Vakamatei ena Kauveilatai

Na ivakarau ni itotogi mate vaka-Roma, dau vakayacori wasoma ena gauna ni Veiyalayalati Vou, e dau vakamatei na tamata ena kena vesu se vakoti na ligana kei na yavana ki na kauveilatai. E dau vakayacori ga vei ira na bobula kei ira na dau basulawa lolovira duadua. Na veivakamatei ena kauveilatai e vakavuqa ni dau qai tarava mai na veivakanakuitataki (Mari. 15:15). Na tamata ena vakamatei ena kauveilatai ena dau vakasaurarataki me colata na nona kauveilatai ki na vanua me laki vakamatei kina (Joni 19:16–17). Na nona isulu era na dau kauta ko ira na sotia era vakayacora na kena itotogi (Maci. 27:35). Sa dau tei ki na qele na kauveilatai me rawa ni qai lili toka na yavana rauta ni dua se rua na fute ena dela ni qele. Era na qai dau yadrava tu na kauveilatai ko ira na sotia me yacova ni sa mate na tamata ko ya, ka dau taura ena so na gauna e tolu na siga (Joni 19:31–37).

A vakamatei ena kauveilatai ko Jisu Karisito baleta ni ra a beitaki Koya vakailasu eso na tamata tawavakabauta ni segata tiko me vorati Sisa kei na vosalasu ena Nona kaya ni o Koya na Luve ni Kalou. E dua na icurucuru balavu lokaloka (Joni 19:2), e dua na isala wa vakavotona, kei na veika rarawa tale eso a vakayacori vei Jisu (Maci. 26:67; Mari. 14:65).