iVakadewa nei Josefa Simici (VJS)

Na railesuvi se na ivakadewa ni King James Version ni iVolatabu Vakavalagi, ka a tekivutaka na parofita ko Josefa Simici ena June ni 1830. A vakaroti koya na Kalou me vakadewataka ka raica o koya ni oqo e tiki ni nona ilesilesi vakaparofita.

E dina ni a sa vakacavara ko Josefa na iwase levu ni vakavakadewa ena Julai ni 1833, a tomana tiko me yacova na nona mate ena 1844 na nona vakavinakataka tiko ena gauna vata e vakarautaka tiko kina na kena tabaki. E dina ni a tabaka eso na tikina ena gauna ni nona bula, a rawa ni cakava tale eso na veisau kevaka a bula tiko me tabaka na ivola taucoko. Na Lotu i Jisu Karisito ni Yalododonu Edaidai Tauyavutaki Tale a tabaka ena imatai ni gauna na vakavakadewa vakauqeti nei Josefa Simici ena 1867. Era sa tabaka oti vakavica me tekivu mai na gauna ko ya.

A vulica e vuqa sara na ka na Parofita ena gauna e vakavakadewa tiko kina. E vica na iwase ni Vunau kei na Veiyalayalati a ciqoma ena vuku ni cakacaka ni vakavakadewa oqo (me vaka na V&V 76; 77; 91; kei na 132). A solia talega na Turaga vei Josefa eso na idusidusi me baleta na vakavakadewa, ka ra tabaki ena Vunau kei na Veiyalayalati (V&V 37:1; 45:60–61; 76:15–18; 90:13; 91; 94:10; 104:58; 124:89). Na ivola i Mosese kei na Josefa Simici—Maciu, ka sa okati tu oqo ena Mataniciva Talei, a tauri ga mai ena iVakadewa nei Josefa Simici.

Na iVakadewa nei Josefa Simici sa vakalesuya tale mai eso na ka talei ka rawarawa sara ka sa yali mai na iVolatabu (1 Nif. 13). E dina ni sega ni iVolatabu vakadonui ni Lotu, e tu ena ivakavakadewa oqo eso na vakasama titobu ka yaga vakalevu sara ena kena kilai na iVolatabu. Sa ivakadinadina talega ni veikacivi kei na veiqaravi vakalou e nona na Parofita ko Josefa Simici.