Iperiu, iVola vei Ira na Kai

E dua na ivola ena Veiyalayalati Vou. A vola na ivola oqo ko Paula vei ira na Jiu era lewe ni Lotu me vakauqeti ira ni vuqa na tiki bibi ni lawa i Mosese sa mai vakataucokotaka na Karisito ka sa vakaisosomitaki ena lawa cecere ni kosipeli i Karisito. Ni lesu tale ki Jerusalemi ko Paula ni oti na ikatolu ni nona kaulotu (rauta na 60 S.K.), a raica ni vuqa vei ira na Jiu lewe ni Lotu era se tamusuki ira tikoga ki na lawa i Mosese (Cakacaka 21:20). Oqo ni oti e rauta ni tini na yabaki mai na dua na koniferedi ni Lotu ka a vakayacori mai Jerusalemi ka lewai kina ni so na cakacaka tabu vakalotu ni lawa i Mosese sa na sega ni gadrevi me baleta na nodra vakabulai na vakabauta Vakarisito ena veimatanitu tani. E kilai, ni oti sara ga oya a volavola ko Paula vei ira mai Iperiu me vakaraitaka kina vei ira ena nodra ivolanikalou ka vakakina ena iulubale daumaka me ra sa na kakua kina ni bulataka na lawa i Mosese.

Na wase 1 kei na 2 e vakamacalataki kina ni sa uasivi cake sara ko Jisu mai vei ira na agilosi. Na wase 3–7 e vakatauvatani Jisu vei Mosese ka vakakina na lawa i Mosese ka vakadinadinataki kina ni sa uasivi cake vei rau ruarua ko Koya. E vakavuvulitaki talega kina ni Matabete i Melikiseteki e cecere cake mai na Eroni. Na wase 8–9 e vakamacalataka na nodra vakarautaki na tamata mai na cakacaka tabu vakalotu vaka-Mosese ki na nona veiqaravi na Karisito ka vakakina ni sa dautataro ni veiyalayalati vou na Karisito (Alama 37:38–45; V&V 84:21–24). Na wase 10 e veivakauqeti ki na gugumatua kei na yalodina. Na wase 11 e ivunau me baleta na vakabauta. Na wase e 12 e soli ivakasala ka veikidavaki. E tukuni ena wase 13 na dokai ni vakamau kei na bibi ni talairawarawa.