O Jisu kei na yalewa sa bale ena qele

Au Sa Sega Talega ni Lewai Iko Mo Cudruvi, mai vei Eva Koleva Timothy

24–30 ni Epereli

Joni 7–10

“Oi Au na iVakatawa Vinaka”

Ni o wilika na Joni 7–10, vakasamataki ira na gone o vakavulica. Vuqa na vakasama me baleti ira na gone qase cake ena ituvatuva oqo e rawa ni moici me ganiti ira na gone sobu, se kena veibasai.

ivakatakilakila ni veiwasei

Sureta na Veiwasei

Vakananuma vei ira na gone e dua na ka o a sureti ira me ra cakava ena dua na lesoni sa oti. Kerei ira me ra wasea na veika era a cakava me ra cakacakataka kina na veisureti oya.

ivakatakilakila ni veivakavulici

Vakavulica na iVunau: Gone Sobu

Joni 7:14–17

Na muri ni ivunau ena vukei au ni kila ni ra sa dina.

A vakavuvulitaka o Jisu ni da na rawata e dua na ivakadinadina ni veika dina a wasea o Koya ni da sa bulataka. Na vakacegu eda vakila ni da sa talairawarawa ki na ivunau ena vukei keda ni kila ni ra sa dina. Navuca na sala o rawa ni vakavulica kina vei ira na gone na dina oqo.

iTaviqaravi e Rawa ni Caka

• Vakalekalekataka na Joni 7:17 ena vosa eso era na kila na gone. Vukei ira me ra kila ni talairawarawa ki na ivunau ena vukei keda me da voleka cake vei Jisu Karisito. Me ivakaraitaki, e rawa ni o lagata vata e dua na sere me vaka na “Talairawarawa ki na iVunau” se “Digitaka na Dodonu” (iVolanisere ni Gonelalai, 68, 82). Kerei ira na gone me ra vakarogoca na sala eda na vakalougatataki kina ni da muria na ivunau.

• Wasea e dua na gauna o a rawata kina e dua na ivakadinadina ni sa mai vua na Kalou na ivunau baleta ni o sa bulataka, me vaka na saumi ikatini se na vosoti ni dua a caka ca vei iko. Sureti ira na gone me ra vakasamataka e dua na ka era a sotava ni ra a talairawarawa ki na dua na ivunau. Kerei ira me ra wasea na cava era a vakila ni ra talairawarawa tu.

• Kerei ira na gone me ra droinitaka na kedra iyaloyalo ni ra muria tiko e dua na vunau. (Vukei ira mera vakasamataka eso tale na ivakaraitaki.) Sureti ira me ra veiwaseitaka vakai ira na nodra i yaloyalo ka veivosakitaka na marau era rawata mai na muri ni vunau oya.

Joni 8:29

Sa talairawarawa vei Tamana o Jisu.

E dau cakava o Jisu Karisito na veika me marau kina na Tamana mai Lomalagi. O na vukei ira vakacava na gone me vakaraica na sala eso me ra muria kina na Nona ivakaraitaki?

iTaviqaravi e Rawa ni Caka

• Vukei ira na gone me ra tokaruataka na veika a tukuna o Jisu me baleti Tamada Vakalomalagi ena Joni 8:29: “Ni’u sa kitaka tikoga na ka sa vinakata ko koya.” Kerei ira me ra wasea na veika a vakayacora o Jisu me marau kina na Tamada Vakalomalagi. Vakaraitaka vei ira eso nai yaloyalo mai na iVola ni iYaloyalo Vakosipeli me solia eso na vakasama.

• Tarogi ira na gone se cava e dau vakamarautaki ira. Sureta na itubutubu ni dua na gone me wasea e dua na gauna a cakava kina na gone oya e dua na ka e vakamarautaka kina na itubutubu. Na cava eda rawa ni cakava me da vakamarautaka kina na Tamada Vakalomalagi? Sureti ira na gone me ra droinitaka na kedra iyaloyalo ni ra cakava tiko na veika oqori ka me ra kauta i vale me dau vakananumi ira tu.

Joni 10:1–16

E kilai au ka lomani au o Jisu.

Na vosa vakatautauvata ni ivakatawa vinaka e rawa ni vukei ira na gone me ra kila ni sa lomani ira o Jisu ka kila tu se o cei o ira.

iTaviqaravi e Rawa ni Caka

• Solia vei ira na gone nai yaloyalo eso ka matataka e dua na ka mai na vosa vakatautauvata ni ivakatawa vinaka, me vaka na sipi, dua na ivakatawa, se dua na olifa. Digitaka eso na tikina mai na Joni 10:1–16 mo wilika vei ira na gone, ka kerei ira me ra taura cake na nodrai yaloyalo ni ra rogoca ni o cavuta na veika e tiko ena nodrai yaloyalo. Vukei ira na gone me ra vakasamataka na sala eso e vaka kina e dua na ivakatawa vei keda o Jisu. Wasea na nomu ivakadinadina ni sa lomani keda na iVakabula ka na tuberi keda lesu ki Vua.

• Vakaraitaka nai yaloyalo kei Jisu kei ira na lami ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale. Eda kila vakacava ni sa lomani ira na lami o Jisu? Eda kila vakacava ni sa lomani Jisu o ira na lami? Me da vakaraitaka vakacava vei Jisu ni da sa lomani Koya?

ivakatakilakila ni veivakavulici

Vakavulica na iVunau: Gone Qase Cake

Joni 7:14–17

Na muri ni ivunau ena vukei au ni kila ni ra sa dina.

O iko kei ira na gone o vakavulica ena dui tu beka na veika o ni sotava ena bulataki ni dina va kosipeli kei na vulici ni kena dina. O rawa vakacava ni yavutaki iko ena veika oqori ni o veivakavulici?

iTaviqaravi e Rawa ni Caka

• Vola na veitikina yadua ni Joni 7:14–17 ena tikinipepa duidui eso, ka tuvai ira me ra veicurumaki tu. Kerei ira na gone me ra tuvana vakadodonu ka veidutaitaka kei na Joni 7:14–17 me ra raica ke sa donu. Sureti ira na gone me ra veisasa ka wasea kei na kedra isa na veika era sa kila mai na tikina yadua. Sa vukei ira vakacava me ra kila na dina ni vunau na talairawarawa ki na ivunau ni Kalou?

• Wasea na ivakaraitaki eso mai na ivolanikalou ka vakaraitaka na sala era a vakalougatataki kina na tamata ena nodra bulataka na dina ni kosipeli, me vakataki Taniela (raica na Taniela 6) se Ilisapeci (raica na Luke 1:5–14). Na veivakalougatataki cava soti sa soli vei keda me baleta na talairawarawa ki na ivunau?

• Ni vo e vica na siga ni bera na kalasi, sureta e dua na gone me vola mai e dua na gauna a rawata kina e dua na ivakadinadina ni dua na ivunau ena nona a bulataka. Ena gauna ni kalasi, kerea na gone oqori me wasea na veika sa vola mai.

Joni 8:31–36

Na dina e rawa ni sereki au.

Eso na tamata era nanuma ni bulataki ni kosipeli e vesuki ira. O na vakayagataka vakacava na Joni 8:31–36 me vukei ira na gone me ra kila na bulataki ni kosipeli e sereki keda vakaidina?

iTaviqaravi e Rawa ni Caka

• Sureti ira na gone me ra wilika na Joni 8:31–36 ka wasea na nodra nanuma se cava na kena ibalebale me da bobula tu ki na ivalavala ca. E vukei keda vakacava na ivakavuvuli i Jisu me da sereki?

• Vakaraitaka e dua na loka me matataka na ivalavala ca kei na dua na ki me matataka na kena rawa ni sereki keda na dina ni kosipeli. Me ivakaraitaki, na kilai ni Veisorovaki ni iVakabula sa rawa ni sereki keda me da veivutuni ka vosoti mai na noda ivalavala ca. Se na kilai ni Vosa ni Vuku sa rawa ni sereki keda ni levea na veivakatotogani eso.

Veivakavulici ena valetabu o Karisito

A vakatavulica o Jisu, “Ia na ka dina ena sereki kemudou” (Joni 8:32).

Joni 10:1–18

O Jisu sa vaka e dua na ivakatawa kivei au.

Ni o vulica na vosa vakatautauvata ni ivakatawa vinaka, vaqara na dina e vakavuvulitaka me baleta na noda veimaliwai kei na iVakabula. Ena vakalougatataki ira vakacava na gone na kilai ni dina eso oqo?

iTaviqaravi e Rawa ni Caka

• Vola na ivakatawa vinaka kei na ivakatawa saumi ena papa ni volavola. Vakamacalataka ni ivakatawa saumi e dua ka saumi vakailavo me cakava e dua na cakacaka. Kerei ira na gone me ra vola na duidui eso era raica ena Joni 10:1–18 vei rau na ivakatawa vinaka kei na ivakatawa saumi. Cava na vuna o via muria ga kina na ivakatawa vinaka mai vua na ivakatawa saumi? E sa vaka tu vakacava na ivakatawa vei keda o Jisu?

• Droinitaka se vakaraitaka nai yaloyalo ni dua na katuba. Wilika vata na Joni 10:7–9, ka tarogi ira na gone se sa vaka tu vakacava na katuba o Jisu. Ena tikina e 9, na veivakalougatataki cava so e basika vei ira ka “curu tu” ena katuba? Eda curu vakacava ena katuba sa vakarautaka tu vei keda o Jisu Karisito?

ivakatakilakila ni vuli

Vakauqeta na Vuli e Vale

Vukei ira na gone me ra vakasamataka e dua na ivunau e rawa ni ra muria vakavinaka cake. Kerei ira me ra tovolea me ra muria na ivunau oya ena macawa mai oqo.

Vakatoroicaketaki ni Noda Veivakavulici

Taroga na taro e veivakauqeti. Taroga na taro e sureti ira na gone o vakavulica me ra lako sivita na tukunika walega. Ia, vakauqeti ira me ra wasea na nodra ivakadinadina ena dina ni kosipeli. Me ivakaraitaki, kevaka o ni veivosakitaka na ivunau, rawa ni o kerei ira na gone me ra wasea na sala e sa vakalougatataki ira kina na ivunau.

tabana ni itaviqaravi: Sa lomani au o Jisu