Na Kai Samaria Dauloloma, mai vei Dan Burr

17–23 ni Epereli

Maciu 18; Luke 10

“A Cava Me’u Kitaka Me’u Rawata Kina na Bula Tawamudu?”

Na dina cava soti ena Maciu 18 kei na Luke 10 era gadreva na gone me ra vulica? Vakarogoca na veivakauqeti ni Yalo Tabu ni o wilika na iwase eso oqo. Lako Mai, Mo Muri Au—Me Baleti Ira na Tamata Yadua kei na Matavuvale e rawa ni veivuke me dusimaka nomu vuli, ka rawa ni solia vei iko na ituvatuva oqo eso na vakasama ni veivakavulici.

Sureta na Veiwasei

Kerei ira na gone mera wasea na veika era sa vulica me baleti Jisu Karisito mai vale se ena Lalai.

Vakavulica na iVunau: Gone Sobu

Maciu 18:21–35

E dodonu meu dau vosoti ira na tani e veigauna.

Ni o wilika na Maciu 18:21–35, vakasamataka na veika o sa sotava ena veivosoti kei na veika e dodonu me ra kila na gone me baleta na ivakavuvuli oqo.

iTaviqaravi e Rawa ni Caka

• Tukuna na italanoa vakaibalebale ni dauveiqaravi tawa dauloloma (raica na Maciu 18:23–35). Vakamacalataka ni dua na tamata e cakava vei keda e dua na ka e sega ni vinaka se dodonu, eda na cudru se rarawa mada e liu. Ia na veivosoti e kena ibalebale ni da na rawa ni vakila tale na vakacegu. Ni da vosota e dua, eda sa navuca me kakua tale ni da qai cudruvi ira. (Vukei ira na gone me ra kila ni kevaka e dua e yaloca se tawa dodonu vei ira, e dodonu me ra kerei ira na nodra itubutubu se dua tale na qase nuitaki me veivuke.)

• Vola Au sa vosoti iko ena papa, ka tukuna vei ira na gone ni veivosa oqori e rawa ni vukica na veigauna rarawa me gauna ni marau. Droinitaka e dua na mata rarawa ena papa, ka wasea eso na ivakaraitaki ni nodra veivosovosoti na gone. Ni oti na ivakaraitaki yadua, sureta e dua na gone me veisautaka na mata rarawa me mamarau.

• Lagata kei ira na gone e dua na sere me baleta na veivosoti, me vaka na “Ni Vukei Au Mai Noqu Kalou” (iVolanisere ni Gonelalai, 52). Wasea nomu ivakadinadina ni na vukei keda na Tamada Vakalomalagi me da vosoti ira na tani.

Luke 10: 25–37

E vakavulici au ko Jisu meu raici ira na tamata kecega me vaka era sa wekaqu ka lomani ira.

Na italanoa vakaibalebale ni kai Samaria dauloloma e rawa ni vakaraitaka vei ira na gone se o cei o ira na wekada kei na ivakarau me da qaravi ira kina. Vakasamataka na sala eso o rawa ni vakauqeti ira kina na gone me ra “lako …, ka kitaka vakakina” (Luke 10:37).

iTaviqaravi e Rawa ni Caka

• Tarogi ira na gone yadua, “O cei na wekamu?” Vakalekalekataka na itukutuku ena Luke 10:25–37, ka wasea na sala a sauma kina o Jisu na taro oya. Na cava a vakavulica o Jisu me baleta na sala meda qaravi ira kina na wekada?

• Wilika na Luke 10:25–37 ni ra matanataka na gone na italanoa vakaibalebale ni kai Samaria dauloloma. Vukei ira me ra vakasamataka na sala eso era rawa ni vakataka kina na kai Samaria dauloloma ena nodra vakaraitaka na loloma kei na yalovinaka vei ira na tani.

• Vola e vica na ivakaraitaki ni ituvaki e gadreva kina e dua na veivuke, qai vunitaka wavoki na pepa ena rumu. Kerei ira na gone mera vakaraica mai na pepa eso oqori. Wilika na vei ituvaki, ka sureti ira na gone me ra wasea na ivakarau e rawa ni ra vakaraitaka kina na yalovinaka vua na tamata ena ituvaki oya.

• Lagata vata kei ira na gone e dua na sere baleta na yalovinaka, me vaka na “Dauloloma ko Jisu” se “Me Tekivu Vei Au” (iVolanisere ni Gonelalai, 39, 83). Vukei ira na gone me ra vakasamataka e vica na sala era vakaraitaka kina na loloma kei na yalovinaka vei ira na tani. Me ra droinitaka talega eso na kedra iyaloyalo ni ra cakava tiko na veika oqo.

Vakavulica na iVunau: Gone Qase Cake

Maciu 18:21–35

Ena vosoti au na Tamada Vakalomalagi ni’u vosoti ira na tani.

Na italanoa vakaibalebale ni dauveiqaravi tawa dauloloma e rawa ni sala guiguilecavi dredre me ra vakavulici kina ni vinakata na Tamada Vakalomalagi me da vosota na tamata kecega.

iTaviqaravi e Rawa ni Caka

• Wilika na Maciu 18:23–35 vata kei ira na gone. Vakamacalataka ni tui se turaga e matataka na Tamada Vakalomalagi, na tamata e matataki keda, kei na itokani e matataki ira era sa caka ca vei keda. Taroga vei ira na gone na taro me vaka “Na cava e vakavulica na italanoa oqo me baleta na ivakarau ni noda qaravi ira na tani? Ena gauna cava o sa bau kunea kina ni dredre mo vosota e dua? O qai vagalalataki iko vakacava mai na mosi ni yalo oqori? Na gauna cava beka o a gadreva kina mo vosoti ena dua na digidigi cala?”

• Vakaraitaka na vidio “Forgive Every One Their Trespasses: The Parable of the Unmerciful Servant” (ChurchofJesusChrist.org) me vukei ira na gone me ra raica na italanoa vakaibalebale oqo.

• Vola ena papa na fika vakalevutaki 70 × 7, ka vukei ira na gone me ra walia. Kerea e dua me wilika na Maciu 18:21–22, ka vakamacalataka ni a vakayagataka na iwiliwili oqo o Jisu me vakatavulici keda kina meda dau veivosoti e veigauna kecega.

• Kerei ira na gone me ra vukei iko ni vakasamataka eso na ituvaki ena gadreva kina e dua me vosota e dua tale na tamata. Sureti ira na gone me ra matanataka na ivakarau me ra veivosoti kina ena veigauna vakaoqori.

• Lagata kei ira na gone e dua na sere me baleta na veivosoti, me vaka na “Ni Vukei Au Mai Noqu Kalou” (iVolanisere ni Gonelalai, 52). Vukei ira na gone me ra kila na cava e vakavulica vei keda na sere me baleta na vosoti ira na tani.

Luke 10:30–37

Au rawa ni lomani ka qaravi ira na tani, vakauasivi o ira na leqa tu.

Vakananuma vakatitobu na gauna ni nomu bula a “kai Samaria dauloloma” kina vei iko e dua. E rawa vakacava mo vakauqeti ira na gone me ra “kai Samaria dauloloma” vei ira na tani?

iTaviqaravi e Rawa ni Caka

• Lesi ira yadua na gone me ra wilika vakamalua e dua na tiki ni italanoa vakaibalebale ni kai Samaria dauloloma. Sureti ira na gone me ra tukuna na nodra tiki ni italanoa vakaibalebale ena kena ituvatuva ni veika a yaco.

• Vakamacalataka vei ira na gone ni ra dau cati ira vakalevu na kai Samaria o ira na Jiu ka ni gauna era dau taubale kina mai Jerusalemi ki Kaleli, era dau vakatikitikitaki Samaria me ra kakua kina ni veisotari kei ira na kai Samaria. Me raici oqo, vakaraitaka na mape 1 ni iVolatabu, “Palesitaini ena Gauna i Jisu.” Cava beka na vuna a vakayagataka kina o Jisu e dua na kai Samaria me ivakaraitaki ni yalo vinaka ena italanoa vakaibalebale oqo? Na cava eda vulica ena italanoa oqo me baleta na nodra vukei na vakaleqai tu? (Raica talega na Mosaia 4:16–22.)

• Kerei ira na gone me ra wasea e dua na gauna a vaka me kai Samaria dauloloma kina vei ira e dua.

• Bolei ira na gone me ra biuta e dua na takete me ra vaka na kai Samaria dauloloma ena macawa oqo. O na rawa ni tarogi ira se ra kila tu beka e dua e tauvimate se galili tu se dua e sega ni dau mai lotu wasoma. Tarogi ira na gone me ra na vukea vakacava na tamata oqori. Vukei ira na gone me ra kila na sala e vukei ira kina na nodra qaravi ira na tani me ra maroroya na yalayala era a vakayacora ena papitaiso (raica na Mosaia 18:8–10).

Vakauqeta na Vuli e Vale

Sureti ira na gone me ra wasea ki na nodra matavuvale na ka era sa navuca me ra cakava me levu cake kina na nodra veivosoti se me ra vakataka na kai Samaria dau loloma ena macawa oqo.

Vakatorocaketaki Noda Veivakavulici

Vakavulici ira na gone me ra vola na veika era uqeti kina. Kevaka era sa vulica rawa na gone me ra dau vola na veika era uqeti kina, ena vukei ira me ra vakila ka muria na Yalo. E rawa ni ra vola na gone na veika era uqeti kina ena vakatakilakilataki ni ivolanikalou, droinitaki iyaloyalo, se vakacurumi itukutuku rawarawa ena ivolaniveisiga.