O Jisu kei na marama sa lutu ena qele

Au sa Sega Talega ni Cudruvi Iko, mai vei Eva Koleva Timothy

24–30 ni Epereli

Joni 7–10

“Oi Au na iVakatawa Vinaka”

Nio wilika na Joni 7–10, ena rawa nio ciqoma na veivakauqeti mai na Yalo Tabu me baleta na ivakavuvuli vakaivunau ena vei wase ni vola oqo. Na nomu vola na vei ka o sa vakauqeti kina ena rawa ni vukei iko mo tuvanaka mo na vakayacori ira.

Vola na Nomu Nanuma Eso

E dina ga ni a lako mai o Jisu Karisito me “sa veivinakati rawa ko ira e vuravura” (Luke 2:14), ia e “ra sa veiletitaki koya na lewe vuqa” (Joni 7:43). O ira na tamata era a vakadinadinataka na vei ka vata ga a yaco e a duidui sara na nodra dui nanuma me baleta se ko cei o Jisu. Eso era kaya ni, “a tamata vinaka ko Koya,” eso tale era kaya, “sa lawakitaki ira ga na tamata” (Joni 7:12). Ena gauna e vakabula kina e dua na tamata mataboko ena Siga ni Vakacecegu, eso era kaya, “Na tamata oqo e sega ni tamata ni Kalou, ni sa sega ni vakatabuya na siga ni vakacecegu,” eso tale era kaya “E cakava rawa vakaevei na cakacaka mana oqo e dua na tamata ivalavala ca?” (Joni 9:16.). Ia, ena veilecayaki kece oqori, o ira na vakasaqara na dina era vakila na kaukauwa ni Nona vosa, ni “sa sega e dua na tamata sa vosa me vaka na tamata oqo” (Joni 7:46). Ni ra tarogi Jisu na Jiu me “tukuna vakamacala mai” kevaka sa ikoya dina na Karisito, e a vakaraitaka o Koya e dua na ivakavuvuli ena rawa ni vukei keda me da veidutaitaka kina na veika dodonu mai na cala: “Sa rogoca na noqu vosa ko ira na noqu sipi,” a kaya o Koya, “ia ka’u sa kilai ira ka ra sa muri au” (Joni 10:27

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Joni 7:14–17

Ni’u bulataka na dina e vakatavulica o Jisu Karisito, e na yaco me’u kila ni dina.

Era kurabui na Jiu ena levu ni ka e kila o Jisu, me vaka ni a sega ni vuli o Koya (raica na tikina 15)—me vaka, ena sala era kila o ira. Ni sauma o Jisu, e veivakatavulici o Koya ena sala duidui eso me kilai kina na dina ka rawa ni kila na tamata kece, veitalia na ivakatagedegede ni vuli se ituvaki cava ga ni bula eda tiko kina. Ena Joni 7:14–17, e rawa vakacava mo kila ni vakavuvuli e vakatavulica o Jisu e dina? E sa vukei iko vakacava na iwalewale oqo mo vakatoroicaketaka kina na nomu ivakadinadina ni kosipeli?

Joni 8:2–11

Sa soli tu vei keda kece na loloma veivueti ni iVakabula.

Ni vosa tiko ena nodrau veitalanoa na iVakabula kei na marama dautagane, e kaya kina o Elder Dale G. Renlund: “E sega dina ni vakadonuya na iVakabula na dautagane. Ia a sega talega ni cudruva na yalewa o Koya. A vakayaloqaqataki koya me veisautaka na nona bula. A vakauqeti me veisau ena vuku ni Nona yalololoma kei na loloma veivueti. Na iVakadewa i Josefa Simici ena iVola Tabu e vakadinata na nona qai veisau vakatisaepeli: ‘Sa qai vakalagilagia na Kalou ena auwa vata oya na marama oqo, ka vakabauta na yacana’ [raica na Joni 8:11, vakamacala e rac]” (“Our Good Shepherd”,” Liaona, Me 2017,30).

O sa bau vakila e dua na gauna o vaka kina na marama oqo, ena nomu ciqoma na loloma veivueti ka sega ena veicudruvi mai vua na iVakabula? Ena gauna cava o a vakakina na vunivola kei na Farisi, ena nomu veidusi kei na vakalelewa vei ira na tani ena gauna madaga o sega ni savasava tiko kina? (raica na Joni 8:7). Na cava tale o rawa ni vulica ena veimaliwai ni iVakabula kei ira na vunivola kei na Farisi kei na yalewa a tobo ni a dautagane tiko? Na cava o vulica me baleta na veivosoti ni iVakabula mai na vei tikina oqo?

Raica talega na “Go and Sin No More” (vidio), ChurchofJesusChrist.org.

Joni 9

Kevaka eda vakabauta, e rawa ni vakaraitaki Koya na Kalou ena gauna ni noda vakararawataki.

Na cava e vakavulica vei iko na Joni 9:1–3 me baleta na bolebole kei na veivakararawataki ni bula? Nio wilika na Joni 9, vakasamataka vakatitobu na sala “me vakatakilai ga na cakacaka ni Kalou” ena nona bula na tamata sucu mataboko. Era sa vakatakilai vakacava oqo ena nomu bula—oka kina ena nomu vakararawataki?

Joni 10:1–30

Sa iVakatawa Vinaka o Jisu Karisito.

Kevaka mada ga o sega ni kilai ira vinaka na sipi kei na nodra vakatawani, wilika na Joni 10, na gauna a kaya kina na iVakabula, “Oi au na ivakatawa vinaka,” e rawa ni vakavulica vei iko na dina bibi me baleti Koya. Mo kunea na vei dina oqo, vakasaqara na malanivosa e vakamacalataka na cava na ivakatawa vinaka ni sipi ka qai vakasamataka na sala e vakayagataki kina na vei malanivosa oqori vua na iVakabula. Oqo e vica na ivakaraitaki:

• Tikina e 3: “A sa kacivi ira na nona sipi ena yacadra ko koya, ka tuberi ira.”

• Tikina e 11: Sa “solia na nona bula ena vukudra na sipi.”

• Tikina e 16: “Ena qai duabau na qele ni sipi ka duabau nai vakatawa.”

Oqo eso na ikuri ni taro me vukei iko mo vakasamataka vakatitobu na wase oqo: Sa vakataka vakacava o Jisu e dua na katuba? (raica na tikina e 7–9). Sa solia vakacava vei iko o Koya na “bula … me rawa vakalevu sara”? (tikina e 10). Na gauna cava o sa bau vakila kina ni kilai iko dina tiko o Koya? (raica na tikina e 14). O na kila vakacava na domona na iVakatawa Vinaka? (raica na tikina e 27).

Raica talega na Same 23; Isikeli 34; Alama 5:37–39; 3 Nifai 15:21–16:5; Gerrit W. Gong,“Good Shepherd, Lamb of God,” Liaona, Me 2019, 97–101.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Joni 7:24.Me vukea na nomu vuvale me ratou kila vinaka na ivakavuvuli nei Jisu ena Joni 7:24, e rawa ni o vakaraitaka vei iratou e dua na sala ka dua na kena iraira e tautuba ia e duidui e loma. Se e rawa ni ratou wasea na lewe ni matavuvale na veika e ratou sotava ka vakavulici iratou me ratou kakua ni vakalewa na irairai e taudaku. E rawa talega ni o vola na vei ka vinaka ni lewe ni matavuvale yadua e sega ni laurai rawa e mata (raica talega na 1 Samuela 16:7; Thomas S. Monson, “See Others as They Become,” Liaona, Nove. 2012, 68–71).

Joni 8:31–36.Na cava na ibalebale mo “bobula ki na ivalavala ca”? (raica talega na Moronai 7:11). Na dina cava e vakatavulica o Jisu ka na rawa ni sereki keda?

Sa vakabula na Karisito e dua na tamata mataboko

Sa Vakabula o Jisu na Tamata Mataboko, mai vei Carl Heinrich Bloch

Joni 9.Ena rawa vakacava mo vukea na nomu matavuvale ena kena raitayaloyalotaki na nona vakabula o Jisu e dua na tamata mataboko ena Joni 9? Sa rawa mo dou dramataka vata na italanoa se sarava na vidio “Jesus Heals a Man Born Blind” (ChurchofJesusChrist.org). Tarova wasoma na italanoa me rawa ni wilika o iratou na lewe ni vuvale na tikina veisemati eso ena Joni 9. Sureti iratou me ratou vola na vei lesoni e ratou vulica mai na italanoa oqo, me vaka na ibalebale ni da sa saumaki ki na kosipeli i Jisu Karisito.

Joni 10:1–18, 27–29.Me ra okati na lewe ni vuvale ena vulici ni vosa vakatautauvata ni vakatawa vinaka, kerei iratou yadua me ratou droinitaka e dua na itaba mai vei ira oqo: e dua na daubutako, katuba, vakatawa ni sipi, dua na daucakacaka saumi, na olifa, kei na sipi. Sureti iratou me ratou wilika na Joni 10:1–18, 27–29, ka qai dou veitalanoataka vakavuvale na veika e vakatavulica na iVakabula me baleta na vei ka e ratou droinitaka.

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Serenilotu vakaturi: “Noqu i Vakatawa,” Serenilotu, naba 60.

Vakatoroicaketaki ni Vuli Yadudua

Vakaraica na vei vosa kei na malanivosa veivakauqeti. Nio wiliwili tiko, ena rawa ni kauta mai vei iko na Yalo eso na vosa kei na malanivosa ka na vakauqeti iko ka qai vakayaloqaqataki iko me vaka ga esa volai me baleti iko. Vakasamataka mo toqa toka eso na vosa se malanivosa e vakauqeti iko ena Joni 7–10.

O Karisito kei na lami

Sega Tale ni Yali, mai vei Greg K. Olsen