soqoni ni sakaramede

28 ni Okosita–3 ni Sepiteba

1 Korinica 8–13

“Koi Kemudou na Yago i Karisito”

Ni o wilika na 1 Korinica 8–13, vakarogoca na veivakauqeti ni Yalo me baleta na ivakarau ni kena vakavulici na ivakavuvuli ena veiwase oqo. Nanuma tiko ni vakasama cava ga ni itaviqaravi e rawa ni moici me sotavi ira ruarua na gone qase cake kei ira na gone sobu.

ivakatakilakila ni veiwasei

Sureta na Veiwasei

Sureti ira na gone me ra wasea e dua na ka era a cakava ena soqoni ni sakaramede me ra vakasamataki Jisu.

ivakatakilakila ni veivakavulici

Vakavulica na iVunau: Gone Sobu

1 Korinica 10:13

Ena vukei au na Tamada Vakalomalagi meu digidigi dodonu.

E sega ni dau rawarawa na digitaka na dodonu, ka sa kila tu oqori na Tamada Vakalomalagi. Ni da kerea, ena vukei keda o Koya baleta ni vinakata o Koya meda rawa-ka.

iTaviqaravi e Rawa ni Caka

• Wilika na 1 Korinica 10:13 vei ira na gone, ka sureti ira me ra kurea na uludra ni ra rogoca na vosa “vere” se “veretaki.” Vakamacalataka na ibalebale ni tikina oqo vei iko.

• Talanoataki ira vakalekaleka eso na tamata sa voleka tu me ra digidigi cala. Ni ra vakarorogo na gone, sureti ira me ra lave liga se taura cake e dua na ivakatakilakila ni tu vakadua ni digidigi cala na tamata e talanoataki tiko. Na cava beka na digidigi dodonu? Vakadinadinataka ni na vukei keda na Tamada Vakalomalagi me da digitaka na dodonu.

• Vakaraitaka e dua na iyaloyalo kei Jisu, ka lagata vata kei ira na gone e dua na sere baleti Koya, me vaka na “Meu Na Muri Jisu Tu” (iVolanisere ni Gonelalai, 40). Veivosakitaka na sala e dau vukei iko kina na nomu nanumi Jisu mo digidigi vinaka. Vakaraitaka na iyaloyalo ni veika tale eso e dau vukei keda me da digidigi donu, me vaka na itubutubu se ivolanikalou. Tarogi ira na gone na cava e dau vukei ira me ra digidigi donu.

1 Korinica 12:4, 7–12

Sa vakalougatataki au na Tamada Vakalomalagi ena veisolisoli vakayalo eso.

Sa solia vei ira kecega na luvena na Tamada Vakalomalagi na veisolisoli vakayalo. Na isolisoli vakayalo cava soti o sa raica vei ira na gone o vakavulica?

iTaviqaravi e Rawa ni Caka

• Kerei ira na gone me ra droinitaka na iyaloyalo ni dua na isolisoli taleitaki era sa ciqoma. Vakamacalataka ni solia vei keda na Tamada Vakalomalagi na isolisoli vakayalo me vaqaqacotaka noda vakabauta ka vukei keda me da vakalougatataki ira tale eso. Wasea kei ira na gone eso na isolisoli vakayalo e vakamacalataki ena 1 Korinica 12:7–11.

• Vola e dua na itukutuku me baleta na gone yadua, ka vakamacalataka e dua na isolisoli vakayalo o sa raica vua (se e rawa ni o sureti ira na itubutubu me ra vola na itukutuku oqo). Biuta na itukutuku oqori ena waqanivola eso. Solia me ra cereka na gone na waqanivola, ka vukei ira me ra wilika na nodra isolisoli vakayalo.

kato ni isolisoli eso

Sa solia vei ira kecega na luvena na Tamada Vakalomalagi na veisolisoli vakayalo.

1 Korinica 13

Au rawa ni lomani ira na tani.

Era vakavuvulitaka na ivolanikalou ni loloma uasivi sa ikoya na “loloma taucoko i Karisito” (Moronai 7:47). O na vukei ira vakacava na gone me ra tara cake ka vakaraitaka na loloma va-Karisito?

iTaviqaravi e Rawa ni Caka

• Wilika na 1 Korinica 13:13 kei na Moronai 7:47, ka vukei ira na gone me ra tukuna tale na malanivosa “Na loloma uasivi sa ikoya na loloma taucoko i Karisito.” Vakaraitaka na iyaloyalo kei Jisu ni dauloloma ka yalovinaka, ka tarogi ira na gone se vakaraitaka vakacava o Koya na loloma vei ira na tani (raica na iVola ni iYaloyalo Vakosipeli me baleta na vakasama eso).

• Lagata e dua na sere me baleta na lomani ira na tani, me vaka na “Dauloloma ko Jisu” se na “Dou Veilomani” (ivolanisere ni Gonelalai, 39, 74), vata kei ira na gone. Vakaraitaka na kedra iyaloyalo eso na tamata duidui (me vaka e dua na itubutubu, gone, qasenivuli, se itokani), ka kerei ira na gone me ra wasea na sala e rawa ni ra qarava kina na tamata oya. Sureti ira na gone me ra vakasamataka e dua e rawa ni ra vukea ka vola e dua na ivola se droinitaka e dua na iyaloyalo me soli vua na tamata oya. Kevaka era gadreva eso tale na vakasama me baleta na veiqaravi, vakaraitaka na vidio “Pass It On” (ChurchofJesusChrist.org).

ivakatakilakila ni veivakavulici

Vakavulica na iVunau: Gone Qase Cake

1 Korinica 10:13

Ena vukei au na Tamada Vakalomalagi meu vorata na veitemaki.

Na yalayala ena tikina oqo e rawa ni solia vei ira na gone na yalodei ni rawa ni ra vorata na veitemaki ena veivuke ni Tamada Vakalomalagi.

iTaviqaravi e Rawa ni Caka

• Sureti ira na gone mera wilika lewe yarua na 1 Koronica 10:13 ka mera vakalekalekataka na tikina ena nodra vosa ga. Kerei ira na gone me ra wasea e dua na gauna a vukei ira kina na Tamada Vakalomalagi me ra levea se vorata na veitemaki. Na cava eda rawa ni cakava me da vakararavi kina vua na Tamada Vakalomalagi ni da temaki?

• Vola ena veitikinipepa na veitemaki eso e rawa ni ra sotava na gone nikua. Sureti ira na gone yadua me ra digia e dua na tikinipepa ka wasea na veika sa solia na Tamada Vakalomalagi me vukea noda levea se vorata na veitemaki eso oqo. Me baleta eso na vakasama, wilika vata na Alama 13:28–29.

1 Korinica 11:23–29

Ena gauna ni sakaramede, au rawa ni vakasamataka na ivakarau au sa muria tiko kina na iVakabula.

Vukei ira na gone o vakavulica me ra raica ni sakaramede e sa madigi me ra “dikevi” ira vakai ira ka vakavouya na nodra veiyalayalati ni papitaiso me ra qarava na Turaga ka muria na Nona ivakaro (1 Korinica 11:28).

iTaviqaravi e Rawa ni Caka

• Kerea e dua na gone me wilika na 1 Korinica 11:28. Na cava na kena ibalebale me da “dikevi” keda vakai keda ni se bera ni da taura na sakaramede? Kerei ira na gone me ra vakasamataki ira mada eso tale na tamata era dau vakadidike, me vakataki ira na vuniwai, ovisa vakalecaleca, se dauvakadidike vakasainitisi (kena ivakaraitaki, na vuniwai e dikeva na yagoda me raica me da bulabula vinaka). Ni da vakaivotavota ena sakaramede, na cava e rawa ni da cakava me da dikeva na ivakarau eda bulataka tiko kina na noda veiyalayalati ni papitaiso?

• Kerei ira na gone me ra lisitaka na veika e rawa ni ra vakasamataka ni ra vakayagataka na sakaramede. Sureti ira me ra vakayagataka nodra lisi me vakananumi ira me ra dau dikevi ira ena gauna ni sakaramede.

1 Korinica 12:4, 7–12, 31; 13:1–8

E tu vei au na isolisoli vakayalo eso.

E vakavuvulitaka o Paula ni isolisoli ni yalo e “soli vei ira na tamata yadua” (1 Korinica 12:7). Na ivakavuvuli oqo e rawa ni vukei ira na gone me ra tara cake na kedra yaga yadua, vakauasivi ni ra vakayagataka nodra isolisoli me ra vakalougatataki ira kina na tani.

iTaviqaravi e Rawa ni Caka

• Kerei ira na gone me ra vola ena papa na isolisoli vakayalo eso era kunea ena 1 Korinica 12:7–11; 13:2. Sureti ira me ra vaqara na ikuri ni isolisoli e cavuti ena Moronai 10:8–18 kei na Vunau kei na Veiyalayalati 46:13–26. Wasea vata kei ira eso na ikuri ni isolisoli vakayalo a cavuta o Elder Marvin J. Ashton: “Na isolisoli ni vakatataro; na isolisoli ni vakarorogo; … na isolisoli ni goletani mai na veiqati; … na isolisoli ni vaqara na veika ni buladodonu; na isolisoli ni sega ni vakalelewa; na isolisoli ni rai vua na Kalou me dusimaki; … na isolisoli ni kauwaitaki ira na tani; … na isolisoli ni vakacabo masu; na isolisoli ni wasea na ivakadinadina qaqa” (“There Are Many Gifts,” Ensign, Nove. 1987, 20). Sureti ira na gone me ra tukuna baleta na isolisoli vakayalo era raica vei ira vakayadua.

• Ni se bera na kalasi, taroga vei ira na itubutubu me baleta na isolisoli era raica rawa vei ira na luvedra, se vakasamataka ga o iko na nodra isolisoli. Tukuna vei ira na gone me baleta na isolisoli eso oqo. Sureti ira na gone me ra vola e dua na sala era na vakayagataka kina nodra isolisoli me ra vakalougatataka kina e dua ena macawa oqo.

• Wasea na veituvaki duidui ena rawa kina vei ira na tamata me ra vakayagataka e dua na isolisoli vakayalo mai na 1 Korinica 12:7–10. Sureti ira na gone me ra vakatakila na isolisoli vakayalo e rawa ni vakayagataki ena ituvaki yadua.

ivakatakilakila ni vuli

Vakauqeta na Vuli e Vale

Vakatura mera veivosakitaka na gone e dua na ka o a veivosakitaka ena kalasi kei na nodra matavuvale. Me vaka oqo, sureti ira na gone me ra wasea na nodra isolisoli vakayalo ki na nodra matavuvale ka taroga vei ira na lewe ni matavuvale se cava na nodra isolisoli.

Vakatorocaketaki Noda Veivakavulici

Vakatetea na veisureti e rokova na galala ni digidigi. Ni o sureti ira na gone me ra matanataka na veika era vulica tiko, vakasamataka na sala eso me rokovi kina na nodra galala. Navuca mo sureti ira mera vakasamataka nodra sala vakataki ira ni cakava na ka era sa vulica, mai na kena dolei na veisureti vakatabakidua eso.

tabana ni itaviqaravi: au rawa ni lomani ira na tani