Timoci, Na iVola vei

A vola ko Paula na imatai ni nona ivola ni oti na imatai ni nona tauri vakavesu. A biuti Timoci tu mai Efeso, ka nona inaki me na qai lesu tale kina ena dua na gauna e muri (1 Timo. 3:14). Ia a nanuma ko Paula de na mani bera, a qai volavola kina vei Timoci, e rairai ni a volavola tiko mai Masitonia (1 Timo. 1:3), me vakasalataki koya ka vakayaloqaqataki koya me baleta na nona qarava vakavinaka na nona itavi.

Na wase 1 e lewena na veikidavaki nei Paula ka vakakina na nona ivakaro me baleta na veivakasama lialia eso sa curu tiko yani ki na Lotu. Na wase 2–3 e veidusimaki me baleta na sokalou raraba ka vakakina na nodra ivakarau ni bula kei na nodra ivalavala na italatala. Na wase 4–5 e koto kina e dua na ivakamacala ni vukitani ena veisiga e muri oqo kei na ivakasala vei Timoci ena ivakarau me veiqaravi kina vei ira e liutaki ira tiko. Na wase 6 e dua na veivakauqeti me ra yalodina tikoga ka levea na iyau vakavuravura.

A vola na ikarua ni ivola ko Paula ni oti na ikarua ni nona tauri vakavesu, ni sa voleka sara na gauna me vakamatei kina ena vuku ni nona vakabauta. E koto kina na iotioti ni nona malanivosa na iApositolo ka vakaraitaka talega na yaloqaqa vakasakiti kei na vakanuinui e sotava kina na mate.

Na wase 1 e koto kina na veikidavaki nei Paula kei na nona ivakaro vei Timoci. Na wase 2–3 e soli kina e vica na ivakaro kei na idusidusi, vata kei na bolebole me sotavi kina na dredre e tu mai liu. Na wase 4 e itukutuku vei ira na itokani nei Paula ka koto kina na ivakasala me baleta na nodra qaravi na sa lutu tani.