Josefa, Luvei Jekope

Ena Veiyalayalati Makawa, na nodrau ulumatua tagane ko Jekope kei Rejeli (iVakate. 30:22–24; 37:3).

Sa nei Josefa na itutu vakaulumatua e Isireli baleta ni sa kau tani mai vei Rupeni, na ulumatua nei Jekope vua na matai ni watina, na veivakalougatataki oya ena vuku ni nona ivalavala ca (1 Vei. 5:1–2). Me vaka ni kilikili tu na nona bula, sa ikarua kina ena laini oya ko Josefa me vaka ni ulumatua nei Jekope vua na ikarua ni watina. A ciqoma talega ko Josefa e dua na veivakalougatataki mai vua na tamana ni sa voleka sara toka ni mate ko Jekope (iVakate. 49:22–26).

Ko Josefa e dua na tamata ka cecere na nona itovo ni bula, e “yalomatua ka vuku” (iVakate. 41:39). Na nona vorata na veitemaki ni wati Potifa sa ivakaraitaki ni vakabauta, bula savasava, ka bula dokai (iVakate. 39:7–12). Ena gauna e vakatakilai koya kina ko Josefa vei iratou na tacina mai Ijipita, a vakavinavinaka ka sega ni beitaki iratou ena ivakarau eratou a vakayacora vua. E vakabauta ni nodratou ivalavala sa vukea na kena rawa na nona inaki na Kalou (iVakate. 45:4–15).

Na ivakatakila ni gauna oqo sa vakatakila mai na nodratou itavi levu cake ni kaulotu ena veisiga e muri na matavuvale nei Josefa (VJS, iVakate. 50:24–38 [Ai Kuri]; 2 Nif. 3:3–24; 3 Nif. 20:25–27).

Sa levu na loloma i Jekope vei Josefa ka solia kina vua e dua na kote veivolavolai, iVakate. 37:3.
Ena nodra vuvu sa yaco me ra cati koya na taci Josefa ka ra nakita me ra vakamatea, ia era a mani volitaki koya vei ira na dauveivoli, ena nodra ilakolako ki Ijipita, iVakate. 37:5–36.
E Ijipita sa vakalougatataki Josefa na Turaga ka yaco me lewa na vale nei Potifa, iVakate. 39:1–4.
Sa lasu na wati Potifa, ka kaya ni sa segata ko Josefa me moce vata kaya; A beitaki vakailasu ko Josefa ka biu ki valeniveivesu, iVakate. 39:7–20.
Sa vakadewataka ko Josefa na nodrau tadra na dauvavavi liu kei na dau caka mena, iVakate. 40.
Sa tekivu me lomani Josefa ko Fero baleta ni a vakaibalebaletaka ko Josefa e dua na nona tadra na Fero; sa buli Josefa me dua na iliuliu e Ijipita, iVakate. 41:14–45.
Erau sa sucu ko Ifireimi kei Manasa, iVakate. 41:50–52.
Sa duavata tale kei tamana kei ira na tacina ko Josefa, iVakate. 45–46.
Sa mate e Ijipita ko Josefa ni sa yabaki 110, iVakate. 50:22–26.