Ilaija

E dua na parofita ni Veiyalayalati Makawa a qai lesu mai ena veigauna e muri me mai solia na idola ni kaukauwa ni veivauci vei Josefa Simici kei Oliva Kaudari. Ena nona gauna, a veiqaravi voli ko Ilaija ena Matanitu ena Vualiku kei Isireli (1 Tui 17–22; 2 Tui 1–2). E ka levu na nona vakabauta na Turaga ka kilai ena vuqa na cakacaka mana. Ena nona kerekere, a tarova tu na uca ena 3½ na yabaki na Kalou. A vakatura cake e dua na gonetagane mai na mate ka kaciva na bukawaqa mai lomalagi (1 Tui 17–18). O ira na Jiu era se waraka tikoga na nona lesu mai o Ilaija, me vaka na parofisai nei Malakai (Mala. 4:5). E se dau vulagi sureti tikoga ena nodra Kana Magiti ni Lakosivia na Jiu, ka dau waraki koya tu kina e dua na katuba e dola tu kei na dua na idabedabe lala.

E kaya na Parofita ko Josefa Simici ni a taura tu ko Ilaija na kaukauwa ni veivauci ni Matabete i Melikiseteki ka sa iotioti ni parofita ko koya me a taura tu ni bera na gauna i Jisu Karisito. A rairai mai ena Ulunivanua ni Veivakamataliataki vata kei Mosese ka mai solia na idola ni matabete vei Pita, Jemesa kei Joni (Maci. 17:3). A rairai tale mai vata kei Mosese kei iratou tale na so, ena ika 3 ni Epereli 1836, ena Valetabu mai Katiladi e Oaio ka mai solia na idola vata oqori ki vei Josefa Simici vata kei Oliva Kaudari (V&V 110:13–16). Na veika kece oqo me vakarautaki ga kina na iKarua ni nona Lako Mai na Turaga, me vaka e tukuni ena Malakai 4:5–6.

Na kaukauwa i Ilaija sai koya na kaukauwa ni veivauci ni matabete ka na vauci se sereki kina mai lomalagi na veika e vauci se sereki yani e vuravura (V&V 128:8–18). Sa tu vei ira na italai digitaki ni Turaga e vuravura ena gauna oqo na kaukauwa ni veivauci oqo ka ra dau qarava na veicakacaka vakalotu veivakabulai ni kosipeli me baleti ira na bula kei ira na mate (V&V 128:8).