14–20 ni Okosita

Roma 7–16

“Mo Rawa ga na Ca ena Vinaka”

E vica ga na ivakavuvuli ni kosipeli ena Roma 7–16 e rawa ni tiki ni dusidusi oqo, mo kakua kina ni yalani iko mai na veika e tukuni tiko eke. Raica matua na veivakauqeti o ciqoma ena gauna o vuli tiko kina.

Vola na Veika o Vakauqeti Kina

Ni sa dolava na nona iVola vei ira na kai Roma, a kidavaki ira na lewe ni Lotu o Paula ena nona kacivi ira “oi kemudou sa daulomana na Kalou” era sa “kacivi me yalosavasava.” E tukuna o koya ni “[sa] tukuni e vuravura taucoko na nomudou vakabauta” (Roma 1:7–8). E dina ga ni levu na gauna e vola tiko o Paula me vakadodonutaka tiko e vuqa na ivakarau cala, ia e vaka e vinakata o koya me vakadeitaka vei ira na saumaki vou mai ena vakabauta Va-Karisito ni ra sa Yalosavasava dina o ira sa daulomana na Kalou. Na nona ivakasala malumu e vakalougatataki keda kece eda sasagataka me da vakila na loloma ni Kalou ka vakakina vei ira era vakila ni dredre mera yaco me Yalododonu. Ena veikilai yalo dokai, a vakaraitaka kina o Paula ni a vakila ni a “tamata vakaloloma” ena so na gauna (Roma 7:24), ia na kosipeli i Jisu Karisito a solia vua na kaukauwa me vorata nai valavala ca (raica na iVakadewa i Josefa Simici, Roma 7:22–27 [ena iDusidusi ki na iVolanikalou]). Ena kaukauwa oya, na kaukauwa veivueti ni iVakabula, sa rawa meda “rawa ga na ca”—na ca e vuravura kei na ca ena lomada—“ena vinaka” (Roma 12:21).

Vakasama Eso ni Vuli iVolanikalou ni Tamata Yadua

Roma 7–8

O ira era muria na Yalo e rawa ni yaco me ra sa “itaukei vata kei Karisito.”

Dina ga ni sa curumi oti na “bula vou” ena cakacaka vakalotu ni papitaiso (Roma 6:4), ena rawa ni o vakila eso na veiba e yaco e lomada ka vakila o Paula me vaka e vakamacalataki ena Roma 7—na “veivala” ena kedrau maliwa na tamata vakayago kei na nomu gagadre yalododonu (Roma 7:23). A tukuna talega o Paula na nuinui ena Roma 8:23–25. Na cava na vu ni nuinui oqo o kunea ena wase 8? Ena rawa ni o vasaqara na veivakalougatataki e sala vata mai ni “sa tiko e na lomamudou na Yalo ni Kalou” (Roma 8:9). Ena rawa vakacava ni o vakasaqara vakataucoko na veitokani ni Yalo Tabu ena nomu bula?

Roma 8:16-39

Na isolisoli ni lagilagi tawamudu e uabaleta sara na noqu vakatovolei e vuravura.

Ni oti ga e vica na yabaki mai na nona vola o Paula nai vola oqo, era a sotava na Yalosavasava e Roma e vuqa na veivakacacani vakarerevaki. Na cava o raica ena Roma 8:16–39 a rawa ni a vukei ira na Yalosavasava oqo ena gauna a yaco mai kina na veivakacacani? Ena rawa vakacava ni baleti iko na vosa oqo kei na veivakatovolei o sotava tiko ena gauna oqo?

Vakasaqara na isema ena veitikina oqo kei na ivakasala mai vei Sister Linda S. Reeves: “Au sega ni kila na vuna e levu tu ga kina na noda vakatovolei, ia na noqu nanuma ni na cecere na kena isau, sa tawamudu ka tawayalani, sa ka rekitaki sara ka sega ni da kila rawa ni yaco mai noda siga ni veisaumi, eda na vakila meda kaya vua na Tamada dauveivueti ka dauloloma, ‘Sai koya kece beka ga o ya e a gadrevi?’ Au vakabauta kevaka meda nanuma ka kila tiko ena veisiga yadua na titobu ni nodrau lomani keda na Tamada Vakalomalagi kei na noda iVakabula, eda na vakaio meda cakava na veika kecega Rau kerea meda lesu rawa kina vei Rau, ka solegi ena Nodrau loloma tawamudu. Na cava na kena yaga … na noda mai rarawa tu eke, kevaka sa mai cava, na veivakatovolei kece oqori sai koya saraga na ka meda rawata kina na bula tawamudu kei na bula vakacerecerei ena matanitu ni Kalou vata kei Tamada kei na iVakabula?” (“Kilikili ki na Noda Veivakalougatataki Yalataki,” Liaona, Nove. 2015, 11). Vakatulewataka na veika o na vakayacora mo “nanuma ka kila e vesiga” na loloma ni Kalou vei iko.

Roma 8:29–30; 9–11

Na cava nai balebale ni veika e tukuna o Paula “lesi ira e liu,” “digitaki,” ka “kila e liu”?

E vakayagataka o Paula na vosa “lesi ira e liu,” “digitaki,” ka “kila e liu” me vakavulica ni se bera na bula oqo, a digitaka na Kalou eso vei ira na Luvena me ra tiki i Isireli, na Nona tamata ni veiyalayalati. Sa kena ibalebale oqo ni ra na ciqoma na veivakalougatataki kei na ilesilesi talei me rawa ni ra vakalougatataki kina o ira na tamata kecega (raica na iDusidusi ki na iVolanikalou, “Veidigidigi,” scriptures.ChurchofJesusChrist.org). Ia, e vakamatatataka o Paula ena Roma 9–11 ni o ira kece na luve ni Kalou sa rawa me ra Nona tamata ni veiyalayalati, ka da ciqoma kece na bula tawamudu ena sala vata ga—mai na vakabauti Jisu Karisito ka talairawarawa ki na Nona ivakaro.

Raica talega na Efeso 1:3–4; 1 Pita 1:2; Alama 13:1–5; Ulutaga Vakosipeli, “Tabaki Taumada,” topics.ChurchofJesusChrist.org.

Roma 12–16

E sureti au o Paula meu Yalododonu yalodina ka daumuri Jisu Karisito.

Na iotioti ni lima ni iwase ni vola i Roma e tiko kina e vica vata na daseni na idusidusi matailalai me baleta na ivakarau me ra bula kina na Yalosavasava. E dua na sala mera vulici kina na idusidusi oqo o ya me vakasaqarai na ulutaga e tokaruataki tiko. Mo na vakalekataka beka vakacava na ivakasala oqo nei Paula?

Ena sega beka ni rawa mo bulataka kece na veivakasala oqo ena dua ga na gauna, ia na Yalo ena rawa ni vukei iko mo kunea e dua se rua na ivakavuvuli o na rawa ni tekivu cakacaka mai kina nikua. Wasea na gagadre ni yalomu ki vua na Tamamu Vakalomalagi ena masumasu, ka kerea Nona veivuke.

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Roma 8:31–39.Na cava eda kunea ena Roma 8:31–39 e vakavulica na veika e vakila na Tamada Vakalomalagi kei Jisu me baleti keda? Na gauna cava eda sa bau vakila kina na loloma ni Kalou?

Me vakamatatataki na tikina e 38–39, sa rawa vei ira na lewe ni matavuvale mera vakaraica na ivakaraitaki ni veika, e sega ni rawa ni tawasei, me vaka o keda kei na loloma ni Kalou.

E vakatavulica o Elder Wilford W. Andersen, “Na ivakatagi ni kosipeli sa ikoya [e dua] na ka vakilai rekitaki vakayalo.”

Roma 9:31–32.Na itukutuku nei Elder Wilford W. Andersen “Na iVakatagi ni Kosipeli” (Liaona, Me 2015, 54–56; raica talega na vidio ena ChurchofJesusChrist.org) ena vukea me vakamacalataka na veika e vakavulica o Paula me baleta na lawa, cakacaka, kei na vakabauta. Ni sa veivosakitaki oti na nona vosa, sa rawa ki na nomu matavuvale me ratou danisi vata kei na ivakatagi ka danisi e sega kina na ivakatagi. Ena vukei keda vakacava na vakabauta meda sotava na reki ni kosipeli?

Roma 10:17.Vakayacana e vica vata na bilo wai ena veika eda dau raica kina na vosa ni Kalou (me vaka na ivolanikalou, ivakatakila ki na tamata yadua, kei na koniferedi raraba). Veivosakitaka na sala e vakalevutaka kina noda vakabauta na vosa ni Kalou ni o sova na bilo yadua ena dua na itawatawa ka yacana na “Vakabauta.”

Roma 12.Na cava e kena ibalebale meda “i madrali bula, me savasava, me vinaka vua na Kalou”? (tikina e 1).

Roma 14:13–21.Ena rawa ni yaga ki na nomu vuvale me vulica na ivakasala i Paula me baleta na vakalewai kei na veibataki ni veika eda dui taleitaka cake vakai keda yadua. Sa rawa me veivosakitaki na sala veidonui me sotavi kina na gauna e duidui kina na nodra digidigi na tamata tale eso, oka kina na lewe ni matavuvale, mai na nomu. Ena rawa vakacava meda “muria kina na veika ni veivinakati”? (tikina e 19).

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Au Vakilai Koya,” iVolanisere ni Gonelalai, 42.

Vakatorocaketaki Noda Veivakavulici

Laivi ira na gone mera vakaraitaka na nodra vakasama vovou. “Ni o sureti ira na gone me ra bulia e dua na ka e veisemati kei na ivakavuvuli ni kosipeli, o sa vukei ira tiko me ra kila vinaka cake nai vakavuvuli. … Vakatara me ra bulibuli, droini, volavola, ka vakasama vovou” (Veivakavulici ena iVakarau ni iVakabula, 25).

Tikoga kei Au, mai vei Del Parson