iVakatakila nei Joni

Na iotioti ni ivola ena Veiyalayalati Vou, ka lewena e dua na ivakatakila a vakatakilai vei Joni na iApositolo. A soli vua me raica na itukutuku makawa ni vuravura, vakauasivi na iotioti ni gauna (iVakata. 1:1–2; 1 Nif. 14:18–27; V&V 77). Na ivakatakila nei Joni sa dau kilai talega me Apokalipi.

A ciqoma na ivakatakila oqo me baleta na siga ni Turaga ko Joni, mai na yanuyanu ko Patimo (iVakata. 1:9–10), ena baravi kei Esia, sega ni yawa sara mai Efeso. Na tikinisiga sara ga e tauri kina na ivakatakila e sega ni kilai.

Na idola eso me kilai kina vakavinaka na ivola oqo sa tu ena 1 Nifai 14:18–27 kei na Vunau kei na Veiyalayalati 77 (Ica 4:15–16).

Na Wase 1–3 era ivakamacala taumada ni ivola oqo kei na ivola a vakau vei ira na isoqosoqo lotu e vitu mai Esia. A vola na ivola vakau eso oqo ko Joni me vukei ira na Yalododonu ena nodra walia na leqa eso. Na wase 4–5 e tukuni kina na raivotu eso a raica ko Joni ka vakaraitaki kina na kaukauwa dodonu ka vakaturaga e tu vua na Kalou vata kei Karisito. Ena wase 6–9, 11, e vola kina ko Joni na nona raica e dua na ivola ka dregati tu ena vitu na drega, na drega yadua e vakaibalebaletaki ki na dua na udolu na yabaki ni itukutuku makawa vakayago kei vuravura. Na veiwase eso oqo e baleta vakatabakidua na veika a yaco ena loma ni vitu na drega oqori (raica iVakata. 8–9; 11:1–15). Na wase 10 e vakamacalataki kina e dua na ivola a kania ko Joni. E vakaibalebaletaki na ivola ko ya ki na dua na itavi ena qai qarava ko koya ena dua na gauna mai muri. Na wase 12 e tukuni kina e dua na raivotu ni ca ka a tekivu mai lomalagi ena gauna e vakamuri lomana kina ko Setani ka qai vakasevi tani. Na ivalu a caka mai kea sa tomani tiko e vuravura ena gauna oqo. Ena wase 13, 17–19, e vakamacalataka kina ko Joni na veimatanitu vakavuravura dau caka ca ka lewa tu ko Setani, ka tukuni kina na ca ena yaco vei ira, ka okati kina na iotioti ni veivakarusai ki na ca. Na wase e 14–16 e vakamacalataki kina na nodra buladodonu tiko na Yalododonu ena loma ni veigauna ca ni sa voleka na iKarua ni nona Lako mai na Karisito. Na wase 20–22 e vakamacalataki kina na Mileniumi, na koro levu rairai totoka ko Jerusalemi Vou, kei na iotioti ni veika a yaco ena itukutuku makawa ni vuravura.