Me vaka na kena vakayagataki ena ivolanikalou, na sorovaka sai koya me da sotava na isau ni dua na ivalavala ca, me kau laivi kina na revurevu ni ivalavala ca mai vua na tamata ivalavala ca sa veivutuni ka rawa kina vua me veivinakati tale kei na Kalou. Ko Jisu Karisito duadua ga e rawa ni cabora na isoro sa uasivi sara me baleta na kawatamata. Sa rawa vua me vakayacora vakakina baleta ni a digitaki ka tabaki mai na Matabose Cecere ni se bera ni buli na vuravura (Ica 3:14; Mosese 4:1–2; Epa. 3:27), baleta ni Luvena na Kalou, kei na Nona bula sega kina na ivalavala ca. Na Nona Veisorovaki e okati kina na Nona vakararawataki ena vuku ni ivalavala ca ni kawatamata, na vakadavei ni Nona dra, kei na Nona mate kei na tucake tale mai na ibulubulu (Ais. 53:3–12; Luke 22:44; Mosa. 3:5–11; Alama 7:10–13; V&V 19:16–19). Ena vuku ni Veisorovaki, ena tucake kina mai na mate na tamata kecega ena yago tawamate rawa (1 Kori. 15:22). Na Veisorovaki talega sa vakarautaki kina na sala me da vosoti kina mai na noda ivalavala ca ka bula vata kei na Kalou me tawamudu. Ia na tamata sa yacova na yabaki me rawa kina ni saumi taro vakataki koya ka sa ciqoma na lawa ena qai rawata ga na veivakalougatataki kevaka e vakabauti Jisu Karisito, veivutunitaka na nona ivalavala ca, ciqoma na veicakacaka tabu vakalotu ni veivakabulai, ka talairawarawa ki na ivakaro ni Kalou. Ko ira era sega ni yacova na yabaki sa rawa me ra saumi taro kina vakataki ira vata kei ira era se bera ni ciqoma na lawa era na vueti ena Veisorovaki (Mosa. 15:24–25; Moro. 8:22). E vakavuvulitaka vakamatata na ivolanikalou ni kevaka a sega ni sorovaka na noda ivalavala ca na Karisito, e sega ni dua na lawa, cakacaka tabu vakalotu, se na isoro ena vakaceguya na gagadre ni lewadodonu, ka na sega ni rawa vua na tamata me rawata na iserau ni Kalou (2 Nif. 2; 9).