tobu ni papitaiso ni valetabu

4–10 ni Sepiteba

1 Korinica 14–16

“Sa Sega ni Vu ni Veisei na Kalou, sa Vu ni Vakacegu Ga.”

Ni o wilika na 1 Korinica 14–16, ena vukei iko na Yalo Tabu mo kila na ka mo vakavulica vei ira na gone ena nomu kalasi. Railesuva na ituvatuva oqo me baleta na ikuri ni vakasama eso.

ivakatakilakila ni veiwasei

Sureta na Veiwasei

E rawa ni o tekivuna na lesoni ni macawa qo ena nomu wilika na 1 Korinica 14:26 i cake. Dusimaka ni gauna eda soqoni vata mai kina ena lotu, e rawa ni da veivakatataki cake (se da tara cake ka vukea) eso tale ni da veiwasei. Tarogi ira na gone na cava e rawa ni ra wasea me vakatataki kina e dua ena kalasi nikua.

ivakatakilakila ni veivakavulici

Vakavulica na iVunau: Gone Sobu

1 Korinica 15:12–22

E rawa ni’u bula vata kei Tamada Vakalomalagi ni’u sa mate baleta ni a tucake tale mai na mate o Jisu Karisito.

E rawa ni o vakavulica vakacava vei ira na gone ni sa rawa ni da bula tale baleta ni a tucake tale o Jisu Karisito?

iTaviqaravi e Rawa ni Caka

• Tokaruataka vakavica na malanivosa oqo vata kei ira na gone: “Ena vakabulai kece talega ena vuku i Karisito” (1 Korinica 15:22). Vakaraitaka e dua na iyaloyalo ni iVakabula sa tucaketale (raica na ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale) se vakaraitaka na vidio “Jesus Is Resurrected” (ChurchofJesusChrist.org). Vakamacalataka ni da na mate taucoko ena dua na siga, ia baleta ni a tucake tale o Jisu, eda na bula tale mai ni da sa mate oti.

• Vakaraitaka vei ira na gone e dua na jakete, ka matataka na yagoda. Ni da bula tiko, e tawana tiko na yagoda na yaloda, ka rawa ni veitosoyaki na yagoda (dara na jakete). Ni da sa mate, sa biuta na yagoda na yaloda, sa sega ni rawa ni veitosoyaki na yagoda (luvata na jakete ka biuta ena dua na teveli me vaka e dua na yago sa sega kina na yalo). Ni da sa tucaketale, sa lesu tale na yaloda ki na yagoda (dara tale na jakete), ka rau sa sega tale ni qai veitawasei. Me ra veivukevuke na gone me ra dara na jakete ka luvata ni vakamacalataka tiko e dua tale na gone na ka e yaco ni da sa tucaketale.

1 Korinica 15:29

Au rawa ni papitaiso me baleti ira na tamata sa mate.

Ni ra vakavakarau na gone ki na nodra papitaiso, vakasamataka na sala e rawa ni o vukei ira kina me ra rai ki liu ki na madigi talega me ra papitaiso ena vukudra na mate.

iTaviqaravi e Rawa ni Caka

• Vukei ira na gone me ra vakasamataka na veika e sega ni rawa ni ra cakava vakai ira ga. O cei e vukei ira me cakava na veika oqori? Vakaraitaka e dua na iyaloyalo ni dua na tubumu ka a mate ka sega tu ni papitaiso. Tukuna vei ira na gone me baleta na tamata oqo, ka vakamacalataka ni gadreva o koya na noda veivuke me papitaiso.

• Taroga vei ira na gone kevaka e dua nodra lewe ni matavuvale sa lesu mai na valetabu ni a laki papitaiso ena vukudra na mate. Vakaraitaka na iyaloyalo ni tobu ni veipapitaisotaki ni valetabu. Tarogi ira na gone kevaka era kila na cava e dau yaco eke. Vakamacalataka ena loma ni valetabu e rawa ni da papitaiso kina ena vukudra na mate era se bera tu ni papitaiso. Oti sa na qai vakatau vei ira na tamata oqori na nodra ciqoma na papitaiso.

1 Korinica 15:40–41

E vinakata na Tamada Vakalomalagi meu bula vata kei Koya ena matanitu vaka silesitieli.

O na vakavulica beka vakacava vei ira na gone me baleta na matanitu vaka silesitieli, teresitieli, kei na telesitieli? Ena rawa ni veivuke na itaviqaravi oqo.

iTaviqaravi e Rawa ni Caka

• Vola ena papa selesitieli, teresitieli, kei na telesitieli. Vukei ira na gone me ra cavuta na vosa eso oqo.

• Vakaraitaka na iyaloyalo ni matanisiga, vula, kei na kalokalo. Sureti ira na gone me ra biuti iratou me vaka na kena ramase duadua ki na kena ramase lailai duadua. Wilika na 1 Korinica 15:40–41 vei ira na gone (raica talega na iVakadewa nei Josefa Simici ena tikina e 40, ivakamacala e ra a). Vakamacalataka ni matanisiga, vula kei na kalokalo eratou matataka na matanitu e rawa ni da laki bula kina ni da sa tucake tale. Ena matanitu vaka silesitieli, e rawa ni da bula kina vata kei Tamada Vakalomalagi.

• Solia vei ira na gone e dua na ilavelave ni tabana ni itaviqaravi ni macawa oqo me rokataki. Ni ra rokarokataki tiko, wasea vei ira na nomu nanuma me baleta na iVakabula kei na veika sa cakava o Koya me rawa kina vei keda meda laki bula vata tale kei na Tamada Vakalomalagi.

cadra ni matanisiga

“Sa duatani nai ukuuku ni matanisiga” (1 Korinica 15:41).

ivakatakilakila ni veivakavulici

Vakavulica na iVunau: Gone Qase Cake

1 Korinica 15:12–22

Ena vukui Jisu Karisito kei na Nona Tucaketale, au na tucake tale.

Era kila beka na gone o vakavulica na bibi ni Tucaketale i Jisu Karisito? E rawa ni veivuke na vakasama eso oqo.

iTaviqaravi e Rawa ni Caka

• Sureti ira na gone me ra veivukevuke ni wilika na veitikina ena 1 Korinica 15:12–22, ka vaqara na isaunitaro “Na cava ena yaco kevaka a sega na tucaketale?”

• Sureti ira na gone me ra matanataka na ivakarau me vakamacalataki kina na tucaketale vua e dua. Me baleta na vakasama eso, e rawa ni ra railesuva e dua na sere me baleta na Tucaketale ni iVakabula, me vaka na “Ko Jisu Ni Sa Bula Tu” (iVolanisere na Gonelalai, 45). Raica talega na vidio “Until We Meet Again” (ChurchofJesusChrist.org). Wasea na nomu ivakadinadina me baleta na Tucaketale i Karisito.

1 Korinica 15:12–13, 20–22, 29

E rawa ni’u vakavakarau meu gole ki valetabu meu papitaiso ena vukudra na mate.

Na papitaiso baleti ira na mate sa dua na cakacaka rekitaki ni loloma ena vukudra na tubuda. O na vukei ira vakacava na gone me ra vakavakarau me ra vakaitavi ena cakacaka oqo?

iTaviqaravi e Rawa ni Caka

• Wilika na 1 Korinica 15:29. Na cava era a cakava tiko na Yalododonu ena gauna nei Paula eda sa cakava tale tikoga nikua? Tarogi ira na gone na vuna eda papitaiso kina ena vukudra na mate. Kevaka e ganita, vakamacalataka ni vuqa vei ira na tubuda a sega ni donumaki ira na madigi me ra papaitaiso ka vakadeitaki ena bula oqo. Ena valetabu, e sa rawa ni da papitaiso ka vakadeitaki ena vukudra.

• Ni vo e vica na siga me caka na kalasi, kerea nona itubutubu e dua vei ira na gone me vakarautaki luvena mai me wasea nona vunikau ni matavuvale, se tukuna na italanoa baleta e dua na tubuna. E rawa talega ni o wasea baleti ira na tubumu.

• Sureta e dua ena matabisopi se dua na itabagone me wasea eso na ka e rawa ni ra cakava na gone me ra kilikili kina ni curu ki na valetabu. Sureti ira na gone mera vakuria kina nodra dui vakasama eso. Sureti ira me ra biuta nodra takete me ra lako ki na valetabu ena dua na siga.

1 Korinica 15:40–41

Ni oti noqu tucake tale mai na mate, sa rawa ni’u laki bula ena matanitu vaka silesitieli.

Me vakavulici ira na kai Korinica me baleta na yago eda na rawata ena Tucaketale, a cavuta o Paula e tolu na ivakatagedegede ni lagilagi: na silesitieli, teresitieli, kei na telesitieli.

iTaviqaravi e Rawa ni Caka

• Wilika na 1 Korinica 15:40–41 ka sureta e dua na gone me droinitaka e dua na matanisiga, vula, kei na kalokalo ena papa. Tarogi ira na lewe ni kalasi me ra tukuna na mataqali yago vakaturi cake tale vakacava e matataki ena droini yadua.

• Lagata vata e dua na sere me baleta nai ulutaga oqo, me vaka na “Ko Ni Solia Mai vei Au Nomuni Vale” (iVolanisere ni Gonelalai, 73). Se vakaraitaka na vidio “Our Eternal Life” (ChurchofJesusChrist.org). Na cava e vakavulica vei keda na sere se vidio oqo me baleta na vakavakarau ni laki bula ena lagilagi vaka silesitieli?

• Vakamacalataka ni a raica o Josefa Simici ena raivotu e tolu na matanitu ka tautauvata kei na mataqali yago eso e vakamacalataka o Paula. Vukei ira na gone me ra kunea na malanivosa eso mai na Vunau kei na Veiyalayalati 76:50–53, 70; 76:71–79; 76:81–82 ka vakamacalataka na matanitu e tolu oqo.

ivakatakilakila ni vuli

Vakauqeta na Vuli e Vale

Sureti ira na gone me ra kerei ira nodra itubutubu me ra talanoataka e dua na italanoa me baleta e dua na tubudra. E rawa ni ra wasea na italanoa ki na kalasi ena macawa ka tu mai.

Vakatorocaketaki Noda Veivakavulici

Vakauqeti ira na gone me ra dau taro. “Segata mo raica nodra taro [na gone] me madigi eso, sega ni ra veivagolei tani se vakalatilati ki na nomu lesoni. … Na taro vaqori e dau solia na vakasama bibi baleta na veika era vakasamataka tiko na gone, na nodra kauwai, kei na ivakarau era sa raica tiko kina na veika era vulica. Vukei ira me ra raica ni isau ni nodra taro e rawa ni kunei ena ivolanikalou kei na nodra vosa na parofita bula” (Veivakavulici ena iVakarau ni iVakabula, 25–26).

tabana ni itaviqaravi: matanitu vaka silesitieli, teresitieli, kei na telesitieli