mokota tu na luvena tagane o tamana

Na Gonetagane Cidroi, mai vei Liz Lemon Swindle

1–7 ni Me

Luke 12–17; Joni 11

“Tou Mai Reki Vata; Ni’u Sa Kunea na Noqu Sipi ka Yali”

Wilika ena masumasu na Luke 12–17 kei na Joni 11, ni qarai na sala o rawa ni vukei ira kina na gone o vakavulica me ra kila matua na dina eso ena veiwase oqo ka vakila na loloma ni Tamada Vakalomalagi.

ivakatakilakila ni veiwasei

Sureta na Veiwasei

Vakananuma vei ira na gone na vosa vakatautauavata kei nai talanoa eso e kune ena Luke 12–17 kei na Joni 11, ka sureti ira me ra wasea na ka era kila me baleta nai talanoa eso oqo.

ivakatakilakila ni veivakavulici

Vakavulica na iVunau: Gone Sobu

Luke 15

Sa gadreva na Tamada Vakalomalagi me ra lesu taucoko Vua na Luvena.

Vakasamataki ira na gone ena nomu kalasi, oka kina o ira ka sega ni dau tiko wasoma. O rawa vakacava ni vukei ira me ra vakila na loloma ni Tamada Vakalomalagi? O rawa vakacava ni vakauqeti ira na gone tale eso me ra vukei iko ni sudra yani vei ira ena loloma?

iTaviqaravi e Rawa ni Caka

• Solia ki na dua na gone na ilavosiliva, dua tale na gone nai yaloyalo ni sipi, kei nai yaloyalo ni gonetagane cidroi ki na dua tale na gone (raica na ChurchofJesusChrist.org se na tabana ni taviqaravi ni macawa oqo). Tukuna na vosa vakatautauvata e tolu e kune ena Luke 15 ka sureti ratou na gone me taura cake na nodratou ilavosiliva se iyaloyalo ni o cavuta tu. O rawa ni sureti ira na gone mera talanoataka tale vakataki ira na vosa vakatautauvata eso ena nodra vosa ga.

• Kerei ira na gone me ra wasea na gauna era a vakayalia kina e dua na ka. Era qai kunea vakacava? Vakamacalataka ni sa rawa ni yaco me yali vakayalo na tamata ni ra sega ni muria na Tamada Vakalomalagi. Vakadinadinataka ni sa vinakata na Kalou na tamata ka sa yali tu me ra lako mai Vua, ka rawa ni da vukei ira.

• Sureti ira na gone me ra vakasamataki ira na vo ni gone ka sega ni dau lako mai ki na soqoni ni Lalai. Vukei ira me ra rokarokataki se volavola ni sureti ira tu na gone oqo me ra mai tiko ena Lalai se dua na itaviqaravi ni Lalai. Na sala cava tale eda rawa ni vukei ira kina na gone oqo mera vakila na loloma ni Tamada Vakalomalagi kivei ira?

Luke 17:11–19

Au rawa ni vakaraitaka na noqu lomana na Tamada Vakalomalagi ena noqu vakavinavinakataka na noqu vakalougatataki.

E rawa ni vakauqeti ira vakacava na gone na talanoa ni le tini na vukavuka me ra dau vakavinavinaka?

iTaviqaravi e Rawa ni Caka

• Tukuna nai talanoa ni le tini na vukavuka ka a vakabulai ira o Jisu. Vakaraitaka nai yaloyalo e kune ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale ka sureti ira na gone me ra wiliwili ki na tini ena nodra iqaqalo. Qai kerei ira me ra lokia e ciwa na qaqalo me vakaraitaka na le dua na vukavuka ka a vakavinavinaka vei Jisu. Vukei ira na gone me ra vakasamataka e dua e rawa ni ra vakavinavinakataka me baleta e dua na ivalavala vinaka se veivukei.

• Sureta na gone yadua me matanataka e dua na ka era vakavinavinakata, ka me ra qai vakilakila na vo ni gone se cava oya. Kerei ira na gone me ra wasea na vei sala eda rawa ni vakaraitaka kina vua na Tamada Vakalomalagi ni da vakavinavinakataka na noda vakalougatataki.

Joni 11:1–46

Keimami vakabauta ni sa Luve ni Kalou o Jisu.

A kaya vei Jisu o Marica, na ganei Lasarusa: “Au sa vakadinata ni sa Karisito koi kemuni, na Luve ni Kalou” (Joni 11:27). Sa rawa ni vaqaqacotaka na nodra vakadinadinataki Jisu Karisito na gone nai talanoa kei Meri, Marica, kei Lasarusa.

iTaviqaravi e Rawa ni Caka

• Vakalekalekataka na talanoa kei Jisu ni vakaturi Lasarusa cake mai na mate (raica talega na “Wase e 43: Vakabulai Lasarusa Mai na Mate o Jisu,” e Na iTukuni ena Veiyalayalati Vou, 107–9, se na kena vidio ena ChurchofJesusChrist.org). Vakaraitaka vei ira na gone e dua na taba ni kau madu kei na dua na itei bula, ka tarogi ira se koya e vei e ka mate, kei koya e bula tiko. Wasea na nomu vakadinadina ni ena vuku ni kaukauwa i Jisu Karisito, era na tucake tale na tamata sa mate ka bula tawayalani tu.

• Vukei ira na gone ni cavuqaqataka na malanivosa a kaya o Jisu vei Marica: “Oi au na vu ni tucake tale, kei na vu ni bula” (Joni 11:25). Vakamacalataka ena vuku ni Tucaketale ni iVakabula, eda na raici ira tale na noda daulomani ka sa mate.

ivakatakilakila ni veivakavulici

Vakavulica na iVunau: Gone Qase Cake

Luke 15

Au rawa ni vukei Jisu ni kunea na Nona sipi yali tu.

Eda sa kila taucoko e dua ka sa vaka tu na sipi yali ena so na gauna, na tikinisiliva yali, se na gone cidroi ena vosa vakatautauvata ni iVakabula. Vakasamataka na sala o rawa ni vakauqeti ira kina na gone me ra sudra yani vei ira na tamata oqo ena loloma.

iTaviqaravi e Rawa ni Caka

• Vukei ira na gone ni wilika na vosa vakatautauvata ni sipi ka yali se na vosa vakatautauvata ni tikinisiliva ka yali e kune ena Luke 15:1–10, ka wasea na ka era vulica.

• Vola na yaca eso oqo ena papa ni volavola: tamana, luvena tagane qase, kei na luvena tagane gone. Vakaraitaka na vidio “The Prodigal Son” (ChurchofJesusChrist.org) ka cegu vagauna me rawa ni ra vola na gone ena papa ni volavola na nanuma eso ni tamata era volai tu. Na cava e nanuma tu beka na Tamada Vakalomalagi kei Jisu me baleti ira na valavala ca tu?

• Kerea e dua na gone me vagalala mai na rumu ni ra vunitaka na vo ni gone e dua na ilavosiliva se dua na sipi pepa. Me qai lesu mai na gone ka vakaraica na ilavosiliva se sipi. Na sala cava eso era rawa ni vakila kina na tamata ni ra sa “yali” me vaka na ilavosiliva se na sipi? Sureti ira na gone me ra vakatura na sala eso era rawa ni sudra yani kina vei ira. Lagata vata kei ira na gone e dua na sere veisemati, vaka na “Talei Vua na iVakatawa” (Serenilotu, naba 130), ka vakadinadinataka na reki e dau basika ni ra lesu na tamata kivua na Kalou.

• Vakamacalataka ni vakayagataka o Jisu na sipi ka yali, na tikinisiliva ka yali, kei na gone cidroi me matataki ira na tamata era sa “yali” baleta ni sega ni tiko vei ira na veivakalougatataki ni kosipeli. Sureti ira na gone me ra vakasamataki ira na tamata era kila ka sega ni tiko vei ira na veivakalougatataki oqo ena nodra bula. Na cava era rawa ni cakava me vukei ira na tamata oqo ni vakila na loloma ni Tamada Vakalomalagi kivei ira?

Jisu kei na sipi

iVakatawa Yalomalua, mai vei Yongsung Kim

Luke 17:11–19

Au rawa ni vakaraitaka na noqu lomana na Tamada Vakalomalagi ena noqu vakavinavinakataka na noqu vakalougatataki.

Nai talanoa ni le tini na vukavuka sa rawa ni dua na sala vinaka me ra vakauqeti kina na gone ni vakaraitaka na vakavinavinaka kivua na Tamada Vakalomalagi me baleta nodra vakalougatataki.

iTaviqaravi e Rawa ni Caka

• Wilika vata na talanoa ni le tini na vukavuka. A vakalougatataki beka vakacava na vukavuka ka a mai vakavinavinaka? Cava na vuna e bibi me vakavinavinakataki kina na Kalou ena vuku ni noda vakalougatataki?

• Sureti ira na gone me ra vola na veika era vakavinavinakataka e tekivu ena matanivola yadua ni yacadra.

• Kerea na gone me ra vola na ivola ni vakavinavinaka kivua na Tamada Vakalomalagi ena veivakalougatataki e solia vei ira o Koya. Era rawa ni vakaliliga na ivola ena yasa ni nodrai davodavo me vakananumi ira ni cavuta na nodra vakavinavinaka ni ra masu.

Joni 11:1–46

Keimami vakabauta ni sa Luve ni Kalou o Jisu.

O na vakayagataka vakacava nai talanoa kei Meri, Marica, kei Lasarusa mo vukei ira na gone ni kila, me vakataki Marica, ni o Jisu “sa Karisito, na Luve ni Kalou”? (Joni 11:27).

iTaviqaravi e Rawa ni Caka

• Vola ena papa ni volavola eso na malanivosa era a cavuta na tamata ena Joni 11. Kerei ira na gone me ra vakatakila o cei a cavuta na malanivosa yadua, ka sureti ira me ra vaqara ena Joni 11 me ra raica na kena isau. Na vakacava tu na nodra nanuma ke o ira o Jisu, Marica, Meri, se o Lasarusa? E rawa vakacava ni vukei keda na vakabauti Jisu ni da sa rarawa se rere tu?

• Wilika nai vakadinadina i Marica, ka kunei ena Joni 11:20–27. Kerei ira na gone me ra vakaraica na vosa kei na malanivosa eso e vakaraitaka ni sa vakabauti Jisu Karisito o Marica. Na cava eda rawa ni cakava me da vakabauti Koya?

• Vukei ira na gone ni cavuqaqataka na Joni 11:25. Vakamacalataka ni tamata kece ena tucake tale, ia na yalododonu duadua ga ena rawata na bula tawamudu ka bula tale vata kei na Tamada Vakalomalagi kei Jisu Karisito.

ivakatakilakila ni vuli

Vakauqeta na Vuli e Vale

Solia vei ira na gone eso na pepa era rawa ni vakayagataka me vola se droinitaka kina na veika era sa vakavinavinakataka ena loma ni macawa.

Vakatorocaketaki Noda Veivakavulici

Sa dua na idola ni vulika na tukuni vakavica ni ka. Dau yaga vei ira na gone na caka vakavica ni rogoci ni dua na ivakavuvuli ni kosipeli se vakayacori ni dua na itaviqaravi. Tovolea mo tokaruataka na itaviqaravi ena sala duidui eso.

tabana ni taviqaravi: Au rawa ni vukei Jisu ni kunea ka kauta lesu mai na Nona sipi yali tu