Veiyalayalati Makawa

Na nodra volavola na parofita ni gauna makawa ka ra a cakacaka ena veivakauqeti ni Yalo Tabu ia era sa vakadinadinataki Karisito tu mai kei na Nona cakacaka ena vuqa na senijiuri. E koto talega kina na kena itukutuku makawa ko Eparaama kei ira na nona kawa, ka tekivu mai vei Eparaama, kei na yalayala se veiyalayalati, ka a vakayacora na Turaga vei Eparaama kei ira na nona kawa.

Na imatai ni lima na ivola ena Veiyalayalati Makawa a vola ko Mosese. Oqori na iVakatekivu, Lako Yani, Na iVunau ni Soro, Tiko Voli mai na Lekutu, kei Na iVakarua. Na iVakatekivu e baleta na itekivu ni vuravura, na kawatamata, na dui vosavosa, na dui matatamata, kei na itekivu ni mataqali i Isireli.

Na ivola ni itukutuku makawa e tukuna na veika e yaco vei ira na Isireli. Na ivola eso oqori na Josua, Dauveilewai, Ruci, 1 kei na 2 ni Samuela, 1 kei na 2 ni Tui, 1 kei na 2 ni Veigauna, Esera, Niemaia, kei Esiteri.

Na ivola eso ni serekali e tukuni kina eso na nodra vuku kei na nodra volavola na parofita. Oqori na Jope, Same, Na Vosa Vakaibalebale, Na Dauvunau, Na Sere i Solomoni, kei na Lele i Jeremaia.

Era sa vakasalataki Isireli ko ira na parofita me baleta na nona ivalavala ca ka vakadinadinataka na veivakalougatataki ena yaco mai ena vuku ni talairawarawa. Era parofisaitaka na lako mai nei Karisito, o koya ena mai sorovaka na nodra ivalavala ca ko ira era na veivutuni, ciqoma na veicakacaka tabu vakalotu, ka bulataka na kosipeli. Oqo na nodra ivola na parofita, Aisea, Jeremaia, Isikeli, Taniela, Osea, Joeli, Emosi, Opetaia, Jona, Maika, Neumi, Apakuki, Sefanaia, Akeai, Sakaraia, kei Malakai.

E vuqa na ivola ena Veiyalayalati Makawa era a volai vaka-Iperiu. E vica na volavola e tiko kina na vosa vaka-Aramea, e dua na vosa ka veiwekani vata.