Na iKarua ni Lako Mai, mai vei Harry Anderson

22–28 ni Me

Josefa Simici—Maciu 1; Maciu 24–25; Marika 12–13; Luke 21

“Ena Lako Mai na Luve ni Tamata”

Vakananuma titobu na cava era gadreva me ra vulica na gone o vakavulica mai na Josefa Simici—Maciu 1; Maciu 24–25; Marika 12–13; kei na Luke 21. E rawa ni o moica na vakasama e ganiti ira na qase cake ena ituvatuva oqo me baleti ira na gone sobu kei na kena veibasai.

Sureta na Veiwasei

Kauta mai ki na kalasi e dua na iyaya se iyaloyalo ka semati ki na dua na vosa vakatautauvata se italanoa ena wiliwili ena macawa oqo (me vaka na waiwai me matataka na tini na goneyalewa se ilavo siliva me matataka na taledi se na ilavo lalai ni yada). Kerei ira na gone me ra wasea na ka era kila me baleta na vosa vakatautauvata se italanoa.

Vakavulica na iVunau: Gone Sobu

Josefa Simici—Maciu 1:31

Ena vunautaki yani na kosipeli ki vuravura taucoko, ni bera ni lako tale mai ko Jisu.

E dua na ivakatakilakila ni na lesu totolo mai o Jisu oya ni sa vunautaki tiko na Nona kosipeli e vuravura taucoko. E rawa ni ra veivuke na gone ena vakayacori ni parofisai oqo ena wasei ni kosipeli.

iTaviqaravi e Rawa ni Caka

• Vakaraitaka e dua na mape, se iyaloyalo ni vuravura (raica na iVola ni iYaloyalo Vakosipeli, naba 3) ka vukei ira na gone me ra kaya, “Na Kosipeli oqo … ena vunautaki yani ki vuravura taucoko” (Josefa Simici—Maciu 1:31). Cava na vuna e vinakati ira kece kina na Luvena na Kalou me ra rogoca na Nona kosipeli?

• Sureti ira na gone me ra tayabe ni ra tu ga vakadua ka lagata vata e dua na sere me baleta na wasei ni kosipeli, me vaka na “Au Bole Meu sa Kaulotu Edai” se “Kacivi mo Veiqaravi” (iVolanisere ni Gonelalai, 90, 94).

• Vakaraitaka na vidio “I‘ll Go Where You Want Me to Go” (ChurchofJesusChrist.org). Ni ra sarava tiko na gone, vukei ira me ra wilika na sala eso e rawa ni ra wasea kina na kosipeli era raica ena vidio. Na sala cava tale eso me wasei kina na kosipeli era rawa ni vakasamataka?

Na kosipeli ena vunautaki ki vuravura taucoko. iTaba iLoloma mai na NASA Johnson Space Center

Maciu 25:14–30

Au rawa ni vakayagataka na isolisoli sa solia vei au na Kalou.

Era sa kunea tiko na gonelalai na nodra isolisoli kei na ka era rawata. Vukei ira me ra kila ni veisolisoli kei na ka era rawata oqo e sa vu mai vua na Tamada Vakalomalagi.

iTaviqaravi e Rawa ni Caka

• Kauta mai e vica na tikinisiliva mo vakayagataka ni o tukuna na italanoa vakaibalebale ni taledi, e kunei ena Maciu 25:14–30. E rawa ni o kerea e tolu na gone me ratou matataka na dauveiqaravi e tolu. Vakamacalataka ni ena gauna i Jisu, na taledi sa vakaibalebaletaki ki na ilavo, ia nikua na taledi sa rawa ni kena ibalebale na noda isolisoli kei na ka eda rawata.

• Kerei ira na gone me ra tukuna na sala eso e sa vukei ira kina na nodra itubutubu, tacidra, qasenivuli, se itokani. Na cava soti e tu vei ira na tamata oqo e sa vukei ira me qaravi ira kina na tani?

• Vola e dua na itukutuku lailai vei ira na gone ka tukuna vei ira yadua baleta na isolisoli se rawaka eso o raica rawa vei ira. Ni o wasea vei ira yadua na gone na isolisoli o raica vei ira, vakayaloqaqataki ira me ra vakavinakataka na nodra isolisoli ka vakayagataka me ra qaravi ira kina na tani.

Maciu 25:31–46

O Jisu e vinakati au meu qaravi ira na tani.

Eda qaravi Tamada Vakalomalagi kei Jisu Karisito ena noda qaravi ira na tamata era wavoliti keda tu. Vukei ira na gone me ra vakasamataka na sala eso e rawa ni ra qaravi ira kina na tani.

iTaviqaravi e Rawa ni Caka

• Vakalekalekataka na italanoa vakaibalebale ena Maciu 25:34–46. Vukei ira na gone me ra kila ni gauna eda qaravi ira tiko kina na tani, eda sa qaravi Jisu tiko.

• Taura cake e dua na iyaloyalo ni dua na gone ka vunitaki toka e dakuna na iyaloyalo kei Jisu. Na cava eda rawa ni cakava meda qarava kina na gone oqo. Vagalalataka na iyaloyalo ni gone ka vakamacalataka ni gauna eda veiqaravi vakataki keda kina, eda sa qaravi Jisu tiko.

• Sureti ira na gone me ra droinitaka na kedra iyaloyalo ni qaravi ira tiko na tani ena ivakarau e vakamacalataka na iVakabula ena Maciu 25:35–36. Kerei ira na gone tale eso me ra vakilakila mai na ka era droinitaka tiko.

• Sureti ira na gone me ra wasea na veika era sotava ni vakaraitaka na veiqaravi Vakarisito kivei ira se na nodra matavuvale e dua.

Vakavulica na iVunau: Gone Qase Cake

Josefa Simici—Maciu 1:31

Ena vunautaki yani na kosipeli ki vuravura taucoko, ni bera ni lako tale mai ko Jisu.

E rawa ni ra veivuke na gone o vakavulica ena vunautaki ni kosipeli ki vuravura taucoko ni bera nai Karua ni Lako Mai ni iVakabula.

iTaviqaravi e Rawa ni Caka

• Sureti ira na gone me ra wasea na veivakalougatataki era sa ciqoma oti se ra na ciqoma baleta ni ra sa lewe ni Lotu i Karisito. Wilika vata na Josefa Simici—Maciu 1:31, ka taroga vei ira na gone na ivakarau ena vakalougatataki ira kina na luve ni Kalou e vuravura taucoko na kosipeli.

• Vakaraitaka vei ira na gone e dua na mape ni vuravura se nomu matanitu, ka vukei ira ni vakatakila eso na vanua e a lai vunautaka kina na kosipeli e dua na lewe ni matavuvale se itokani ena gauna ni kaulotu.

• Sureta e vica na gone me ra vakavakarau mai ni wasea na iwalewale era a vakatakilaitaki kina ki na kosipeli na nodra lewe ni matavuvale se o ira na tubudra.

• Kerei ira yadua na gone me ra vola na yacana e dua e rawa ni ra veitalanoa vata kaya me baleti Jisu Karisito se sureta mai ki lotu. Kerei ira talega me ra vola na veika e rawa ni ra cakava me ra sa daukaulotu kina ena gauna oqo.

Maciu 25: 1–13

Sa noqu itavi na noqu saumaki vakataki au kivei Jisu Karisito.

Sa vakavulica vei keda na italanoa vakaibalebale ni tini na goneyalewa ni sega ni rawa ni da kerea mai vua tale e dua na noda saumaki kivua na iVakabula. O na vukei ira vakacava na gone me nodra itavi vakataki ira na nodra saumaki mai?

iTaviqaravi e Rawa ni Caka

• Kerea e dua na gone me vakavakarau mai me wasea na sala a vulica kina me baleta na italanoa vakaibalebale ni tini na goneyalewa e vale ena macawa oqo.

• Droinitaka e dua na cina vakawaiwai ena papa, ka vakayacana me ivakadinadina. Solia vei ira yadua na gone e dua na tikinipepa ka vaka na ibulibuli ni turu ni waiwai, ka kerei ira yadua me ra vola kina e dua na ka era na cakava mera saumaki vakalevu cake kina kivua na iVakabula. Vakabïra na nodra ituru ki na papa wavokita na cina.

• Sureti ira na gone me ra vukei iko ni cakava e dua na lisi ni ka eso me caka me vakavakarau ki na dua na vulagi dokai. E tautauvata se duidui vakacava na veika oqo mai na ivakarau eso eda rawa ni vakavakarau kina vakayalo ki nai Karua ni Lako Mai ni iVakabula.

• Ena lima na tikinipepa, vola kina na veika e sega ni rawa ni dau kerei. Ena lima tale na tikinipepa, vola kina na veika e rawa ni dau kerei. Veiwakitaka na tikinipepa oqori, ka kerei ira na gone me ra wasewasea ki na rua na ibinibini oqo. Wilika vata na Maciu 25:1–13. Na cava e bibi kina me da kakua ni vakararavi vei ira na tani me baleta na noda saumaki mai kivei Jisu Karisito?

Maciu 25:14–46

Ena iOtioti ni Veilewai, eda na solia vua na Turaga e dua na itukutuku ni noda bula.

Ni oti na Tucaketale, ena lewai keda na Turaga me vaka na noda talairawarawa ki na Nona ivakaro kei na noda ciqoma Nona solibula veisorovaki. Na italanoa vakaibalebale ni taledi kei na italanoa vakaibalebale ni sipi kei na me sa vakavulica vei keda baleta na iOtioti ni Veilewai oqo.

iTaviqaravi e Rawa ni Caka

• Sureta na veimama ni kalasi me wilika na Maciu 25:14–30 kei na veimama kadua me wilika na Maciu 25:31–46. Kerei rau na ilawalawa oqori me matanataka na italanoa vakaibalebale ki na kalasi. Na cava e vakatavulica tiko vei keda na Turaga ena italanoa vakaibalebale oqo?

• Sureti ira na gone me ra wilika yarua na Maciu 25:35–36 ka vola na veika era rawa ni cakava me vakaraitaka na nodra lomani Jisu Karisito.

Vakauqeta na Vuli e Vale

Kerei ira na gone me ra wasea vata kei na nodra matavuvale na sala eso era rawa ni daukaulotu vinaka cake kina ka veivosaki kei na nodra matavuvale me baleta na tamata era rawa ni wasea kina vei ira na kosipeli.

Vakatorocaketaki Noda Veivakavulici

Vakarogoca se matanataka e dua na italanoa. Baleta ni ra dau taleitaka na gone na italanoa, vaqara na sala eso me ra vakaitavitaki kina ena italanoa vakaivolanikalou o wasea. E rawa ni ra taura tu na iyaloyalo se iyaya eso, droinitaka na iyaloyalo ni talanoa, matanataka na italanoa, se veivuke ni tukuna na italanoa. Tokaruataka na italanoa me vukei ira ni kila na veika bibi matailalai kei na ivakavuvuli ni kosipeli.