iSoro

Ena gauna makawa, na isoro e kena ibalebale me vakasavasavataki e dua na tamata se dua na ka. Sa kena ibalebale ena gauna oqo sai koya me da solia yani se vakayalia na veika vakavuravura ena vukuna na Turaga kei na nona matanitu. O ira na lewe ni Nona Lotu na Turaga sa dodonu me ra na tu vakarau me ra sorovaka na veika kece sara ena vukuna na Turaga. E vakavuvulitaka ko Josefa Simici ni “lotu e sega ni gadrevi kina me sorovaki na ka kecega ena sega vua na kaukauwa e ganita me basika rawa kina na vakabauta e gadrevi me rawa kina na bula kei na veivakabulai.” Ena rai me baleta na veigauna tawamudu, na veivakalougatataki eda rawata mai na sorovaki ka e levu cake mai na veika kecega eda sorovaka.

Ni rau sa vakasavi tani mai na Were ko Iteni ko Atama kei Ivi, a solia vei rau na Turaga na lawa ni sorovaki ka. E okati ena lawa oqo na kena cabori na ulumatua ni qele ni manumanu. Na sorovaki ka oqo e vakatakarakarataka na isoro ena mai cabora na Luvena e Duabau Ga na Kalou (Mosese 5:4–8). A vakayacori tiko na ivalavala oqori me yacova na mate nei Jisu Karisito, sa qai mai tini kina na vakacabori ni isoro manumanu me dua na cakacaka tabu vakalotu ni kosipeli (Alama 34:13–14). Ena Lotu nikua era vakaivotavota na lewenilotu ena sakaramede na madrai kei na wai me ra vakananuma kina na isoro nei Jisu Karisito. Era sa kerei talega na lewe ni nona Lotu na Karisito ena gauna oqo me ra cabora me nodra isoro na yalo sa raramusumusu kei na yalo sa bibivoro (3 Nif. 9:19–22). E kena ibalebale oqo ni ra sa yalomalumalumu, veivutuni, ka lomasoli me ra talairawarawa ki na ivakaro ni Kalou.