14–20 ni Okosita

Roma 7–16

“Mo Rawa Ga na Ca e na Vinaka”

Ni o wilika na Roma 7–16, vola na veivakauqeti o ciqoma baleta na ivakarau o rawa ni vakavulica kina vei ira na gone na dina ena wase eso oqo.

Sureta na Veiwasei

Ni se vo e vica na siga, sureta e dua se vica na gone me ra raica e dua na tikina ena Roma 7–16 e rawa ni ra wasea ki na kalasi. O rawa ni sureti ira na nodra itubutubu me ra veivuke kevaka e gadrevi.

Vakavulica na iVunau: Gone Sobu

Roma 8:35–39

Sa lomani au na Tamaqu Vakalomalagi.

O na vakayagataka vakacava na vosa i Paula mo vakavulici ira kina na gone ni na dau lomani ira tikoga na Tamada Vakalomalagi?

iTaviqaravi e Rawa ni Caka

• Vukei ira na gone me ra cavuqaqataka na malanivosa “[E sega ni dua na ka] e rawa me tawasei keda mai na loloma ni Kalou” (Roma 8:39). Vakasamataka e dua na sala me vakaraitaki kina na dina oqo. Me ivakaraitaki, rawa ni o kauta mai e rua na papa o sa vakota vata, e dua e vakatokai “o keda” kei na kena ikarua “na loloma ni Kalou.” Me ra qai tovolea na gone ni tawasea na papa.

• Vakaraitaka e dua nai yaloyalo ni matanisiga, se sureti ira na gone me ra rai yani ki tuba ka raica na rarama ni matanisiga. E tautauvata vakacava kei na matanisiga na loloma ni Tamada Vakalomalagi? Vukei ira me ra kila ni dina ga ni yawa sara na matanisiga, e sa rawa ni vukea me da vakila na katakata. E rawa ni da vakila e veigauna na loloma ni Tamada Vakalomalagi, dina ga ni sega ni tiko vata kei keda vakayago. Lagata vata e dua na sere baleta na loloma ni Tamada Vakalomalagi, vaka na “Rogoca Na Sere ni Manumanu” (iVolanisere ni Gonelalai, 16).

E rawa ni ra vukei ira na tani na gone me ra vulica baleta na iVakabula ka vakabauti Koya. Nai Tukuni e Kalili, mai vei Del Parson

Roma 10:17

Sa rawa na vakabauta ena vakarorogo ki na vosa ni Kalou.

Ni ra rogoca na gone na vosa ni Kalou ka vakarogoca vakavinaka, ena tubu nodra vakabauta na Kalou.

iTaviqaravi e Rawa ni Caka

• Wilika na Roma 10:17 vei ira na gone, ka vakaraitaka vei ira nai yaloyalo ni ituvaki eso era rawa kina ni rogoca na vosa ni Kalou (me vaka na vuli ivolanikalou vakamatavuvale, kalasi ena lotu, se koniferedi raraba; raica na tabana ni itaviqaravi ena macawa oqo). Tarogi ira na gone na gauna cava era a rogoca kina na vosa ni Kalou.

• Tukuna na kena italanoa e dua na gone e dau vakarorogo ki na vosa ni Kalou ena sala duidui eso. Ni o tukuna tiko na italanoa, uvuca tiko vakalalai e dua na baluni me vakaraitaka na tubu ni nona vakabauta e dua na gone ni rogoca e veigauna yadua na vosa ni Kalou.

• Me vukei ira na gone me ra kila ni rawa ni tubu nodra vakabauta, vukei ira me ra lagata na “Vakabauta” (iVolanisere ni Gonelalai, 50). Ni ra lagata tiko, kerei ira me ra vaka na sorenitei ena nodra lolou sobu. Ena veigauna era lagata kina na vosa vakabauta, me ra talave cake vakalailai me vaka e dua na itei sa tubu tiko.

• Vunitaka ena rumunivuli e dua na ivolanikalou, dua na kena itaba na Peresitedi ni Lotu, kei na dua na ilavelave ni mekesini na iTokani. Kerei ira na gone me ra vaqara na veika oqo ka wasea na sala e rawa kina ni da rogoca na vosa ni Kalou mai na veika oqo.

Roma 16:1–4

Au rawa ni vakavinavinakataki ira ka vukei au.

O Paula a vakavinavinakataki ira na tamata ka vukei koya. O rawa ni vukei ira na gone me ra raica na veika vinaka era dau cakava na tani ena vukudra ka nanuma me ra vakavinavinakataki ira.

iTaviqaravi e Rawa ni Caka

• Vakamacalataka ni a vakavinavinakataka o Paula na veivuke a ciqoma mai vua na marama o Fipi kei rau na veiwatini o Pirisila kei Akuila (raica na Roma 16:1–4). Kerei ira na gone me ra droinitaka nai yaloyalo kei Paula kei iratou na lewe tolu oqo ni o wilika na veitikina oqo.

• Sureti ira yadua na gone me ra wasea e dua na ka vinaka a cakava vua e dua wale tikoga qo. Vukei ira na gone me ra cakava na kadi ni vakavinavinaka me baleti ira na tamata oqori.

• Vukei ira na gone me ra vulica ni cavuta na vakavinavinaka ena vosa duidui eso. E rawa ni veivuke na sere “Ni Sa Mai Cava E Dua Na Siga” (iVolanisere ni Gonelalai, 4).

Vakavulica na iVunau: Gone Qase Cake

Roma 8:16-18

Sa vinakata na Tamada Vakalomalagi meu vakavakarau ni ciqoma na veika kece e tu Vua.

Ena ituvatuva ni Tamada Vakalomalagi sa rawa ni yaco meda vakataki Koya ka taukena na veika kece e tu Vua. Na dina oqo e rawa ni uqeti ira na gone o vakavulica me ra bulataka ena yalodina na kosipeli.

iTaviqaravi e Rawa ni Caka

• Wilika vata na Roma 8:16–18. Na cava eda vulica mai na veitikina oqo me baleta o cei o keda kei o cei eda rawa ni vakataka? Vakamacalataka o “ko nona na ivotavota” sai koya ka taukena, se ciqoma, na ka e tu vei rau na nona itubutubu. Vola ena papa ni volavola Na cava eda gadreva me da cakava me noda ivotavota kina na veika kece e tu vei Tamada mai Lomalagi? Lagata vata e dua na sere me baleta na talairawarawa, me vaka na “Meu Muria na Nona Lewa” (iVolanisere ni Gonelalai, 86), ka vaqara na kena isau. Na isau cava tale era rawa ni vakasamataka na gone?

• Kerei ira na gone me ra vakasamataka e dua na tui ka vinakata na luvena tagane kei na yalewa me ra na liutaka na nona matanitu ena dua na siga. Vakamacalataka ni Tamada Vakalomalagi sa vaka e dua na tui, ka sai keda na Luvena tagane kei na yalewa vakatui. O rawa ni wasea na italanoa ni luvena tagane na Tui o Louis XVI ni Varanise, ena vosa nei Sisita Elaine S. Dalton “Nanuma o Cei o Iko!” (Liaona, Me 2010, 121). Cava na vuna e bibi kina me da nanuma ni da sa luvena na Tamada Vakalomalagi ka sucu mai me da na vakataki Koya ena dua na siga? E vakayaco-ka vakacava na dina oqo ki na digidigi eda vakayacora e vuravura?

Roma 10:17

Sa rawa na vakabauta ena vakarorogo ki na vosa ni Kalou.

E levu tu na nodra madigi na gone me ra rogoca na vosa ni Kalou. Vukei ira ni raica na sala e rawa ni vaqaqacotaka kina nodra vakabauta na rogoci ni vosa ni Kalou.

iTaviqaravi e Rawa ni Caka

• Vola na yatuvosa oqo ena papa ni volavola: ni sa rawa , kei na ena i . Kerei ira na gone me ra vakalewena na vanualala ni ra wilika oti na Roma 10:17. Wasea na gauna a vakavulica kina e dua na dina ni kosipeli ka vukea me vaqaqacotaka nomu vakabauta—o na rairai wasea beka e dua na ivolanikalou taleitaki se vosacavuti mai na koniferedi raraba. Sureti ira na gone mera wasea na veika era dui sotava.

• Solia ki na dua na gone nai yaloyalo ni iVakabula ni vakabula tiko e dua ka tukuna vua me kakua ni vakatara me ra raica na vo ni gone nai yaloyalo. Kerea na gone oqori me tukuna eso na ka e rawa ni vukei ira na vo ni gone me ra kila na ka e tiko enai yaloyalo. Eda na vukei ira vakacava na tani me ra vulica baleta na iVakabula me rawa ni ra vakabauti Koya?

Roma 14:10, 13

“Me da qai kakua … ni dauveivakalewai.”

Ni ra veimaliwai na gone kei ira tale eso ka duidui na ka era dau digitaka mai vei ira, e rawa ni ra temaki me ra vakalelewa. Vakasamataka na sala e rawa ni vukei ira kina na ivakasala i Paula vei ira mai Roma me ra kakua ni dau vakalelewa.

iTaviqaravi e Rawa ni Caka

• Sureta e dua na gone me wilika na Roma 14:10, 13. Tarogi ira na gone me ra wilika se a vakayagataka vakavica o Paula na vosa vakalewa. Na cava na kena ibalebale me da vakalewa e dua? Cava na vuna me da kakua ni vakalewai ira kina na tani?

• Vakaraitaka na kena i yaloyalo e dua, ka tarogi ira na gone na cava eda kila me baleta na tamata oqo ena kena raici ga nai yaloyalo. Na cava eso na ka eda sega ni kila me baleti koya? Cava na vuna e vinaka duadua ga kina na Turaga me lewa na tamata oqo? (raica na 1 Samuela 16:7).

Vakauqeta na Vuli e Vale

Kerei ira na gone me ra digitaka e dua na itaviqaravi ko ni cakava vakalasi me ra laki cakava vata nodra matavuvale. Tukuna vei ira ena macawa mai oqo sa rawa ni ra wasea na ka era a cakava.

Vakatorocaketaki Noda Veivakavulici

Solia vei ira na gone na madigi me ra toso. Sa dau dredre wasoma me ra dabe vakamalua toka na gone me dua na gauna balavu. Sureti ira na gone vagauna me ra tucake me tiki ni kalasi se dabe ena fuloa ka sega ena nodra idabedabe.