Na Kai Samaria Dauloloma, mai vei Dan Burr

17–23 ni Epereli

Maciu 18; Luke 10

“Na Cava Meu Kitaka Meu Rawata Kina na Bula Tawamudu?”

Nio wilika ena yalomasumasu ka vakasamataka vakatitobu na Maciu 18 kei na Luke 10, vakarogoca vakavinaka na veivakauqeti ni Yalo Tabu. Ena tukuna vei iko o Koya na sala e vakagolei kina na ivakavuvuli kei na italanoa oqo ki vei iko. Vola na vei vakasama o ciqoma

Vola na Nomu Nanuma

Nio taroga na Turaga ena dua na ka, o na rawa ni ciqoma na kena isau o a sega ni namaka. O cei beka na wekaqu? E dua ga e sa gadreva na nomu veivuke kei na loloma. O cei sa levu cake ena matanitu vakalomalagi? E dua na gonelailai. E sa rauta beka mo vosota vakavitu e dua sa vakacudrui iko? E sega, mo na vosoti koya me vaka vitusagavulu na vitu. (Raica na Luke 10:29–37; Maciu 18:4, 21–22.) Na vei isaunitaro sega ni namaki mai vua na Turaga e rawa ni sureti keda me da veisautaka na ivakarau ni noda vakasama, lomada, kei na ivakarau. Kevaka o sa vakasaqara na lewa ni Turaga baleta nio vinakata dina mo vuli mai vei Koya, ena vakavulici iko na Turaga ena sala mo bula kina ka na veimuataki ki na bula tawamudu kei Koya.

Vakasama Eso ni Vuli iVolanikalou ni Tamata Yadua

Maciu 18:21–35

E dodonu me’u na vosoti ira na tamata kevaka au vinakata me’u ciqoma na veivosoti mai vua na Turaga.

Na nona vakatutu o Pita me vosota vakavitu e dua ena rairai rogorogo vaka yalololoma levu sara, ia e vakatavulica o Jisu e dua na lawa cecere cake. A sauma o Koya, “Au sa sega ni kaya vei iko, me vakavitu walega: me vakavitusagavulu na vitu,” (tikina e 22), a sega ni vakatavuvulitaka tiko na iwiliwili ia e baleta ga me tauyavutaki na itovo va-Karisito o ya na veivosoti. Nio wilika na vosa vakatautauvata ni italai a sega ni dauloloma, vakasamataka vakatitobu na vei gauna o a vakila kina na loloma veivueti kei na yalololoma ni Kalou. E tiko beka e dua e gadreva me lako vua na nomu loloma veivueti kei na yalololoma?

A vakasalataka kina vakaoqo o Elder David E. Sorensen: “E dina ga ni dodonu me da vosota e dua na wekada ka vakamavoataki keda, e dodonu me da cakacaka vakagumatua me tarova na kena tokruataki na mavoa oya. … Na veivosoti e sega ni gadrevi kina me da ciqoma se vosota na ca. … Ia ni da valuta na ivalavala ca, me da kakua ni vakatara na veicati se cudru me lewa na noda vakasama se ivalavala” (“Forgiveness Will Change Bitterness to Love,” Liaona, Me 2003, 12).

Luke 10:1–20

O cei o ira na Vitusagavulu?

Ni vakamuri e dua na ivakarau e tauyavutaki ena gauna ni Veiyalayalati Makawa (raica na Lako Yani 24:1; Tiko Mai na Lekutu 11:16), o Jisu Karisito a “lesia e vitusagavulu,” me ikuri ni Nona Tinikarua na iApositolo, me vakadinadinataki Koya, vunautaka na Nona kosipeli, ka vukei Koya ena Nona cakacaka. Na iwalewale oqo e tomani tikoga ena Lotu vakalesuimai. Na Vitusagavulu era kacivi me ra veivuke ki vei iratou na Tinikarua ena nodratou ilesilesi vaka ivakadinadina digitaki i Jisu Karisito ki vuravura raraba.

Raica talega na Vunau kei na Veiyalayalati 107:25–26, 33–34, 97.

Luke 10: 25–37

Me’u rawata na bula tawamudu, e dodonu me’u lomana na Kalou ka lomana na wekaqu me vakaga ni‘u lomani au.

E veivuke me da nanuma ni vosa vakatautauvata ni kai Samaria dauloloma sa sala nei Jisu me sauma kina e rua na taro: “A cava meu kitaka meu rawata kina na bula tawamudu?” kei “Ko cei na wekaqu?” (Luke 10:25, 29). Nio wilika na vosa vakatautauvata oqo, nanuma tiko na taro oqori? Na cava na isau ni taro o sa kunea?

Ena gauna i Jisu, na nodra veicacati na Jiu kei na kai Samaria e sa yaco tiko mai ena vica na senitiuri. O ira na kai Samaria era kawa ni Jiu era tiko mai Samaria era sa vakamau veiwaki kei ira na kai Matanitu Tani. Era nanuma kina na Jiu ni ra sa vakadukadukalitaki na kai Samaria mai na nodra veimaliwai kei ira na kai Matanitu Tani ka ra sa vuki tani. Era dau taubale ena dua tale na sala tani o ira na Jiu me vica vata na maile me kua ga ni ra lako takosovi Samaria. (Raica talega na Luke 9:52–54; 17:11–18; Joni 4:9; 8:48.)

Na cava o nanuma a digia kina na iVakabula e dua na kai Samaria, e dua e sevaki mai vei ira na Jiu, me ivakaraitaki ni loloma uasivi kei na lomana na wekana? Na cava e vakauqeti iko mai na vosa vakatautauvata mo vakayacora?

Raica talega na Mosaia 2:17; “Vosa Vakatautauvata ni Kai Samaria Dauloloma” kei na “A Good Samaritan” (vidio), ChurchofJesusChrist.org.

Luke 10:38–42

Eda digitaka na “tikina vinaka o ya” ena noda vakayaco digidigi ena veisiga ka na mua yani ki na bula tawamudu.

Ena Luke 10:38–42, a sureti Marica vakamalua o Jisu me vakasamataka vou na sala a vakayagataka tiko kina na nona gauna. Ni cavuta na vei tikina oqo, a vakavulica o Sister Carol F. McConkie: “Kevaka me da na yalosavasava, e dodonu me da vulica na dabe sobu e yavai Koya na Yalosavasava ni Isireli ka solia na noda gauna ki na yalo savasava. Eda dau vakatikitikitaka beka na televoni, na ituvatuva tawayalani ni veika me caka, kei na lomaocaoca ni veika vakavuravura? Na masu, vulici, kei na muri ni vosa ni Kalou e sureta na Nona veivakasavasavataki kei na loloma veivakabulai ki na yaloda. Me da solia na gauna me da yalo savasava, me da vakasinaiti ena Nona Yalo tabu veivakatabui” (“The Beauty of Holiness,” Liaona, Me 2017, 11). O na vinakata beka mo dikeva na sala o vakayagataka kina na nomu gauna—ena veika vinaka sara mada ga. E tiko beka e dua na ka “e yaga” (tikina e 42) ka ganita vakalevu cake na nomu kauwai?

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 18:1–11.Na cava e vinakata kina o Jisu me da vaka na gonelailai? Na ivakarau cava soti e tu vei ira na gone e rawa ni da tara cake me da vakataki Karisito vakalevu cake kina? (raica na Mosaia 3:19).

E vinakati ira na Nona tisaipeli o Jisu me ra vakataki ira na gone lalai.

Maciu 18:15.Eda na vakayagataka vakacava na ivakasala ena Maciu 18:15 ki na noda veimaliwai vakamatavuvale? Ena vakalougatataka vakacava na noda matavuvale na kena vakayacori oqo?

Maciu 18:21–35.Na cava e vakatavulica vei keda na vosa vakatautauvata oqo me baleti Jisu Karisito? Na cava e vakavulica vei keda me baleta na ivakarau ni noda qaravi ira na tamata?

Luke 10:25–37.E ratou na rawa ni marautaka na lewe ni matavuvale me ratou daramaka na isulu ni vakatasuasua ka matanataka na vosa vakatautauvata oqo. Eda tautauvata vakacava ena so na gauna kei ira na tamata duidui ena vosa vakatautauvata? E tautauvata vakacava na iVakabula kei koya na kai Samaria dauloloma? E rawa vakacava me da na vakataki koya na kai Samaria dauloloma?

Sa rawa mo ni lagata vata e dua na serenilotu se nodra sere na lalai e tokona na dina ena vosa vakatautauvata oqo. Dua na kena ivakaraitaki sa ikoya na “Turaga Meu na Muri Kemuni” (Serenilotu, naba 129), ia e vuqa tale tu. E ratou na marautaka beka na lewe ni matavuvale me ratou kunea e dua na serenilotu se sere ka vakamacalataka na kena semati ki na vosa vakatautauvata.

Luke 10:38–42.E dadredre beka mo vakacuruma na veika vakayalo ena ituvatuva ni matavuvale? Na italanoa kei Meri kei Marica e rawa ni vakauqeta e dua na matabose vakavuvale se lotu vakamatavuvale me baleta na kena caka vakavinaka cake na ka oqo. Vakamatavuvale, sa rawa mo dou cakava e dua na ituvatuva ni sala eso me dou digia kina na “ka e yaga” (Luke 10:42).

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Dauloloma ko Jisu,” iVolanisere ni Lalai, 39.

Vakatoroicaketaki ni Noda Veivakavulici

Susuga na ivakarau ni veilomani. Na ivakarau ni nodra veimaliwai kei na veiqaravi vakai ira na lewe ni matavuvale ena rawa ni vakauqeta vakatitobu na yalo ni nomu vuvale. Vukea na lewe ni vuvale taucoko me ra tauyavutaka e dua na vuvale veilomani, veirokorokovi ka me ra rawa ni vakila kina ni ra maroroi ni ra wasea na veika era sotava, na taro, kei na ivakadinadina. (Raica na Veivakavulici ena iVakarau ni iVakabula, 15.)

O Karisito ena Vale nei Meri kei Marica, mai vei Walter Rane