E taubale vata kei ira na tisaipeli o Jisu ka kauta voli na basikete madrai

27 ni Maji–2 ni Epereli

Maciu 14; Marika 6; Joni 5–6

“Dou Kakua ni Rere”

Ni o vakavakarau mo veivakavulici mai na Maciu 14; Marika 6; kei na Joni 5–6, vaqara na itukutuku eso ena yaga ki na nodra bula na gone o vakavulica. Na cava o nanuma ni na vukei ira me ra kila na itukutuku eso oqo? Ena rairai solia vei iko eso na vakasama na ituvatuva oqo.

ivakatakilakila ni veiwasei

Sureta na Veiwasei

Vakaraitaka e dua na iyaloyalo kei Jisu ni taubale voli ena dela ni wai (raica na ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale se na iVola ni iYaloyalo Vakosipeli, naba 43), ka kerei ira na gone me ra wasea na veika era kila me baleta na italanoa.

ivakatakilakila ni veivakavulici

Vakavulica na iVunau: Gone Sobu

Joni 5: 1–9

E kila o Jisu Karisito na veika au gadreva ka rawa ni vukei au.

Vakasamataka vakatitobu na itukutuku ni nona vakabula na tamata o Jisu ena tobu mai Peciseita. O na vukei ira vakacava na gone me ra raica na cava e vakavulica na italanoa me baleta na yalovinaka, loloma, kei na itovo tale eso i Jisu?

iTaviqaravi e Rawa ni Caka

• Vakayagataka na iyaloyalo Sa Veivakabulai o Jisu e Peciseita (iVola ni iYaloyalo Vakosipeli, naba 42) mo tukuna kina vei ira na gone na italanoa ena Joni 5:1–9. Se vakaraitaka na vidio “Jesus Heals a Man on the Sabbath” (ChurchofJesusChrist.org). Kerei ira na gone me ra raitayaloyalotaka ni sai ira na tamata a vakabula o Jisu. Ena vakacava nodra nanuma ni sa vakabulai ira o Jisu?

• Kerei ira na gone me ra cavuta mai eso na ka e dau dredre vei ira se vakararawataki ira. Tukuna vei ira e dua na gauna ni nomu bula e a vukei iko kina na iVakabula ena dua na veivakatovolei dredre. Vakadinadinataka ni kila tu o Jisu na noda leqa kece sara ka vinakata tu me vukei keda.

Maciu 14:13–21

Au sa muria tiko na ivakaraitaki nei Jisu ni’u dau yalovinaka vei ira tale eso.

Dua na sala a vakaraitaka kina na loloma o Jisu oya na nodra vakani na daumuri Koya ena nodra a viakana. O na vukei ira vakacava na gone ni vulica me ra dau qarava eso tale me vakataki Jisu?

iTaviqaravi e Rawa ni Caka

• Vakaraitaka vei ira na gone e dua na basikete kei na so na madrai ni o tukuna tiko na italanoa ena Maciu 14:13–21. Vakamacalataka ni dina ga ni a vakasaqara o Jisu na vanua me rawa ni tiko duadua voli, era a vinakata na tamata me ra tiko volekati Koya. Wasea na vo ni talanoa vei ira na gone, ka kerei ira me ra vakarogoca na veika a vakayacora o Jisu e vakaraitaka na yalovinaka kei na loloma ena vukudra.

• Kerei ira na gone me ra wasea na ivakarau e a yalovinaka kina e dua kivei ira. Qai vukei ira me ra vakasamataka na veika era rawa ni cakava ena macawa oqo me ra yalovinaka kina vei ira na tani. Ena isaunitaro kece era solia mai, droinitaka e dua na ibuli madrai se dua na ika ena papa. Tukuna vei ira na gone ena nodra cakava na veika oqo, era sa muria tiko na ivakaraitaki nei Jisu ena Nona vakani ira na lewe lima na udolu na tamata era a viakana tu.

Maciu 14:22–33

Na vakabauti Jisu Karisito e rawa ni vukei au meu kakua ni rere.

A vakaraitaka o Pita na vakabauta cecere ena nona a lako ena dela ni wai kivei Jisu. Na lesoni cava beka ena italanoa oqo e rawa ni baleti ira na gone?

iTaviqaravi e Rawa ni Caka

• Vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale (raica talega na iVola ni iYaloyalo Vakosipeli, naba 43) ni o tukuna na italanoa mai na Maciu 14:22–33 ena nomu vosa ga. Vakasamataka mo vakayagataka na tabana ni itaviqaravi ni macawa oqo me vukei ira na gone me ra talanoataka lesu vei iko. E rawa talega ni o kauta mai e dua na bilo wai lailai ka sureti ira na gone me ra raitayaloyalotaka ni “lako” tiko na iqaqalo ni ligadra e dela ni wai.

• Vakaraitaka na vidio “Wherefore Didst Thou Doubt?” (ChurchofJesusChrist.org), ka tarogi ira na gone se cava na vuna a rere kina o Pita. Oti qai kerei ira me ra tukuna na gauna eso era a rere kina ka wasea se cava a vukei ira. Vukei ira ni raica na vakabauti Jisu Karisito ena vukei keda me da kakua ni rere.

ivakatakilakila ni veivakavulici

Vakavulica na iVunau: Gone Qase Cake

Joni 5:17–47

E vakavulici au o Jisu Karisito me baleta na Tamada Vakalomalagi.

E rawa vakacava ni vukea nodra vulica na gone na veika baleta na Tamada Vakalomalagi na ivakavuvuli nei Jisu me baleti Tamana?

iTaviqaravi e Rawa ni Caka

• Cakava e rua na iwasewase ni kadi veisotari ka volai kina na vosa a vakayagataka o Jisu me vakavuvulitaki Tamada Vakalomalagi kina ena Joni 5, me vaka na loloma, bula, kei na cakacaka (raica na Joni 5:20, 26, 36). Vukica sobu na kadi, ka kerei ira na gone me ra vaqara na kena veisa ena nodra vukica cake e yarua na kadi ena dua ga na gauna. Ni sa kune na veisa yadua, wilika na tikina e tiko kina na vosa, ka tarogi ira na gone se na cava e vakavulica vei keda na vosa oya me baleti Tamada Vakalomalagi.

• Kerei ira na gone me ra wilika na Joni 5:30 qai vakacavara na iyatuvosa oqo: “Ni’u sa sega ni muria na lomaqu, …” A muria vakacava o Jisu Karisito na lomai Tamana Vakalomalagi? E rawa vakacava ni da muria na lomana na Tamada Vakalomalagi?

ibuli madrai kei na ika

A cakamana o Jisu ni vakania e lima na udolu na tamata ena lima na ibuli madrai kei na rua na ika.

Joni 6:5–14

Na noqu isolisoli lalai ena yaga vakalevu.

E dua na gonetagane lailai a solia na madrai kei na ika a vakayagataka o Jisu me vakania kina na lewe lima na udolu. Ena rawa vakacava ni o vukei ira na gone o vakavulica me ra raica na ivakarau e rawa ni ra cau kina ena cakacaka ni Turaga?

iTaviqaravi e Rawa ni Caka

• Vukei ira me ra raitayaloyalotaka se na vakaevei na kedra lewelevu na lima na udolu na tamata. Se na vakaevei beka na nodra vakani na lewelevu vakaoya ena lima ga na ibuli madrai kei na rua na ika?

• Sureta e dua na gone me tukuna na italanoa ni nodra vakani na lewe lima na udolu ena nona vosa ga vakai koya. Vakabibitaka ni a dua na gonetagane ka a vakarautaka na madrai kei na ika a vakayagataka na Turaga me vakayacora kina na cakamana oqo. Ena rawa vakacava ni da vakataki koya na gonetagane e vakamacalataki ena Joni 6:9? Sureti ira na gone me ra droinitaka na ibuli madrai kei na ika ena pepa ka vola kina eso na ka e rawa ni ra solia vua na Turaga me vukea na Nona cakacaka.

• Solia vei ira na gone e dua na ibulibuli tasereki lailai me ra vakasotara vata. Na cava ena yaco kevaka e dua na tikina e yali tiko? Vakamacalataka ni da sa vaka e dua na tiki ni ibulibuli—eda sa ka bibi taucoko, ka da veigadrevi yadua vakai keda. Vukei ira na gone me ra cavuta na vuna era bibi kina ena nodra matavuvale, nodra kalasi ni Lalai, matavuvale ni Kalou, kei na so tale na ilawalawa.

Maciu 14: 22–33

Na vakabauti Jisu Karisito e rawa ni vukei au meu kakua ni rere.

E vakaitavi vakabibi sara na vakabauta kei na rere ena italanoa ni nodrau lako e dela ni wai o Jisu kei Pita. Na cava e rawa ni ra vulica na gone mai na italanoa oqo?

iTaviqaravi e Rawa ni Caka

• Vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale (raica talega na iVola ni iYaloyalo Vakosipeli, naba 43). Kerei ira na gone me ra raica na malanivosa eso ena Maciu 14:22–33 ka vakamacalataka na iyaloyalo.

• Kerei ira na gone me ra vaqara na ivakatakilakila ni vakabauta kei na ivakatakilakila ni rere eso ni ra wilika na Maciu 14:22–33. Vakaraitaka na vidio “Wherefore Didst Thou Doubt?” (ChurchofJesusChrist.org). Na cava na kena ibalebale me da vakabauti Jisu Karisito? Vukei ira na gone me ra vakasamataka na gauna eso a vukei ira kina na nodra vakabauta me ra vorata na rere.

• Kerei ira na gone me ra raitayaloyalotaka ni ra a tiko ka taukena tu e dua na itaba ena nodrau a lako voli ena dela ni wai o Jisu kei Pita. Na tiki ni gauna cava era na digitaka me ra tabaka kina kei na vuna? Vakatura me ra vaqaqara ena Maciu 14:22–33 ena vakasama eso. Sureti ira me ra droinitaka e dua na iyaloyalo ni tiki ni gauna era digitaka, wasea na nodra iyaloyalo, ka vakamacalataka na vuna era digitaka kina na tiki ni gauna oya.

ivakatakilakila ni vuli

Vakauqeta na Vuli e Vale

Kevaka era sa vakacavara na gone na tabana ni itaviqaravi ni macawa oqo, sureti ira me ra vakayagataka me vakavulica nodra matavuvale ena veika era sa vulica ena kalasi. Se solia vei ira e dua na ilavelave ni tabana me ra vakacavara vata kei na nodra matavuvale e vale.

Vakatorocaketaki Noda Veivakavulici

Sureta na veiwasei. Taroga na nodra vakasama, na veika era vakila, kei na ka era sa sotava na gone. O na raica ni dau tu vei ira na vakasama rawarawa ia e bibi sara.

tabana ni itaviqaravi: e rawa ni vukei au o Jisu meu kakua ni rere