8–14 ni Me

Maciu 19–20; Marika 10; Luke 18

“A Cava Tale sa Vo Vei Au?”

Wilika ka vakasamataka vakatitobu na Maciu 19–20; Marika 10; kei na Luke 18, ka rogoca matua na veivakauqeti o ciqoma. Toqa toka na veivakauqeti oqori, ka vakadeitaka na sala mo na cakacakataki ira kina.

Vola na Nomu Nanuma

Kevaka e nomu na madigi mo taroga vua na iVakabula e dua na taro, na cava o na taroga? Na gauna a sota kina na cauravou vutuniyau kei na iVakabula ena imatai ni gauna, a taroga o cauravou, “A cava na ka vinaka meu kitaka, meu rawata kina na bula tawamudu?” (Maciu 19:16). Na veika e tukuna na iVakabula e vakaraitaka na vakavinavinakataki ni veika vinaka e sa vakayacora oti o cauravou kei na nona taleitaka me vakayaloqaqataki me vakayacora sara vakalevu. Ni da vakasamataka vakatitobu na kena rawati na bula tawamudu, eda na rawa talega ni vakataroga ke sa levu tu beka na ka e dodonu me da vakayacora tiko. Ni da taroga, vakai keda ga, “A cava tale sa vo vei au?” (Maciu 19:20), ena rawa ni solia vei keda na Turaga na isau ni taro e ganiti keda saraga vakayadua me vaka ga na Nona a sauma na nona taro na cauravou vutuniyau. Na cava ga e kerea na Turaga me da cakava, na cakacakataki ni Nona isau ni taro ena gadrevi wasoma kina me da nuitaki Koya vakalevu cake mai na noda vakanuinui kina noda ivalavala dodonu (raica na Luke 18:9–14) ka me da “vakabauta na matanitu ni Kalou me vaka na gonelailai” (Luke 18:17; raica talega na 3 Nifai 9:22).

Vakasama Eso ni Vuli iVolanikalou ni Tamata Yadua

Maciu 19:3–9; Marika 10:2-12

Na nodrau vakamau e dua na tagane kei na yalewa esa ilesilesi ni Kalou.

Na veiwasei a cakava na iVakabula kei ira na Farisi a dua ga mai na vica na itukutuku volai ka veivakatavulici vakatabakidua kina na iVakabula me baleta na vakamau. Ni wiliki oti na Maciu 19:3–9 kei na Marika 10:1–12, cakava e dua na ituvatuva ni itukutuku o nanuma ni na soqona vata na nona rai na Turaga me baleta na vakamau. Mo qai vulica eso na ivurevure e kune ena “Vakawati” (Ulutaga Vakosipeli, topics.ChurchofJesusChrist.org), ka vakuria eso tale na itukutuku ki na nomu lisi. Na veika o kila me baleta na yavu ni veivakabulai ena tara vakacava na nomu vakasama kei na nomu nanuma me baleta na vakawati?

Maciu 19:3–9; Marika 10:2-12

E vakatavulica beka o Jisu ni sereki ni vakamau e sega ni dodonu se na tamata e sa sere e sega ni dodonu me vakamau tale?

Ni vosa tiko me baleta na sereki ni vakamau, e vakatavulica o Elder Dallin H. Oaks nio Tamada Vakalomalagi e vinakata me tawamudu na bulataki ni vakamau. Ia, e kila talega na Kalou ni dau gadrevi ena so na gauna na veisere. E vakamacalataka o Elder Oaks ni Turaga e “vakatara me vakawati tale e dua ka sa sereki mai ena vakamau ka sega ni tu vua e dua na duka ni tawasavasava ni lawa cecere. Vakavo ga kevaka e sa vakayacora na ivalavala ca bibi na lewe ni lotu sa sereki mai na vakamau, ena rawa vua me vakai volatara ni valetabu ena ivakatagedegede vata ga ni bula kilikili me vakataki ira na lewe ni lotu kece” (“Divorce,” Liaona, Me 2007,70).

Maciu 19:16–22; Marika 10:17–22; Luke 18:18–23

Kevaka au kerea vua na Turaga, ena vakavulica vei au o Koya na veika au gadreva me’u rawata kina na bula tawamudu.

Na itukutuku ni cauravou vutuniyau ena rawa ni tu kina vakadua o koya mada ga e tisaipeli yalodina, ena nona bula taucoko. Nio wilika na Marika 10:17–22, na ivakadinadina cava o kunea me baleta na nona yalodina ka lomadina o cauravou? Na cava na nona nanuma na Turaga me baleta na cauravou oqo?

Na itukutuku oqo ena rawa ni uqeti iko mo taroga, “A cava tale sa vo vei au?” (Maciu 19:20). E vukei keda vakacava na Turaga me rawa kina ni da rawata na veika e sega vei keda? (raica na Ica 12:27). Na cava eda rawa ni vakayacora me vakarautaki keda me da ciqoma na Nona veivakadodonutaki kei na veivuke ni da saga me da torocake?

Raica talega na Larry R. Lawrence, “What Lack I Yet?”,” Liaona, Nove. 2015, 33–35; S. Mark Palmer, “Then Jesus Beholding Him Loved Him,” Liaona, Me 2017, 114–16.

Maciu 20:1–16

Na tamata taucoko ena rawa ni ciqoma na veivakalougatataki ni bula tawamudu, veitalia na gauna cava ga era ciqoma kina na kosipeli.

Ena rawa beka nio semati ki na ka e sotava e dua vei ira na tamata cakacaka ena were ni vaini? Na lesoni cava so o kunea e baleti iko ena tikina oqo? Na itukutuku nei Elder Jeffrey R. Holland “The Labourers in the Vineyard” (Liaona, Me 2012, 31–33) ena rawa ni vukei iko mo raica na sala vou mo taurivaka kina na vosa vakatautauvata oqo. Na veivakauqeti cava tale eso e solia vei iko na Yalo?

Na Dau Kumuni Vakacavacava Veivutuni kei Koya na Farisi sa Vakadonui Koya Ga Vakai-Koya ena Vale Tabu, mai vei Frank Adams

Luke 18:9–14

E dodonu me‘u nuitaka ga na loloma veivueti ni Kalou, ka sega ena noqu ivalavala dodonu.

O na vakalekalekataka vakacava na kedrau duidui na masu e rua ena vosa vakatautauvata oqo? Vakasamataka vakatitobu na veika o nanuma mo na cakava mo vakataka vakalevu cake kina na daukumuni vakacavacava ena italanoa oqo ka sega ni vakataki koya na Farisi.

Raica talega na Filipai 4:11–13; Alama 31:12–23; 32:12–16.

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Marika 10:13–16; Luke 18:15–17.Me vukei iratou na lewe ni matavuvale me ratou vakasamataka vakatitobu na itukutuku ena vei tikina oqo, sa rawa mo dou lagata vata e dua na sere veisemati, me vaka na “Nai Talanoa Makawa O Ya” (Nodra iVolanisere na Lalai, 35). Ena vakacava tu beka kevaka me da a maliwai ira tu na gonelalai a masulaki ira o Jisu? Na cava beka na ibalebale ni “ciqoma na matanitu ni Kalou me vaka e dua na gonelailai”? (Marika 10:15).

Marika 10:23–27.Na cava na kedrau duidui na tiko vutuniyau kei na nuitaka tiko na iyau? (raica na Marika 10:23–24). Nio wilika na tikina e 27, sa rawa ni o wasea na iVakadewa i Josefa Simici: “O ira sa vakararavi ki na iyau, sa dredre vei ira; ia e sega ni dredre vei ira sa vakararavi vua na Kalou ka biuta na ka kecega ena vukuqu, ni kivei ira sa vakaoqo na ka kece oqo sa rawa vei ira” (iVakadewa i Josefa Simici, Marika 10:26 [ena Marika 10:27, ivakamacala e ra a]). Vakamatavuvale, eda sa vakaraitaka tiko vakacava ni da vakararavi vakalevu cake vua na Kalou mai na veika vakayago?

Maciu 20:1–16.Me vakamatatataki na ivakavuvuli ena Maciu 20:1–16, sa rawa nio vakayacora e dua na veisisivi rawarawa, me vaka na veitaucici leleka. Ni sa vakacavari na veisisivi, solia kece vei ira yadua na icocovi vata ga, me tekivu mai vei koya e murimuri ka tinia vei koya e matai. Na cava e vakatavulica vei keda oqo me baleta na ciqomi ni veivakalougatataki ni bula tawamudu ena ituvatuva ni Tamada Vakalomalagi?

Maciu 20:25–28; Marika 10:42–45.Na cava na ibalebale ni malanivosa oqo “ ka me nomudou tamata ko koya yadua vei kemudou sa viavia turaga”? (Maciu 20:27). A vakaraitaka vakacava o Jisu Karisito na ivakavuvuli oqo? Ena rawa vakacava me da vakamuria na Nona ivakaraitaki ena noda vuvale, tabanalevu se tabana, kei na noda tikotiko raraba?

Luke 18:1–14.Na cava eda vulica me baleta na masu mai na rua na vosa vakatautauvata ena vei tikina oqo?

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Sa Voleka na Kalou,” Sere ni Lotu, naba 49.

Vakatoroicaketaki ni Vuli Yadudua

Raica na gauna e ganiti iko. E dau rawarawa sara na vuli nio rawa ni vulica na ivolanikalou ka sega ni o vakaosoosotaki. Raica na gauna e veiganiti vei iko, ka qai solia na nomu vinaka taucoko mo na vuli tiko ena gauna vata oqori e veisiga yadua.

Karisito kei na Cauravou iLiuliu Vutuniyau, mai vei Heinrich Hofmann.