Jerusalemi

E dua na koro e Isireli vou. Oqori na koro kilai levu duadua ena itukutuku makawa vakaivolatabu. Eso na tikina tabu sara ena vakabauta Vakarisito, Jiu, kei na Musulomani era tu ena koro oqo ka ra dau sikovi ena veigauna mai vei ira na vakabauta yalodina. Sa dau wasoma na kena vakatokai me koro tabu.

Sa dau kilai tu e liu ko Selemi (iVakate. 14:18; Same 76:2), a koro tu vaka-Jepusaiti ko Jerusalemi me yacova na gauna e qai taura kina ko Tevita (Josu. 10:1; 15:8; 2 Samu. 5:6–7), ka qai vukica me nona koroturaga. Me yacova mai na gauna ko ya a dau koro tu ni ivalu ka tu ena ulunivanua, rauta ni 800 na mita ena dela ni iyalayala ni waitui. E wavokita na buca kikilo e veiyasana kece vakavo ga ki na vualiku.

Ena gauna ni nona veiliutaki na Tui ko Tevita e Jerusalemi, a tawana voli e dua na valekau vakatui. Ia, ena gauna ni veiliutaki vakatui nei Solomoni, era a cakava e vuqa na ka na tamata me ra ukutaka kina na koro, ka okati kina na kena tara na nona vale na tui kei na valetabu.

Ni rau sa tawase na matanitu e rua ko Isireli kei Juta, a koroturaga tiko ga kei Juta ko Jerusalemi. Sa dau kabai vakalevu mai vei ira na mataivalu dau kabavanua (1 Tui 14:25; 2 Tui 14:13; 16:5; 18–19; 24:10; 25). Ena rukui Esekaia, sa yaco ko Jerusalemi me vanua ni sokalou vakalotu ia a mani vakarusai vakatikina ena 320 B.K., 168 B.K., kei na 65 B.K. A tara tale ko Eroti na bai kei na valetabu, ia ena ika 70 S.K. era sa qai vakarusa vakadua na kai Roma.