O Paula ena valeniveivesu

31 ni Julai–6 ni Okosita

Cakacaka 22–28

“Me iTalatala kei na Dautukutuku Talega”

Ni o wilika na italanoa ni nona veiqaravi na iApositolo o Paula ena Cakacaka 22–28, vaqara na ivakavuvuli ena vakaibalebale vei ira na gone o vakavulica.

ivakatakilakila ni veiwasei

Sureta na Veiwasei

Vakaraitaka na iyaloyalo eso e rawa ni vakananuma vei ira na gone na italanoa mai na Cakacaka 22–28, me vaka e dua na lokamu ni valeniveivesu, dua na waqa, kei na dua na gata. Sureti ira na gone me ra wasea e dua ga na italanoa era kila me baleti Paula ka salavata kei na iyaloyalo eso oqo.

ivakatakilakila ni veivakavulici

Vakavulica na iVunau: Gone Sobu

Cakacaka 23:10–11

O Tamada Vakalomalagi kei Jisu Karisito erau kauwaitaki au ka rau na vukei au ena gauna dredre eso.

Na vulici ni ivakarau a vukei Paula kina na iVakabula sa rawa ni tara cake nodra vakabauta na gone ni rau kauwaitaki ira tu na Tamada Vakalomalagi kei Jisu.

iTaviqaravi e Rawa ni Caka

• Wasea na italanoa ena Cakacaka 23:10–11 ni nona sikovi Paula e valeniveivesu na iVakabula. Se vakaraitaka na vidio “Be of Good Cheer” (ChurchofJesusChrist.org), ka vakatayaloyalotaka na italanoa oqo. Wasea e dua na gauna o a vakatovolei kina ka qai tuberi iko ka vakacegui iko na Kalou. Kerei ira na gone me ra wasea na gauna era a vakila kina na veivakacegui ni Kalou.

• Vukei ira na gone me ra cavuqaqataka na ka a tukuna o Jisu vei Paula: “Mo vakacegu ga.” Kerei ira na gone me ra vakasamataka e dua e rawa ni ra sureta me vakacegu ga—e dua beka e yalorarawa se lomaleqa tu.

• Lagata vata kei ira na gone e dua na sere baleta na marau, me vaka na “Dredre Sara Mai” (iVolanisere ni Gonelalai, 128).

e vosa tiko na goneyalewa ena i tutu ni vunau ena lotu vata kei na marama e dakuna

Me vakataki Paula, e rawa ni da digitaka me da wasea na noda ivakadinadina me baleta na iVakabula.

Cakacaka 26:1–29

E rawa ni’u wasea noqu ivakadinadina vei ira na tani.

Na railesuvi ni ivakadinadina nei Paula vei Tui Akaripa e rawa ni vukea nodra vulica na gone na ivakarau me ra wasea kina na veika era kila ni dina.

iTaviqaravi e Rawa ni Caka

• Kauta mai e dua na isala ni tui pepa ki na kalasi me dara e dua na gone ka raitayaloyalotaka na Tui o Akaripa. Sureta e dua tale na gone me tu e matana na tui me matataki Paula ni o vakalekalekataka na ivakadinadina nei Paula kei na nona sauma mai o Tui Akaripa, e kune ena Cakacaka 26:1–29 (raica na “Wase e 63: Vakaotia o Paula na nona Kaulotu,” e Na iTalanoa ena Veiyalayalati Vou, 162–66, se na kena vidio ena ChurchofJesusChrist.org). Vakamacalataka ni rawa ni da wasea na noda ivakadinadina kei ira na tani, me vaka e vakayacora o Paula.

• Kerei ira na gone me ra vakarorogo ni o lagata se wilika e dua na sere me baleta na ivakadinadina, me vaka na “Sa Bula Na Kalou” (iVolanisere ni Gonelalai, 8). Sureti ira na gone me ra laveta na ligadra ni ra rogoca e dua na ka era kila ni dina. O na gadreva beka mo lagata vakavica na sere; sureti ira na gone me ra tomani iko mai ni ra sa tekivu me kila mai na qaqana. Vukei ira me ra vakatovotovotaka na wasei ni nodra ivakadinadina me baleta na veika era kila ni dina.

• Vakayagataka na tabana ni itaviqaravi ena macawa oqo me vukei ira na gone me ra vakasamataka e dua na ka era rawa ni kaya ni ra wasea na nodra ivakadinadina (raica na Yavu ni Vakabauta me baleta eso tale na vakasama). Sureti ira me ra wasea nodra ivakadinadina vua e dua ena nodra matavuvale.

Cakacaka 27

Era vakasalataki au na parofita me baleta na veika rerevaki.

Vakasamataka na ivakarau e rawa ni vakavulici ira kina na gone na italanoa ni voca ni waqa nei Paula ni ra dau raica na parofita na veika dredre eda sega ni raica rawa.

iTaviqaravi e Rawa ni Caka

• Sureti ira na gone me ra raitayaloyalotaka ni ra tiko ena dua na waqa sa voca tu ena cava. Wilika na ivakaro nei Paula vei ira na tamata, e kune ena Cakacaka 27:9–10, ka wasea na italanoa ni voca ni waqa a yaco baleta ni ra a sega ni rogoca na nona ivakaro (raica na Cakacaka 27:11, 39–44). Vakaraitaka e dua na iyaloyalo ni Peresitedi ni Lotu, ka wasea na nomu ivakadinadina ni rawa ni vakaroti keda o koya ena veika rerevaki vakayalo.

• Biuta e vica na iyaloyalo se iyaya wavokita na rumu me matataka na veika era sa vakavulica vei keda na parofita me da cakava me da vakataki Jisu cake kina, me vaka na lomani ira na tani se me da papitaiso. Lako wavoki vakalasi ena rumu, ka tu vakadua ena iyaloyalo se iyaya yadua mo veivosakitaka na ivakarau eda na taqomaki kina ni da muria na nodra ivakavuvuli na parofita.

ivakatakilakila ni veivakavulici

Vakavulica na iVunau: Gone Qase Cake

Cakacaka 23:10–11; 27:18–25; 28:1–6

Ni’u sotava na veika dredre, e sega ni dau laivi au na Kalou.

Ena veivakatovolei kece a sotava o Paula, a tiko vata kei koya na Turaga. O na vukei ira vakacava na gone me ra vakatauvatana na veika e sotava o Paula ki na nodra dui bula?

iTaviqaravi e Rawa ni Caka

• Vakayagataka na Cakacaka 23:10, mo vakamacalataka kina ni a biu ki valeniveivesu o Paula baleta ni a vakavuvulitaki Jisu vei ira na tamata. Qai wilika na Cakacaka 23:11 vata kei ira na gone. Se vakaraitaka na vidio “Be of Good Cheer” (ChurchofJesusChrist.org), ka vakatayaloyalotaka na italanoa oqo. Cava na vuna me “vakacegu ga” kina o Paula dina ga ni a curu tu i valeniveivesu?

• Vola ena papa Cakacaka 23:10–11; Cakacaka 27:18–25; kei na Cakacaka 28:1–6. Vakaraitaka na iyaloyalo ni dua na valeniveivesu, dua na waqa, kei na dua na gata, ka sureti ira na gone me ra railesuva na veitikina oqo ka vakasotara vata kei na iyaloyalo yadua. Ena italanoa yadua oqo, a vakaraitaka vakacava na Turaga vei Paula ni sa tiko vata kei koya? Wasea e dua na gauna a tiko kina kei iko na Turaga ena dua na gauna dredre ka vaqaqacotaka vakacava na nomu ivakadinadina baleti Koya. Vakayaloqaqataki ira na gone me ra wasea talega na veika era sotava.

Cakacaka 26

Au rawa ni wasea vakadoudou na noqu ivakadinadina kei Jisu Karisito.

Na yaloqaqa nei Paula ena wasei ni nona ivakadinadina sa rawa ni vukei ira na gone me ra doudou ni wasea na nodra ivakadinadina.

iTaviqaravi e Rawa ni Caka

• Digitaka na veitikina mai na Cakacaka 26 mo wilika vata kei ira na gone me vukei ira me ra kila na veika a tukuna o Paula vei Tui Akaripa me baleta na veika a sotava (me vaka na tikina e 9–16) kei na veika a vakavulica me baleti Jisu Karisito (me vaka na tikina e 18, 23). Sa rawa talega mo vakaraitaka e dua na tiki ni vidio “Paul: A Chosen Vessel” (ChurchofJesusChrist.org). Cava beka na vuna ena rairai rerevaki kina me wasea o Paula na veika oqo vua na tui? Sureti ira na gone me ra vola eso na ivakavuvuli ni kosipeli era kila ni dina. Kerei ira me ra vakasamataka e dua era kila e gadreva tu me rogoca na nodra ivakadinadina ni veidina oqo.

• Sureti ira na gone me ra vakayagataka na tabana ni itaviqaravi ena macawa oqo me ra vola e dua na ka era na rairai tukuna ni ra wasea nodra ivakadinadina.

Cakacaka 27

Era vakasalataki au na parofita me baleta na veika rerevaki.

E rawa ni ra vakarorogo na gone ki na nodra itukutuku na parofita ni gauna oqo ka kila na nodra ivakaro. O na vukei ira vakacava na gone ni vulica na ivakarau me ra muria kina na ivakaro eso oya?

iTaviqaravi e Rawa ni Caka

• Kotiva e dua na tikinipepa vaka na ibulibuli ni dua na waqa ki na tikina lalai eso me vakasotari vata. Sureti ira na gone me ra vola na ivakaro eso nei Paula ena Cakacaka 27:9–11 ena tikina lalai eso ka vakasotara vata. Na cava era a sega ni vakarorogo kina vei Paula na tamata? (raica na tikina e 11). Sureti ira na gone me ra wilika na tikina 18–20 kei na 40–44 me ra kila se cava a qai yaco kina. (Vakamacalataka baleta ni ra a qai muria na ivakasala emuri nei Paula na tamata me ra tikoga ena waqa, a sega ni dua e mate ena voca ni waqa; raica na tikina e 30–32.) Na cava eda rawa ni vulica mai na ka a yaco oqo me baleta na vakamuri ni parofita?

• Kauta mai e dua na itukutuku ni koniferedi wale ga oqo ni Peresitedi ni Lotu ka wasea vei ira na gone na ivakaro se ivakasala cava ga a solia kina o koya. Sureti ira na gone me ra vakasamataka na sala eso era rawa ni muria kina na parofita.

• Vakaraitaka na vidio “Blessed and Happy Are Those Who Keep the Commandments of God” (ChurchofJesusChrist.org). Era tautauvata vakacava na parofita kei na tamata e taura tu na ivakadodorairai?

ivakatakilakila ni vuli

Vakauqeta na Vuli e Vale

Kerei ira na gone me ra vakayagataka na ka era sa vulica me baleti Paula ni vakauqeti ira kina na nodra matavuvale me ra vulica na itukutuku ni parofita wale ga oqo ka veivosakitaka na ivakarau e rawa ni ra muria kina na nona ivakasala.

Vakatorocaketaki Noda Veivakavulici

Okata na wakilakila. “E levu na gone (kei na qase) e vinaka duadua nodra vuli ni vakayagataki e vica na wakilakila. Vakasaqara na sala me ra vukei kina na gone me ra vakayagataka nodra wakilakila ni rai, rorogo, kei na vakila ni ra vuli. Ena so na gauna, ena rawa sara ni o kunea na sala me vakayagataki kina nodra wakilakila ni vaboboi kei na ikanakana!” (Veivakavulici ena iVakarau ni iVakabula,, 25).

tabana ni itaviqaravi: Au rawa ni wasea vakadoudou na noqu ivakadinadina baleti Jisu Karisito