Vunau kei na Veiyalayalati

Na kena isoqoni na ivakatakila vakalou kei na itukutuku vakauqeti ni gauna oqo. A solia na veika oqo vei Josefa Simici na Turaga ka vakakina vei iratou e vica era a qai sosomitaki koya vakaveitaravi e muri me baleta na kena tauyavutaki ka vakalawataki na matanitu ni Kalou e vuravura ena veisiga mai muri. Na Vunau kei na Veiyalayalati e dua vei ira na ivolayavu vakaivolanikalou ena Lotu i Jisu Karisito ni Yalododonu Edaidai, ka duavata kina kei na iVolatabu, na iVola i Momani, kei na Mataniciva Talei. E duatani na Vunau kei na Veiyalayalati, baleta ni sega ni ivakadewa ni itukutuku makawa; e solia na Turaga na ivakatakila eso oqo vei ira na Nona parofita digitaki ena veigauna oqo me rawa kina ni vakalesuya tale mai na Nona matanitu. Ena ivakatakila eda na rogoca kina na domo malumu ka rui laulau ni Turaga ko Jisu Karisito (V&V 18:35–36).

E kaya na itukutuku makawa kei Josefa Simici ni Vunau kei na Veiyalayalati e yavu ni Lotu ena veigauna e muri ka sa yaga sara ki vuravura (V&V 70 kena ikau). Na ivakatakila vakataki koya e vakavurea na cakacaka ena kena vakarautaki na sala me baleta na iKarua ni nona lako mai na Turaga, me baleta na kena vakayacori na veika kece era sa tukuna na parofita me tekivu mai ena ivakatekivu kei vuravura.