iTalatala Qase

E levu na veimataqali sala e vakayagataki kina na vosa italatala qase ena iVolatabu. Ena Veiyalayalati Makawa e dau vakayagataki me baleti ira na kena turaga ena dua na yavusa, ka vakavuqa ni dau vakacolati vei ira na veika vakaveiliutaki (iVakate. 50:7; Josu. 20:4; Ruci 4:2; Maci. 15:2). Sa dau yaga sara vakalevu na nodra ivakasala me vaka ni ra sa qaseta ka levu sara na ka era kila. E sega ni ilesilesi vakabete na nodra itutu.

Era tu talega ena gauna ni Veiyalayalati Makawa na italatala qase tabaki ena Matabete i Melikiseteki (L.Y 24:9–11). Ena Veiyalayalati Vou, e dau cavuti na italatala qase me dua na itutu ni matabete ena Lotu (Jeme. 5:14–15). Era tu talega vei ira na Nifai na italatala qase tabaki ena matabete (Alama 4:7, 16; Moro. 3:1). Ena itabagauna oqo, erau imatai ni italatala qase me tabaki o Josefa Simici kei Oliva Kaudari (V&V 20:2–3).

Na italatala qase (Elder) sai koya na itutu e dau soli vei ira kece na Matabete i Melikiseteki ena gauna oqo. Me vakaoqo, o ira na daukaulotu tagane era dau kacivi ena italatala qase. E vakakina ni italatala qase talega e dua na iApositolo, ka ganita me da kacivi ira na lewe ni Kuoramu ni iApositolo Le Tinikarua se na Kuoramu ni Vitusagavulu ena itutu oqo (V&V 20:38; 1 Pita 5:1). Sa tukuni tu ena ivakatakila ni gauna oqo na nodra itavi na italatala qase tabaki ena Lotu nikua (V&V 20:38–45; 42:44; 46:2; 107:12).