Vakamataliataki i Karisito

Na Vakamataliataki, mai vei Carl Heinrich Bloch

10–16 ni Epereli

Maciu 15–17; Marika 7–9

“Oi Kemuni na Karisito”

Ni ko vakasamataka vakatitobu na Maciu 15–17 kei na Marika 7–9, vakarogoca matua na veivakauqeti vakayalo ka na rawa ni vukei iko mo kila na veika era gadreva na gone ena nomu kalasi.

ivakatakilakila ni veiwasei

Sureta na Veiwasei

Sureti ira na gone me ra wasea na vuna era vakavinavinakataki ira kina na iliuliu ena Lotu, oka kina na parofita kei na iapositolo kei na iliuliu e veivanua. Na cava eda sa rogoca wale tikoga qo ni ra vakavulica?

ivakatakilakila ni veivakavulici

Vakavulica na iVunau: Gone Sobu

Maciu 16:13–17

Au rawa ni rawata e dua na ivakadinadina ni o Jisu Karisito e sa Luve ni Kalou.

Vakasamataka na sala mo vakayagataka kina na ivakadinadina nei Pita kei na kena isau mai vei Jisu mo vakavulica vei ira na gone na cava na ivakadinadina ka vakauqeti ira me ra vakasaqara na nodra.

iTaviqaravi e Rawa ni Caka

• Kerei ira na gone me ra vakarogoca na ka a tukuna o Pita ni o wilika na Maciu 16:15–17. (Raica talega na “Wase e 32: Sa Vakadinadinataki Karisito o Pita,” e Na iTalanoa ena Veiyalayalati Vou, 76–77, se na kena vidio ena ChurchofJesusChrist.org.) Vakamacalataka ni a wasea tiko o Pita na nona ivakadinadina baleti Jisu Karisito. Wilika tale na tikina eso oqori. (Se vakaraitaka tale na vidio.) Ena gauna oqo kerei ira na gone me ra vakarogoca se o cei a tukuna vei Pita ni o Jisu Karisito sa Luve ni Kalou.

• Wasea nomu ivakadinadina baleti Jisu Karisito, ka vakamacalataka na sala o a ciqoma kina. Sureti ira na gone me ra vakasaqara nodra dui ivakadinadina mai vei Tamada Vakalomalagi.

Maciu 16:15–19

E solia o Jisu Karisito vei ira na parofita kei na iapositolo na idola ni matabete me ra liutaka kina na Nona Lotu.

Na iVakabula e vakatauvatana na ivakatakila ki na dua na vatu kei na lewa ni matabete ki na idola eso. E rawa vakacava ni o vakayagataka na veivakatauvatani oqo me vukei ira na gone me ra vakabauti ira era liutaka na Nona Lotu?

iTaviqaravi e Rawa ni Caka

• Vakaraitaka e dua na vatu vei ira na gone ni o wilika na Maciu 16:18 vata kei ira. Tokaruataka vata kei ira na malanivosa “e dela ni vatu oqo ka’u na tara kina na noqu isoqosoqo lewe ni lotu,” ka qai matanataka toka. Vakamacalataka ni Lotu e tarai cake tu ena “vatu” ni ivakatakila.

• Vakaraitaka vei ira na gone eso na idola ka taroga se cava e dau vakayagataki kina na idola. Vakamacalataka ni o Pita kei ira tale na vo ni iApositolo era a ciqoma na idola ni matabete mai vei Jisu. Na idola eso oqori era “tadolava” na veivakalougatataki vei keda ka dolava na sala ki lomalagi. Kena ivakaraitaki, na idola ni matabete e vakatarai keda me da papitaiso ka vakayagataka na sakaramede. Solia eso na idola pepa vei ira na gone, me ra vola kina eso na veivakalougatataki ena rawa ni “tadolava” na idola ni matabete.

• Vakaraitaka e dua na kena itaba na Peresitedi ni Lotu, ka wasea nomu ivakadinadina ni tu vua na idola kece sara ni matabete ena gauna oqo, me vakataki Pita ga.

ivakatakarakara kei Pita ni taura tu na idola

Na idola ni matabete sai koya na lewa me dusimaka na vakayagataki ni matabete.

Maciu 17:19–20

E rawa ni cakamana na noqu vakabauta.

Ni o wilika na yalayala i Jisu ni rawa ni tosoya e dua na ulunivanua na vakabauta e vaka na sore ni mosita, na cava e vakauqeti iko me baleti ira na gone o vakavulica?

iTaviqaravi e Rawa ni Caka

• Wilika na Maciu 17:19–20 vata kei ira na gone. Sureti ira me ra veivukevuke ena droinitaki ni veiulunivanua lelevu kei na sorenikau lalai ena papa ni volavola. Vakamacalataka ni ulunivanua sa vaka na veika eso e dredre vei keda meda cakava. Na cava eso na ka e rawa ni vaka na ulunivanua vei keda? Vakayagataka na tabana ni itaviqaravi ni macawa oqo me vukei ira na gone me ra vakasamataka na sala e rawa ni vukei ira kina na vakabauta me ra cakava na veika e vinakata na Kalou me ra cakava.

• Biuta e dua na iyaloyalo ni dua na ulunivanua ena dua na yasa ni rumu. Kerei ira na gone me ra cavuta eso na ka e rawa ni ra cakava me levu cake kina na nodra vakabauti Jisu Karisito. Na gone yadua e vakatura e dua na ka me qai tosoya voleka mai na ulunivanua ki na yasa ni rumu kadua. Wilika na Maciu 17:19–20, ka vakadinadinataka na mana ni vakabauta ki na nomu bula.

• Lagata vata e dua na sere ni vakabauta, vaka na “Vakabauta” (iVolanisere ni Gonelalai, 50). Solia vei ira yadua na gone e dua na sorenitei me ra kauta i vale. Sureti ira me ra lai tea na sorenitei ka biuta ena dua na vanua me rawa ni ra sarava toka kina na kena tubu me vukea nodra nanuma me ra vakabauta na Tamada Vakalomalagi kei Jisu Karisito.

ivakatakilakila ni veivakavulici

Vakavulica na iVunau: Gone Qase Cake

Maciu 16:13–17

Na vakadinadinataki Jisu Karisito e yaco mai ena ivakatakila.

Ena vukei ira vakacava na gone na ivakadinadina nei Pita ena Maciu 16:13–17 ena nodra taracake nodra ivakadinadina?

iTaviqaravi e Rawa ni Caka

• Taroga vei ira na gone se cava era na kaya ke dua e tarogi ira, “O cei o Jisu?” Sureti ira na gone me ra wilika na Maciu 16:13–17 me ra kila na ivakarau a sauma kina o Pita na taro oya. A rawata vakacava o koya na nona ivakadinadina kei Jisu? Na cava eda rawa ni cakava meda vaqaqacotaka kina na noda ivakadinadina?

• Vukei ira na gone me ra veidutaitaka na ivakarau eda kila kina na dina vakayalo mai na ivakarau eda kila kina na dina tale eso. Me ivakaraitaki, eda kila vakacava na kena balavu e dua na tamata se vakacava tu na ituvaki ni draki? Eda na kila vakacava ni o Jisu Karisito e sa Luve ni Kalou? Tukuna vei ira na gone na sala sa vakadinadinataka kina vei iko na Yalo Tabu me baleta na iVakabula.

• Wasea nomu ivakadinadina kei Jisu Karisito, ka bolei ira na gone me ra rawata se vaqaqacotaka na nodra dui ivakadinadina baleti Koya.

Maciu 16:15–19

Era liutaka na Lotu i Jisu Karisito o ira era taura tu na idola ni matabete.

Na vulici ni Maciu 16:15–19 sa rawa ni taracake na nodra vakabauta na gone ni Lotu i Jisu Karisito ni Yalododonu Edaidai sai koya na kena vakalesui mai na Lotu vata ga a tauyavutaka o Jisu ena Nona a bula voli e vuravura.

iTaviqaravi e Rawa ni Caka

• Vola na Maciu 16:19 ena papa, ka vakalutuka e vica na vosa, oka kina na vosa “idola.” Kerei ira na gone mera vakaraica na vosa e lutu tiko.

• Vakaraitaka na vidio “Where Are the Keys?” (ChurchofJesusChrist.org), se railesuva na “iDola ni Matabete” ena iDusidusi ki na iVolanikalou (scriptures.ChurchofJesusChrist.org). Na cava na idola ni matebete? Na sala cava e tautauvata kina kei na ki dina na idola ni matabete?

• Vukei ira na gone me ra lisitaka ena papa na tamata eso ka tu vei ira na idola ni matabete. “iDola ni Matabete” ena iDusidusi ki na iVolanikalou (scriptures.ChurchofJesusChrist.org) e tiko kina e dua na lisi e rawa ni vukei ira. Sureta e dua ena nomu tabanalevu ka tu vua na idola ni matabete oqo me wasea vei ira na kalasi na vuna sa rui bibi kina na idola oqori.

• Vunia e vica na idola (se iyaloyalo ni idola) ena loma ni rumu, ka sureti ira na gone me ra vaqara. Ni sa kune yadua na idola, vukei ira na gone me ra vakasamataka na veivakalougatataki eso eda dau marautaka ena vuku ni idola ni matabete (me vaka na, matavuvale tawamudu, papitaiso, kei na sakaramede).

Maciu 17:1–9

O Jisu Karisito e sa Luve ni Kalou.

Na veitikina oqo e vakamacalataka e dua vei ira e vica ga na gauna ena ivolanikalou a rogo kina na domo ni Kalou na Tamada ni vakadinadinataka tiko na Luvena Daulomani. Na vulici ni itukutuku oqo vata kei ira na gone e rawa ni taracake nodra vakabauti Jisu Karisito.

iTaviqaravi e Rawa ni Caka

• Sureti ira na gone me ra droinitaka na iyaloyalo ni veika e vakamacalataki ena Maciu 17:1–9. Kerei ira me ra vakamacalataka nodra droini vakai ira. (Raica na “Wase e 33: Sa Rairai Mai ena Lagilagi: Na Veivakamataliataki,” e Na iTukuni ena Veiyalayalati Vou, 78–79, se na kena vidio ena ChurchofJesusChrist.org.)

• Solia vei ira na gone na gauna me ra vakasamataka kina vakatitobu na cava e vakavulica vei ira na itukutuku ena Maciu 17:1–9 me baleti Jisu Karisito. Sureti ira me ra vola na nodra nanuma ena papa. Sureta ira na gone me ra wasea na sala era kila kina ni o Jisu Karisito e sa Luve ni Kalou.

ivakatakilakila ni vuli

Vakauqeta na Vuli e Vale

Sureti ira na gone me ra tarogi ira nodra itubutubu se so tale na lewe ni matavuvale ena sala era a rawata kina na nodra ivakadinadina me baleti Jisu Karisito.

Vakatorocaketaki Noda Veivakavulici

Vakayagataka na sere ivakatagi. Na sere ni Lalai kei na serenilotu e rawa ni vukei ira na gone ena itabayabaki kecega me ra kila ka nanuma na dina vakosipeli. Na lagasere sa rawa talega ni vakabulabulataka na nodra vuli-ka na gone . (Raica na Veivakavulici ena iVakarau ni iVakabula,, 22.)

tabana ni itaviqaravi: e rawa ni cakamana noda vakabauta