3–9 ni Epereli

Siganimate

“Ko Iko Bulubulu, Sa Evei na Nomu Gumatua?”

Ni o wilika tiko na ivakadinadina eso ni Tucake tale ni iVakabula ena idusidusi oqo, mo vola toka eso na ka o vakila ka nanuma kei na vei ka e basika mai vei iko mai vua na Yalo Tabu.

Vola na Nomu Nanuma Eso

Ena iotioti ni macawa ni nona bula na iVakabula, e lewevuqa na Jiu ka wavoliti Koya tu era vakaitavi ena ivakarau vakavanua ni Kanavata ni Lako Sivia. Era vakarautaka na kakana, lagati na sere, ka soqoni vata me vakananumi kina na nodra vakabulai na Isireli mai na veivakabobulataki mai vei ira na kai Ijipita. Era vakarogoca na vuvale na italanoa ni nodra lako sivita na agilosi veivakarusai na nodra vale na nodra qase e liu ka ra a makataka na nodra katuba ena dra ni lami. Ena gauna ni soqo ni marau oqo ka vutuniyau ena ivakatakilakila ni veivakabulai, e lailai vei ira era kila tu ni o Jisu Karisito, na Lami ni Kalou, ena vakabulai ira mai na veivakabobulataki ni valavala ca kei na mate—ena Nona vakararawataki, mate, ka qai Tucake tale. E dina sara, e a tiko talega o ira era kilai Jisu ni sa nodra Mesaia yalataki, na nodra Dauveisereki tawamudu. Mai na siga oya, era sa vakadinadinataka ki vuravura taucoko na tisaepeli i Jisu Karisito “ni sa mate na Karisito ena vuku ni noda ivalavala ca… ; ni sa bulu talega, ka ni sa tucake tale e nai katolu ni siga” (1 Koronica 15:3–4).

Vakasama Eso ni Vuli iVolanikalou ni Tamata Yadua

Maciu 21–28

Sa sereki au o Jisu Karisito mai na ivalavala ca kei na mate, vakaqaqacotaki au ni‘u malumalumu, ka vakacegui au ni‘u dau vakatovolei.

E dua na sala me da vakanamata kina ki na veivakalougatataki ni Veisorovaki ni iVakabula ena macawa oqo sa ikoya me da solia na gauna ena vei siga yadua me da wilika kina na iotioti ni macawa ni nona bula o Jisu (e dua na ituvatuva ni wiliwili e tarava mai). Na cava o sa kunea ena vei wase ni vola oqo ka vukei iko mo vakila na loloma ni iVakabula vei iko? Vakasamataka vakatitobu na vei ka e vakavulica vei iko na vei wase oqo me baleta na sala e rawa ni sereki iko kina o Koya mai na ivalavala ca, mate, veivakatovolei, kei na malumalumu. O sa vakaraitaka tiko vakacava na nomu vakabauta tiko na Nona kaukauwa ni veisereki?

• Sigatabu: Na curu qaqa ki Jerusalemi (Maciu 21:6–11)

• Moniti: Vakasavasavataki ni valetabu (Maciu 21:12–16)

• Tusiti: Veivakavulici e Jerusalemi (Maciu 21–23)

• Vukelulu: Tomani na veivakavulici (Maciu 24–25)

• Lotulevu: Na Kana Vata ni Lako Sivia kei na vakararawataki i Karisito ena Were o Kecisemani (Maciu 26)

• Vakaraubuka: Vakatovolei, Vakoti ena Kauveilatai, kei na veibulu (Maciu 27:1–61

• Vakarauwai: Sa vakadavori na yagoi Karisito ena ibulubulu (Maciu 27:62–66) ni veiqaravi tiko o Koya ena vuravura ni yalo (Vunau kei na Veiyalayalati 138)

• Sigatabu: Na Lako Cake kei na Nona rairai o Jisu Karisito ki vei iratou na Nona tisaepeli (Maciu 28:1–10)

Raica talega na Easter.ComeuntoChrist.org.

Vakoti ena Kauveilatai, mai vei Louise Parker

Maciu 28:1–10; Luke 24:13–35; Joni 20:19–29; 1 Koronica 15:1–8, 55

E levu na ivakadinadina era tukuna na Tucake tale nei Jisu Karisito.

Vakasamataka mada na cava a yaco vei iratou na tisaepeli ni ratou sa sarava na vakalialiai, vakalolomataki, ka qai vakoti ena kauveilati nei Jisu. E ratou a vakadinadinataka na Nona kaukauwa, vakila na dina ni Nona ivakavuvuli, ka vakabauta ni o Koya na Luve ni Kalou. Na vakadinadinataki ni Nona mate e a rairai vakavuna me ratou vakila na Nona tisaepeli na yaluma kei na veilecayaki. Ia vakalailai ga e ratou sa mai ivakadinadina ni cakamana cecere ni Nona Tucake tale.

Na cava o rawa ni vulica mai na nodra itukutuku na vakadinadinataka na Tucake tale ni iVakabula? Makataka se vola na veika era sotava na tamata yadua oqo ena Maciu 28:1–10; Luke 24:13–35; Joni 20:19–29; kei na 1 Koronica 15:1–8,55 (E so tale na ivakadinadina ni Karisito ni sa tucake tale e rawa ni kune ena 3 Nifai 11; Momani 1:15; Ica 12:38–39; Vunau kei na Veiyalayalati 76:19–24; 110:1–10; kei na Josefa Simici—Ai Tukutuku 1:15–17.) Na cava e vakauqeti iko me baleta na nodra ivakadinadina o ira na ivakadinadina oqo? Ni oti na Tucake tale ni iVakabula, era a tucake talega e so tale ka basika yani vei ira e vuqa (raica na Maciu 27:52–53; 3 Nifai 23:9). E vakauqeta vakacava na ivakarau ni nomu bula ni ko vakabauta na iVakabula kei na yalayala ni tucake tale?

Raica talega na “Jesus Is Resurrected,” “The Risen Lord Appears to the Apostles,” “Blessed Are They That Have Not Seen, and Yet Have Believed” (vidio), ChurchofJesusChrist.org.

1 Pita 1:3–11

E solia vei au o Jisu Karisito na inuinui kei na reki.

Na vosa se malanivosa cava ena 1 Pita 1:3–11 e solia vei iko na inuinui ena vukui Jisu Karisito? Na gauna cava o vakila kina na inuinui oqori?

E kaya kina o Elder Gerrit W. Gong ni Tucake tale “sa solia na inuinui vei ira sa yali na ligadra kei na yavadra, o ira sa sega tu ni rai rawa, rogo, se taubale, se o ira era yali ena vuku ni tauvimate dredre, tauvimate ni vakasama se so tale na ituvaki sa takiveiyaga. Sa kunei keda o Koya. Sa vakataucokotaki keda. … [Vakatalega kina,] baleta na ‘Kalou vakai koya sa sorovaka kina na nodra ivalavala ca na kai vuravura’ [Alama 42:15], … Sa rawa Vua, ena loloma veivueti, me vukei keda me vaka na noda malumalumu. … Eda sa veivutuni ka vakayacora na vei ka kece eda rawata. E ovici keda tawamudu ‘ena liga ni nona loloma’ [2 Nifai 1:15]” (”Hosanna and Hallelujah—The Living Jesus Christ: The Heart of Restoration and Easter,” Liaona, Me 2020, 54).

Raica talega na Alama 27:28; 36:1–24; 3 Nifai 9:11–17; Moronai 7:40–41.

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

ComeuntoChrist.org.NaEaster.ComeuntoChrist.org e tiko kina e dua na ituvatuva ni gauna kei na ivakamacala ni vei ka e a yaco ena vei siga yadua ni iotioti ni macawa ni nona bula na iVakabula. Ena siga yadua ena loma ni macawa, e rawa ni taleva lesu na nomu vuvale na ivakamacala oqo mo dou raica na vei ka e vakayacora na iVakabula ena siga oya, se rawa ni dou wilika vakamatavuvale na Nona iotioti ni macawa ena ivolanikalou (raica e cake e dua na ituvatuva ena “Vakasama ni Vuli Volanikalou Yadua”).

Serenilotu kei na Nodra iVolanisere na Lalai.Sa rawa mo ni lagata vata na sere me baleta na Veisorovaki ni iVakabula kei na Tucaketale ena macawa oqo, oka kina eso era sega soti ni kilai vinaka mai vei iko. (Raica na ituvatuva vakamatanivola ni Serenilotu se Nodra iVolanisere na Lalai, ena ruku ni iulutaga me vaka na “Veisorovaki,” “Siganimate,” se “Tucake tale.”) Me vukei iratou na lewenivuvale me ratou vulica na sere, e rawa ni o vakaraitaka na iyaloyalo e sala vata kei na qaqana.

Na ikumuni ni “Jisu Karisito” ena Gospel Library.Na ikumuni ni Gospel Library ka kena iulutaga na “Jisu Karisito” e oka kina na vidio, cakacaka ni liga, kei na ivakatagi e rawa ni vukea na nomu matavuvale me ratou marautaka na Tucake tale ni iVakabula ena Siganimate oqo.

“Sa Bula Na Karisito: Nodra iVakadinadina na iApositolo.”Wilika vakamatavuvale “Sa Bula na Karisito: Nodra iVakadinadina na iApositolo” (ChurchofJesusChrist.org). Sureta na lewe ni matavuvale yadua me ratou digitaka e dua na itukutuku ni Siganimate mai na ivakadinadina oqo me wasei vei ira tale eso. Me ivakaraitaki, e rawa ni o cakava eso na ivola tikidua me vakaraitaki ena tabana ni itukutuku raraba ena initaneti, ena mata ni nomu katuba, se ena loma ni nomu vale.

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Jisu Turaga,” iVolanisere ni Lalai, 44.

Vakatoroicaketaki ni Vuli Yadua

Vakarautaka na lalawa e rawa ni o qarava. E vica ga na miniti ena dua na siga mo vulica kina na ivolanikalou ena rawa ni vakalougatataka na nomu bula. Yalataka mo vuli ena vei siga, vakasaqara na sala me rawa ni o vakananumi iko kina me baleta na nomu yalayala, ka vakayacora na nomu igu vinaka sara mo rawata. Kevaka o guilecava, kakua ni soro. Tekivu tale mai.

Kecisemani, mai vei Adam Abram