3–9 ni Epereli

Siganimate

“Ko Iko Bulubulu, Sa Evei na Nomu Gumatua?”

Vakayagataka nomu gauna vata kei ira na gone me vukea nodra raica na Siganimate ni sa dua na gauna ni reki vua na iVakabula ka vakatitobutaka na nodra vakavinavinaka ena Nona solibula. Na vakasama eso ena ituvatuva oqo e rawa ni moici me vukea nomu vakavulici ira na gone ena itabayabaki cava ga.

Sureta na Veiwasei

Vakaraitaka na iyaloyalo ni iVakabula e Kecisemani, ena kauveilatai, kei na Nona Tucaketale (raica na iyaloyalo ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale kei na iVola ni iYaloyalo Vakosipeli, naba 56–60). Kerei ira na gone me ra wasea na ka era kila me baleta na veika e vakaraitaki tiko ena iyaloyalo.

Vakavulica na iVunau: Gone Sobu

Sa noqu iVakabula o Jisu Karisito.

Ni o wilika me baleta na Veisorovaki i Jisu Karisito, vakananuma titobu na ivakarau e rawa ni o vukei ira kina na gone me ra vakila na levu ni nona lomani ira o Jisu.

iTaviqaravi e Rawa ni Caka

• Vakaraitaka e dua na iyaloyalo kei Jisu, ka kerei ira na gone me ra wasea na veika era kila me baleta na veika a cakava vei keda o Koya. Wasea na nomu ivakadinadina me baleta na loloma ni iVakabula kei na Nona kaukauwa me vakabulai keda mai na ivalavala ca. Taura cake e dua na iloilo, me ra qai veivukevuke na gone ena nodra raici ira kina. Ni ra cakava vakakina na gone yadua, kaya sara yani, “O Jisu e lomani [yaca ni gone], ka rawa ni vukei [yaca ni gone] me lai bula tale vata kei Tamada Vakalomalagi.”

• Vakaraitaka na iyaloyalo Sa Masu o Jisu e Kecisemani (iVola ni iYaloyalo Vakosipeli, naba 56) ni o tukuna na italanoa ni vakararawataki nei Jisu mai Kecisemani me baleta na ivalavala ca ni kai vuravura (raica na Maciu 26:36–46; Luke 22:39–44). Vakamacalataka ni sa baleta na Nona vakararawataki, e sa rawa kina ni da vosoti ni da digidigi cala. E rawa ni o vakayagataka talega na “Wase e 51: Vosota na Rarawa o Jisu ena Were o Kecisemani” (e Na iTukuni ena Veiyalayalati Vou, 129–32, se na kena vidio ena ChurchofJesusChrist.org).

• Lagata vata e dua na sere baleta na loloma i Jisu ena vukuda, me vaka na “Au Vakilai Koya” (iVolanisere ni Gonelalai, 42). Vukei ira na gone me ra vakatakila na vosa eso ena sere e vakamacalataka na loloma ni iVakabula. Na cava e vukei keda meda vakila na Nona loloma? Eda na vukei ira vakacava na tani mera vakila na Nona loloma?

Sa Tucake o Koya, mai vei Greg Olsen

Baleta ni a mate ka tucake tale o Jisu, au na bula tale.

E rawa vakacava mo vukei ira na gone me ra kila ni ena vukui Jisu Karisito, eda na tucake tale ena dua na siga kei ira na noda daulomani?

iTaviqaravi e Rawa ni Caka

• Vakavulica vei ira na gone na italanoa ni Siganimate ni o vakayagataka na iyaloyalo kei Karisito e Kecisemani, ena kauveilatai, vakakina ni oti Nona Tucake Tale (raica na iVola ni iYaloyalo Vakosipeli, naba 56–60 kei na iyaloyalo tabanipepa taucoko ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale). Me ratou taura cake tu nai yaloyalo e vica na gone ni o talanoataka tiko. Tukuna vei ira na gone baleta e vica na tamata era a raici Jisu ni oti Nona tucake tale, me vakataki Meri (raica na Joni 20:1–18) se o Tomasi (raica na Joni 20:24–29).

• Tarogi ira na gone na cava na vuna eda marautaka kina na Siganimate. Vakamacalataka ena Siganimate eda marautaka kina na siga e a tucake tale kina mai na mate o Jisu Karisito. Taroga kevaka e dua na gone e vinakata me wasea na veika e dau cakava nona matavuvale me vakananuma kina na Tucake Tale i Jisu Karisito.

• Vakamacalataka ni tucake tale e kena ibalebale me da bula tale ni da sa mate oti. Wasea nomu ivakadinadina ni ena vukui Jisu Karisito, eda na tucake tale—eda na bula tale ni da sa mate oti, ka da na sega ni qai mate tale.

• Vakayagataka e dua na qaniliga me vakavulici kina vei ira na gone ni da sa tu yadua na yagoda kece (matataki ena qaniliga) kei na yaloda (matataki ena ligada). Ni da sa mate, sa na veitawasei na yaloda kei na yagoda. Na yaloda e bula tikoga , ia na yagoda sa sega. Ni da sa tucake tale, erau sa cokoti vata tale na yaloda kei na yagoda. Me ra veivukevuke na gone ena nodra daramaka na qaniliga ka luvata tale.

• Lagata vata e dua na sere ni Siganimate, me vaka na “Ko Jisu Ni Sa Bula Tu” se “Jisu Turaga” (iVolanisere ni Gonelalai, 45, 44), ka vakaraitaka vei ira na gone na iyaloyalo eso kei Jisu ni oti Nona tucake tale (raica na iVola ni iYaloyalo Vakosipeli, naba 59–61).

• Vakaraitaka na kena itaba e dua o kila ni sa mate. Wasea nomu ivakadinadina ni na tucake tale mai na mate o koya ena vuku ni Veisorovaki kei na Tucake Tale i Jisu Karisito.

• Sarava vata na vidio “Jesus Is Resurrected” se na “The Risen Lord Appears to the Apostles” (ChurchofJesusChrist.org). Se vakaraitaka e dua tale na vidio ni Siganimate e kune ena Easter.ComeuntoChrist.org.

Vakavulica na iVunau: Gone Qase Cake

A vakararawataki o Jisu ena vukuqu mai Kecisemani kei na kauveilatai.

Ni o vulica na ivolanikalou ena macawa oqo, vakasamataka vakatitobu na sala o rawa ni vukei ira kina na gone me ra tara cake nodra vakabauti Jisu Karisito kei na Nona Veisorovaki.

iTaviqaravi e Rawa ni Caka

• Wilika vata kei ira na gone na Luke 22:39–44 kei na veitikina digitaki mai na Maciu 27:29–50. Sureti ira me ra vaqara na vosa ka na vukei ira me ra vakila na veika a sotava na iVakabula mai Kecisemani kei na kauveilatai.

• Vukei ira na gone me ra cavuqaqataka na ikatolu ni yavu ni vakabauta. Wasea nomu ivakadinadina ni sa tu vei Jisu Karisito na kaukauwa me vakabulai keda mai na ivalavala ca kei na mate.

• Vukei ira na gone me ra vakarautaka eso na vosa leleka baleta na Veisorovaki i Jisu Karisito ka rawa ni ra na wasea vei ira na tani. Vakauqeti ira me ra okata e dua na ivolanikalou kei na nodra ivakadinadina ena nodra vosa. Kevaka era gadreva na ikuri ni veivuke, e rawa ni ra wilika na “Sorovaka, Veisorovaki” ena iDusidusi ki na iVolanikalou (scriptures.ChurchofJesusChrist.org).

Baleta ni a mate ka tucake tale o Jisu, au na bula tale.

Ena dua na siga ena mate kina e dua na nodra daulomani na gone o vakavulica kevaka e se bera ni vaka oti kina. Vukei ira me ra kila, baleta ni sa tucake tale o Jisu Karisito, eda na tucake tale vakakina.

iTaviqaravi e Rawa ni Caka

• Vakaraitaka na iyaloyalo naba 57–59 ena iVola ni iYaloyalo Vakosipeli, ka kerei ira na gone me ra vakasotara na iyaloyalo kei na veitikina oqo: Maciu 27:29–38, 59–60; Joni 20:10–18.

• Sureti ira na gone me ra wilika vakai ira na “Tucake Tale” ena iDusidusi ki na iVolanikalou (scriptures.ChurchofJesusChrist.org) ka raica e dua na ka era vinakata me ra vakavulica ki na nodra matavuvale. Solia vei ira na gone na gauna mera wasea na ka era sa raica rawa.

• Vukei ira na gone me ra raica na idusidusi vakaiulutaga ni iVolanisere ni Gonelalai me ra kunea kina e dua na sere era na via lagata me baleti Jisu Karisito se na Tucake Tale. Lagata vata na sere, ka tarogi ira na gone na cava era vulica mai na sere oqo.

• Vakaraitaka na vidio “Jesus Is Resurrected” (ChurchofJesusChrist.org), ka sureta e vica na gone me ra wasea na nodra ivakadinadina me baleta na Veisorovaki kei na Tucake Tale ni iVakabula. (Sa rawa mo kerei ira na gone oqo me ra cakava oqo ena vica na siga ni se bera na kalasi me rawa ni ra vakavakarau kina.) Sureti ira na gone me ra vola nodra ivakadinadina me ra wasea e vale.

Vakauqeta na Vuli e Vale

Me vukei ira na gone me ra wasea na veika era vulica vata kei ira nodra matavuvale, vakauqeti ira me ra lagata e dua na sere baleti Jisu Karisito e vale ena macawa oqo.

Vakatorocaketaki Noda Veivakavulici

E dau yaga vei ira na gone na tokaruataki ni ivakavuvuli. Kua ni ririko mo tokaruataka vakavica vata na itaviqaravi, vakauasivi vei ira na gone sobu. Na tokaruataki ni ivakavuvuli ena vukei ira na gone me ra nanuma na veika o vakavulica.