Vakamataliataki i Karisito

Na Mataliataki, maivei Carl Heinrich Bloch

10–16 ni Epereli

Maciu 15–17; Marika 7–9

“Oi Kemuni na Karisito”

Na wiliki ni ivolanikalou ena sureta na Yalo Tabu kina nomu bula. E dua na ilesilesi bibi ni Yalo Tabu o ya me vakadinadinataki Jisu Karisito. Nio wilika na ivolanikalou ena macawa oqo, vakarogoca vinaka na veika o vakila vakayalo e vakaqaqacotaka na nomu ivakadinadina me baleta na iVakabula.

Vola na Nomu Nanuma

E sega li ni kurabuitaki ni ra mai tukuna vei Jisu na Farisi kei na luvei Setoki me vakaraitaka vei ira “e dua na ivakatakilakila mai lomalagi”? E sega beka ni rauti ira na vuqa na Nona cakacaka mana rogo levu? Vakacava beka na Nona ivakavuvuli qaqa se na vuqa na sala a vakavotukanataka kina o Koya na vei parofisai makawa? Na nodra kudru e a vu sega ni baleta ni lailai na ivakatakilakila ia e baleta ga ni ra sega ni yalo rawarawa me ra “kila rawa na veivakatakilakila” ka ciqomi ira. (Raica na Maciu 16:1–4.)

Ko Pita, me vakai ira na Farisi kei na luvei Setoki, a vakadinadinataka na Nona cakacaka mana na iVakabula ka rogoca na Nona ivakavuvuli. Ia na ivakadinadina deivaki nei Pita, “Oi kemuni na Karisito, na Luve ni Kalou bula,” a sega ni lako mai ena nona vakila vakayago—na nona “lewe kei na dra.” Na nona ivakadinadina e a vakatakilai vua mai vei “Tamada sa tiko mai lomalagi.” Ai Vakatakila sa vatu ka tara kina na iVakabula na Nona Lotu ena gauna e liu kei na gauna oqo—na ivakatakila mai lomalagi ki vei ira na Nona italai. Ia sa ikoya oqo na vatu ka rawa ni da tara kina na noda itutu vakatisaepeli—a ivakatakila ni ko Jisu na Karisito kei ira na Nona italai era taura tu “na idola ni matanitu.” Ni da sa tarai cake ena dela ni yavuvatu oqo, “ena sega ni rawati [keda] na matamata ni koro ni etesi.” (Maciu 16:15–19).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Maciu 16:13–17

Na vakadinadinataki Jisu Karisito e yaco mai ena ivakatakila.

Kevaka e tarogi ira na tamata o Jisu Karisito nikua, “O cei era kaya na tamata ni sai Au na Luve ni Tamata?” na cava beka era na kaya? Ko na sauma vakacava ke sa tarogi iko ko Jisu, “Ia dou sa kaya se ko cei koi au?” (Raica na Maciu 16:13–15.)

Vakasamataka vakatitobu na nomu ivakadinadina ni iVakabula ka ko a ciqoma vakacava. Na cava ko sa vulica mai na Maciu 16:15–17 ka rawa ni vakaqaqacotaka? Kevaka ko via vulica vakalevu na vei ka e baleta na ivakadinadina kei na ivakatakila yadudua, vakasaqaqara ena vei tiki ni ivolanikalou oqo: Joni 15:26; 2 Nifai 31:17-18; Alama 5:45–48; kei na Vunau kei na Veiyalatalati 8:2–3.

Raica talega na “President Nelson: Hear Him—Personal Revelation” (vidio), ChurchofJesusChrist.org.

Maciu 16:13–19; 17:1–9; Marika 9:2–9

“Na idola ni matanitu vakalomalagi” sa tu e vuravura nikua.

Na “idola ni matanitu vakalomalagi” ka a yalataka na iVakabula me solia vei Pita era sa idola vakamatabete (Maciu 16:19) Na cava na idola ni matebete? Na cava na vuna eda gadrevi ira kina? Vakasamataka vakatitobu na vei taro oqo ni ko wilika na iyalayala ni iVakabula era tiko ena Maciu 16:13–19 kei na kena vakavotukanataki ena Maciu 17:1–9; Marika 9:2–9 (raica talega na iVakadewa i Josefa Simici, Marika 9:3 [ena Marika 9:4, ivakamacala e ra a]).

Na ivurevure tale eso me vukei iko mo vulica na vei ka me baleta na idola ni matabete e oka kina na Vunau kei na Veiyalayalati 65:2; 107:18–20; 110:11–16; 128:9–11; “iDola ni Matabete” ena iDusidusi ki na iVolanikalou (scriptures.ChurchofJesusChrist.org); kei na itukutuku nei Elder Gary E. Stevenson “Where are the Keys and Authority of the Priesthood?,” (Liaona, Me 2016, 29–32). Ni o vulica tiko na ivurevure eso oqo, sa rawa mo vola e dua na lisi ni vei ka o sa vulica me baleta na idola ni matabete kei na veivakalougatataki e lako mai vei ira. Na cava na vuna o nanuma kina ni idola sa dua na ivakatakarakara vinaka ni dodonu me liutaka na veiqaravi ni matabete?

Raica talega na Dallin H. Oaks, “The Melchizedek Priesthood and the Keys,” Liaona, Me 2020, 69–72; Bible Dictionary, “Transfiguration, Mount of.”

ivakatakarakara i Pita ni taura tu na ki

Na idola ni matabete sa ikoya na lewa me dusimaka na vakayagataki ni matabete.

Maciu 17:14–21; Marika 9:14–29

Ni‘u vakasaqara na vakabauta e cecere cake, au sa rawa ni tekivu ena vakabauta sa tu vei au.

E tiko na vuna e vakatitiqa kina na tama ka tukuni tiko ena Maciu 17 kei na Marika 9 ni rawa ni vakabulai luvena o Jisu. A kerei iratou taumada na tisaipeli i Jisu me ratou vakabula na luvena tagane oqo, e ratou a sega ni rawata. Ia ni kerea vua na iVakabula me vakayacora e dua na cakamana, a digitaka me vakaraitaka na nona vakabauta. “Kemuni na Turaga, au sa vakabauta,” a kaya o koya. Ia me vaka ni sa takiveiyaga na nona vakabauta, a kuria yani, “Vukea na noqu tawa-vakabauta.”

Na cava e vakatavulica vei iko na Yalo nio wilika na cakacaka mana oqo? Sa vukei iko vakacava na Tamada Vakalomalagi me tubu kina na nomu vakabauta? Na cava o rawa ni cakava mo tara cake kina na nomu vakabauta ena kena sa tu rawa vei iko? Ena vinaka beka mo biuta vata e dua na lisi ni vei tiki ni ivolanikalou, itukutuku ni koniferedi, se na ka ko a sotava ka a vakaukauwataka na nomu vakabauta.

Raica talega na Jeffrey R. Holland, “Lord, I Believe,” Liaona, Me 2013, 93–95.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 15:7–9; Marika 7:6–7.Na cava na kedrau duidui na doka na Kalou ena gusuda, se vosa, kei na dokai Koya ena yaloda?

Maciu 15:17–20; Marika 7:18–23.Na cava na vuna me da qarauna kina na vei ka eda biuta ki gusuda? Ni yavutaki ena vei ka a vakavulica o Jisu ena vei tikina oqo, na cava na vuna me da qarauna vakavinaka cake kina na vei ka e lako mai gusuda—kei na yaloda? Me da cakava vakacava me savasava tiko na yaloda?

Maciu 16:15–17.E vakatakila vakacava vei keda na Kalou nio Jisu “na Karisito, na Luve ni Kalou bula”? (tikina e 16). Me da na vakarautaki keda vakacava me da ciqoma mai Vua na ivakatakila?

Maciu 16:13–19; 17:1–9.Me ra vakavulici o ira na gone me baleta na idola ni matabete, e rawa nio tukuna na italanoa nei Elder Gary E. Stevenson me baleta na nona a lokataki e tautuba mai na nona motoka (raica na vidio “Where Are the Keys?” ena ChurchofJesusChrist.org). Me ra qai vakayagataka na luvemu na ki me ra dolava na vale, na motoka, se so tale na loka. Sa rawa mo vakaraitaka na itaba ni Peresitedi ni Lotu ka vakadinadinataka ni taura tu o koya na idola taucoko ni matabete, me vakataki Pita e liu.

Maciu 17:20.O ira na parofita ni ra vakabauti Jisu Karisito era tosoya na ulunivanua dina (raica Jekope 4:6; Mosese 7:13). Ia e vakavuqa, oqori e sega ni cakamana eda gadreva. E vakavulica o Peresitedi M. Russell Ballard: “Kevaka sa lailai na noda vakabauta me vaka na sore ni musita, sa rawa ni vukei keda na Turaga me da tosoya tani na ulunivanua ni yalo lailai kei na vakatitiqa me baleta na cakacaka sa tu e matada ni da qaravi ira na luve ni Kalou, kei na lewe ni matavuvale, lewe ni Lotu, kei ira se bera ni ra lewe ni Lotu.” (“Precious Gifts from God,” Liaona, Me 2018, 10). Na cava e so na ulunivanua ena noda bula ka sa gadrevi me kau tani? Eda vakaraitaka vakacava na noda vakabauta na kaukauwa ni Kalou me vukei keda me da tokia na vei ulunivanua oqo?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Serenilotu vakaturi: “Au Kilai Jisu,” Serenilotu, naba 74.

Vakatoroicaketaki ni Noda Veivakavulici

Soqoni vata vakawasoma E vakatavulica o Peresitedi Henry B. Eyring: “Kua ni calata e dua na madigi mo soqoni ira vata na gone me ra vulica na vunau i Jisu Karisito. Na vei gauna vakaoqo e vakavudua ni vakatauvatani kei na sasaga ni vunica” (“The Teaching of the Power of Teaching Doctrine,” Ensign, Me 1999, 74).

o tagane kei na luvena tagane tauvimate e matai Jisu

Turaga, Au Sa Kauta Mai na Luvequ Tagane Vei Kemuni, mai vei Walter Rane