Korinica ena gauna eliu

Korinica, Ceva kei Kirisi, na Vale Levu ni Veivakasoqoni,, droini mai vei Balage Balogh/www.ArchaeologyIllustrated.com

21–27 ni Okosita

1 Korinica 1–7

“Mo Dou Veivinakati Sara”

Ena vukei iko na Yalo Tabu mo kila na ivakavuvuli cava ni kosipeli ena 1 Korinica 1–7 ena vukei ira na gone o vakavulica. Ni o wilika ena masumasu na veiwase oqo, vola na vakasama kei na nanuma eso e vakavotuya vei iko na Yalotabu.

ivakatakilakila ni veiwasei

Sureta na Veiwasei

Taroga na gone ke ra a wasea ki na nodra matavuvale e dua na ka era sa vulica ena Lalai ena macawa sa oti. (O na rairai gadreva mo railesuva vakalekaleka na lesoni ni macawa sa oti.) Ke vakakina, na cava era a wasea?

vakatakilakila ni veivakavulici

Vakavulica na iVunau: Gone Sobu

1 Korinica 2:11–14

Na Yalo Tabu sa vakatavulica vei au na dina ni kosipeli.

Dua na itavi ni Yalo Tabu oya me vakatavulica vei keda na dina. Na cava so e sotavi o rawa ni wasea vei ira na gone me vukei ira ni kila matua na ka oqo?

iTaviqaravi e Rawa ni Caka

• Vakaraitaka na yaya se yaloyalo eso e matataka na sala eda vulica kina na vuravura (vaka e dua na koronivuli, ivola, se talevoni veikauyaki). Na cava eda rawa ni vulica ni da vakayagataka na veika oqo? Vakamacalataka ena 1 Korinica 2:11, 14, a vakavulica o Paula ni da rawa ni vulica na Kalou mai na Yalo duadua ga ni Kalou, sai koya na Yalo Tabu. Na cava eda rawa ni cakava me da vulica kina “na veika ni Kalou”?

• Sau na ligamu ni o cavuta na vosa yadua ena yatuvosa “Na Yalo Tabu sa vakavulica vei keda na ka dina.” Kerea na gone me ra vakasausau ka tokaruataka na malanivosa. Wasea vei ira na gone na gauna a vukei iko kina na Yalo Tabu mo kila ni dina e dua na ka.

• Lagata vata e dua na sere ni Yalo Tabu, vaka na “The Holy Ghost” (Children’s Songbook, 105). Vukea me ra raica na gone na vosa kei na malanivosa eso ena sere e vakavulica na sala e dau vosa kina vei keda na Yalo Tabu kei na ka e vakavulica vei keda o Koya.

1 Korinica 3:10–11

Sa noqu yavu o Jisu Karisito.

Era sa tutaka tiko na gone e dua na yavu ni nodra vakadinadina, ka rawa ni o vukei ira ni tara e dua na yavu dei vei Jisu Karisito.

iTaviqaravi e Rawa ni Caka

• Wilika na 1 Korinica 3:11 vei ira na gone, ka vakamacalataka ni sa noda yavu o Jisu Karisito. Vakaraitaka vei ira na gone e vica na yaloyalo ni ka eso eda rawa ni vakadinadinataka tu, oka kina na yaloyalo i Jisu Karisito. Vukei ira ni tuva na yaloyalo ka me na tiko e botona na yaloyalo i Jisu, vaka e dua na yavu, ka ra “tara” na vo ni yaloyalo e dua na vakadinadina me baleti Koya.

• Matanataka na ka eso ena sere “Tara Vale” (Volanisere ni Gonelalai, 132) ka lagasere vata kei ira na gone. Solia ki na gone yadua e dua na vatu ka volai tu kina “sa noqu yavu o Jisu Karisito.” Me ra qai kauta na vatu ki vale me vakananumi ira ena ka era sa vulica.

• Wasea na yaloyalo eso e vakatakila na nomu italanoa taleitaki ni bula ni iVakabula, ka kerea na gone me ra tukuna vei iko na ka era yaco tiko ena yaloyalo. Me ra qai wasea eso na nodra italanoa taleitaki i Jisu. Wasea na nomu vakadinadina ni sa yavu ni nomu vakabauta o Jisu Karisito.

1 Korinica 6:19

Na yagoqu sa vaka na valetabu.

O na vukea vakacava na gone me ra taleitaka na yagodra me isolisoli mai vua na Kalou ka gadreva vakalevu sara ni qarauna tu?

iTaviqaravi e Rawa ni Caka

• Vakaraitaka vei ira na gone na yaloyalo ni valetabu eso (raica na ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale), ka wilika na vosa oqo mai na 1 Korinica 6:19: “Sa vale ni Yalo Tabu na yagomudou.” Vukea na gone me ra kila matua ni sa vinakata na Tamada Vakalomalagi me da maroroya na savasava ni yagoda ka vakatabuya, me vaka na valetabu.

• Vakaraitaka na yaloyalo ni dua na gone, ka biuta wavolita na yaloyalo ni ka eso e vinaka ki na yagoda kei na ka eso e ca. Sureta na gone me ra veivukevuke ni vakatakila na ka vinaka ka biuta tani na ka ca.

• Lagata vata e dua na sere ni yago, vaka na “Veitiki ni Yagoqu” (iVolanisere ni Gonelalai, 129), ka tarogi ira na gone na vuna era vakavinavinakataka kina na yagodra.

vakatakilakila ni veivakavulici

Vakavulica na Vunau: Gone Qase Cake

1 Korinica 1:23–25

Na yalomatua sa ikoya na vakararavi ki na vuku ni Kalou.

Era na raica na gone o vakavulica—ke ra se bera ni raica tu—ni so na tamata e vakavuvulitaka na ka era veisaqasaqa kei na vuku ni Kalou. Na vulici ni 1 Korinica 1:23–25 e rawa ni vukei ira na gone ni kila matua na noda rawa ni vakararavi tu ki na vuku ni Kalou baleta ni sa levu cake mai na noda.

iTaviqaravi e Rawa ni Caka

• Kerea na gone me ra wilika na 1 Korinica 1:23–25 ka vakaraica na vosa vuku kei na lialia. Vakamacalataka ni ra nanuma tu e vuqa na tamata ni sa ka lialia na vakavuvuli i Paula, ia a vakamacalataka o Paula ni sa vuku dina na vakabauti ni kosipeli i Karisito. Cava na vuna e sa vu ni vuku kina na vakabauti ni ka e vakavuvulitaka na Kalou?

• Vukea na gone me ra matanataka na sala era rawa ni sausaumi kina vei ira na tamata ka nanuma ni sa ka “lialia” na ivunau ni Kalou—vaka na ivunau ni vakabauta na iVakabula, muria na Vosa ni Vuku, se talairawarawa ki na lawa ni katini. Me ivakaraitaki, era rawa ni vakadinadinataka na veivakalougatataki e basika ena bulataki ni vakavuvuli eso oqo.

• Wasea na gauna era a nanuma kina eso ni sa ka lialia na nomu vakabauta, se wasea e dua na ivakaraitaki mai na ivolanikalou. Me ra qai wasea na gone eso na ka vata oya. E rawa ni vukei keda vakacava na 1 Korinica 1:25 me da yalodina tikoga ni ra kaya eso sa ka lialia na noda vakabauta?

1 Korinica 2:11–14

Na Yalo Tabu sa vakatavulica vei au na dina ni kosipeli.

O na vukea vakacava na gone me ra vakila ni sa gadrevi tu na Yalo Tabu me ra kila matua kina “na veika ni Kalou”?

iTaviqaravi e Rawa ni Caka

• Kerea na gone me ra cakava na lisi ni sala eso eda vulica tu kina na vuravura—me ivakaraitaki, ivola eso, koronivuli, kei na initaneti. Qai wilika vata na 1 Korinica 2:11–14. Na cava era vakavuvulitaka na tikina oqo ena sala eda vulica kina “na veika ni Kalou”?

• Tukuna na gauna o a vulica kina e dua na ka ena Yalo ni Kalou. Vukea na gone me ra vakatakila na gauna eso era a vakila kina na Yalotabu. Na cava “na veika ni Kalou” (1 Korinica 2:11) e sa vukei keda kina na Yalotabu ni kila matua tu?

• Sureta na gone yadua me wilika e dua vei ira na ivolanikalou oqo: 1 Korinica 2:11–14; 1 Nifai 10:17; Moronai 10:3–5; kei na Vunau kei na Veiyalayalati 8:2–3. Kerea na gone me ra wasea na ka era sa vulica mai na ivolanikalou oqo ena sala e vakavulici keda kina na Yalo Tabu. Cava na vuna eda vakavinavinakataka kina na isolisoli ni Yalo Tabu?

1 Korinica 6:19–20

Sa dodonu meu doka na yagoqu ka vakasavasavataka tu.

Na kilai matua ni sa isolisoli mai vua na Tamada Vakalomalagi na yagoda ena vukea na gone me ra vakatabuya na yagodra, ena gauna mada ga era sa temaki tu kina.

iTaviqaravi e Rawa ni Caka

• Kauta mai na itawatawa ka tiko iloma na yaloyalo ni dua na gone kei na valetabu. Sureta na gone me ra wilika na 1 Korinica 6:19–20 ka vakilakila na ka e tiko ena itawatawa. Me ra qai dolava ka veivosakitaka na sala e sa vaka tu kina na valetabu na yagoda.

• Veitalanoa kei ira na gone ena sala e dodonu me da doka kina na valetabu. Ke sa vaka tu na valetabu na yagoda, me da na doka tu vakacava na yagoda? Na lagati se wiliki ni qaqa ni dua na sere ni valetabu, vaka na “Ko Ni Solia Mai vei Au Nomuni Vale” (iVolanisere ni Gonelalai, 73), sa rawa ni vukea na saumi ni taro oqo. Ni da caka cala, e rawa vakacava ni da vakasavasavataka tale na noda “valetabu”?

• Wilika vata “Sa Ka Tabu na Yagomu” (ena Me iSakisaki ni iTabagone [idusidusi, 2022], 22–29). Sureta na gone me ra vola ena papa ni volavola na vakasala era raica baleta na sala me da qarauna kina na yagoda.

vakatakilakila ni vuli

Vakauqeta na Vuli e Vale

Sureta na gone me ra wasea ki na nodra matavuvale e dua na sere era a lagata ena kalasi kei na ka era sa vulica mai kina.

Vakatorocaketaki Noda Veivakavulici

Vakadinadinataki Jisu Karisito Dua na ka bibi duadua o rawa ni cakava vaqasenivuli oya mo vakadinadinataki Jisu Karisito. Oqo na vukea na vaqaqacotaki ni nodra vakadinadina na gone ka vakila na loloma ni iVakabula vei ira.

tabana ni taviqaravi: na yagoqu sa vaka na valetabu