Nifai, Luvei Liai

Ena iVola i Momani, e dua na luvedrau yalododonu ko Liai kei Seraia (1 Nif. 1:1–4; 2:5). E tudei na nona vakabauta ko Nifai na vosa ni Kalou (1 Nif. 3:7) ka yaco me dua na parofita cecere, dau volaitukutuku, ka iliuliu vei ira na nona tamata.

A talairawarawa ka dau masu ena vakabauta, 1 Nif. 2:16.
Lesu tale ki Jerusalemi me kauta mai na peleti parasa, 1 Nif. 3–4.
Lesu tale ki Jerusalemi me kauti iratou mai na matavuvale nei Isimeli ki na lekutu, 1 Nif. 7.
Raica talega na raivotu vata ga a raica ko Liai, 1 Nif. 10:17–22; 11.
Raica ena raivotu na nodra veigauna mai muri na nona tamata kei na vakalesui mai ni kosipeli, 1 Nif. 12–13.
Vakadewataka na raivotu ni vunikau ni bula, 1 Nif. 15:21–36.
Musuka na nona dakaititi ia a rawata mai na kakana ena vuku ni nona vakabauta, 1 Nif. 16:18–32.
Taya e dua na waqa ka soko yani ki na vanua yalataki, 1 Nif. 17–18.
Era sa tawase na Nifai kei ira na Leimani, 2 Nif. 5.
Wasea na iotioti ni nona ivakadinadina, 2 Nif. 33.

Na imatai ni Nifai

Na wase 1:1 ki na 18:8 e tukuni ga kina vakalevu na nona biuti Jerusalemi na parofita ko Liai kei na nona matavuvale. Era lakova na vanua dravuisiga liwalala me yacova ni ra sa yaco yani ki matasawa. Na 1 Nifai 18:9–23 e tukuni kina na nodra ilakolako ki na dua na vanua yalataki, me vaka na veituberi ni Turaga, e dina ni rau ia tiko na veisaqasaqa ko Leimani kei Lemueli. Na wase 19–22 e tukuni kina na inaki ni nona dau maroroi itukutuku ko Nifai (1 Nif. 6; 19:18)—me vakauqeti ira kecega me ra dau nanuma na Turaga na nodra Dauveisereki. E cavuvosa mai na Aisea (1 Nif. 20–21) ka vakadewataka na itukutuku i Aisea, ena vakanuinui ni na yaco me kilai Jisu Karisito na tamata kecega ni nodra iVakabula ka Dauveisereki (1 Nif. 22:12).

Na i ka 2 ni Nifai

Na wase 1–4 e koto kina eso na iotioti ni nona ivakavuvuli kei na parofisai ko Liai ni se bera ni mate, ka okati kina na veivakalougatataki vei ira na luvena kei ira na nona kawa. Na wase 5 e vakamacalataka na vuna era sa tawasei ira tani kina mai vei ira na Leimani ko ira na Nifai. Era tara na Nifai e dua na valetabu, era vakavuvulitaka na lawa i Mosese, ka maroroya na itukutuku. Na wase 6–10 era koto kina na vosa i Jekope, na taci Nifai. Sa raica lesu ko Jekope na itukutuku kei Juta ka parofisaitaka na Mesaia, eso oqo era a tauri mai na nona volavola na parofita ko Aisea. Ena wase 11–33 e vola kina ko Nifai na nona ivakadinadina kei Karisito, na ivakadinadina, na parofisai ni veigauna mai muri nei Jekope, kei na vica na iwase mai na ivola i Aisea ena Veiyalayalati Makawa.