Matabete i Melikiseteki

Na Matabete i Melikiseteki e matabete cecere se matabete levu cake; na Matabete i Eroni e matabete lailai. Na Matabete i Melikiseteki e okati kina na idola ni veivakalougatataki vakayalo ena Lotu. Ena cakacaka tabu vakalotu ni matabete cecere sa vakatakilai kina vua na tamata na kaukauwa vakalou (V&V 84:18–25; 107:18–21).

Sa vakatakila taumada na Kalou na matabete cecere oqo vei Atama. Sa tu vei ira na peteriaki kei na parofita ni veitabagauna kecega na dodonu oqo (V&V 84:6–17). A vakatokai taumada me Matabete Tabu, ena kena iVakarau vua na Luve ni Kalou. Sa qai kilai e muri me Matabete i Melikiseteki (V&V 107:2–4).

Ni sa sega ni rawa vei ira na luvei Isireli me ra bula muria na galala kei na veiyalayalati ni Matabete i Melikiseteki, sa kauta tani kina na Turaga na lawa cecere ka solia vei ira e dua na matabete kei na lawa e lailai sobu (V&V 84:23–26). Erau a vakatokai me Matabete i Eroni kei na lawa i Mosese. Ni lako mai ki vuravura ko Jisu, a vakalesuya mai na Matabete i Melikiseteki vei ira na Jiu ka tekivu me tara cake na Lotu ena kedra maliwa. Ia, a mani yali tale na Lotu kei na matabete ena vuku ni vukitani. A qai vakalesui tale mai vei Josefa Simici Lailai (V&V 27:12–13; 128:20; JS—AT 1:73).

Ena Matabete i Melikiseteki sa koto kina na itutu ni italatala qase, bete levu, peteriaki, Vitusagavulu kei na iApositolo (V&V 107). Na Matabete i Melikiseteki ena dau tiki tiko ga ni matanitu ni Kalou e vuravura.

Na Peresitedi ni Lotu i Jisu Karisito ni Yalododonu Edaidai sai koya na peresitedi ni Matabete i Melikiseteki se matabete cecere, ka taura tu o koya na idola kece sara e baleta na matanitu ni Kalou e vuravura. Na ilesilesi vaka- Peresitedi ena dau taura tu ga e dua na tamata ena veigauna, ka sai koya duadua ga na tamata e vuravura ka tu vua na dodonu me vakayagataka na idola kece sara vakabete (V&V 107:64–67; 132:7).