila ca. Vakamacalataka ni rau na tubu vata ga na sila vinaka kei na sila ca me yacova na tatamusuki (ivakataotioti kei vuravura). Oqo e vakavulica vei keda ni da sa bula wavoliti ruarua tu ena vinaka kei na ca, ka sa dodonu me da qarauna me da digitaka na dodonu. Kerei ira na gone me ra wasea se rawa vakacava ni ra kila na duidui ni vinaka kei na ca.

Maciu 13:44–46

Sa dua na iyautalei na noqu lewena na Lotu i Jisu Karisito ni Yalododonu Edaidai.

Era raica tu beka na gone o vakavulica ni sa dua na yautalei na nodra lewena na Lotu? De na rairai vukei ira beka na veivosakitaki ni vosa vakatautauvata ena Maciu 13:44–46 me ra wasea na nodra nanuma me baleta na Lotu ni iVakabula.

iTaviqaravi e Rawa ni Caka

• Sureti ira na gone me ra wilika vakai ira na Maciu 13:44–46 ka wasea na vosa vakatautauvata ena nodra vosa ga kei na dua tale na lewe ni kalasi.

• Kotiva e vica na pepa momokiti me matataka na ilavosiliva, ka biuta ena dua na kato ni yautalei. Sureti ira na gone me ra taura e dua na ilavosiliva ka droinitaka se vola kina e dua na ka era taleitaka ena nodra lewena na Lotu. Kerei ira na gone me ra wasea na ka era biuta ena nodra ilavosiliva.

• Sureta e dua na lewe ni tabanalevu me wasea vei ira na gone na italanoa ni nona saumaki mai ka tukuna na veika a biuta tani me lewena kina na Lotu i Jisu Karisito ni Yalododonu Edaidai. Se kerei ira na gone me ra tukuna na solibula era cakava me baleta na Turaga kei na Nona Lotu.

ivakatakilakila ni vuli

Vakauqeta na Vuli e Vale

Sureti ira na gone me ra vakavulica nodra matavuvale ena dua vei ira na vosa vakatautauvata era vullica ena Lalai.

Vakatorocaketaki Noda Veivakavulici

Era taleitaka na gone me ra wasea na veika era sa vulica tiko. E dina ni ra se gone, sa rawa vei ira na gone me ra vaqaqacotaka na lewe ni nodra matavuvale. Vakauqeti ira me ra wasea kei na nodra matavuvale na veika era vulica ena Lalai. (Raica na Veivakavulici ena iVakarau ni iVakabula, 30.)

tabana ni itaviqaravi: Sa gadrevi meu vulica meu vakarau tu